ମୁମ୍ବାଇ: ମହିଳା ପ୍ରିମିୟର ଲିଗର ପ୍ରଥମ ସଂସ୍କରଣରେ ମୁମ୍ବାଇ ଇଣ୍ଡିଆନ୍ସର ଦମଦାର ପ୍ରଦର୍ଶନ । ତୃତୀୟ ମ୍ୟାଚରେ ମୁମ୍ବାଇର ହ୍ୟାଟ୍ରିକ ବିଜୟ । ହର୍ମନପ୍ରୀତଙ୍କ ନେତୃତ୍ବାଧୀନ ମୁମ୍ବାଇ ଇଣ୍ଡିଆନ୍ସ 8 ଓ୍ବିକେଟରେ ମେଗ ଲାନିଙ୍ଗଙ୍କ ନେତୃତ୍ବାଧୀନ ଦିଲ୍ଲୀ କ୍ୟାପିଟାଲ୍ସକୁ ପରାସ୍ତ କରିଛି । ଫଳରେ ଚଳିତ ସିଜିନରେ ମୁମ୍ବାଇ ଏକ ପ୍ରତିଦ୍ବନ୍ଦୀ ଟିମ ସାବ୍ୟସ୍ତ ହୋଇଛି । ଏପର୍ଯ୍ୟନ୍ତ ମୋଟ ତିନୋଟି ମ୍ୟାଚ ଖେଳି ବିଜୟ ଧାରା ଜାରି ରଖିଛି ମୁମ୍ବାଇ । ଗତକାଲିର ମ୍ୟାଚରେ ପରାଜୟ ପରେ ଦିଲ୍ଲୀ ଟିମର ବିଜୟ ଧାରାରେ ବ୍ରେକ ଲାଗିଛି ।
ଗୁରୁବାର ସନ୍ଧ୍ୟା 7ଟା 30 ସମୟରେ ଡିୱାଇ ପାଟିଲ ଷ୍ଟାଡିୟମରେ ମୁମ୍ବାଇ ଇଣ୍ଡିଆନ୍ସ ଓ ଦିଲ୍ଲୀ କ୍ୟାପିଟାଲ୍ସ ମଧ୍ୟରେ ମ୍ୟାଚ ଆରମ୍ଭ ହୋଇଥିଲା । ପ୍ରଥମେ ଟସ ଜିତି ପଡିଆକୁ ଓହ୍ଲାଇଥିଲା ଦିଲ୍ଲୀ କ୍ୟାପିଟାଲ୍ସ । କିନ୍ତୁ ମୁମ୍ବାଇ ବୋଲରଙ୍କ ବୋଲିଂରେ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇଥିଲେ ଦିଲ୍ଲୀ ବ୍ୟାଟର । କେହି ଜଣେ ବଡ ସ୍କୋର କରିବାକୁ ସକ୍ଷମ ହୋଇନଥିଲେ । ଲ୍ୟାନିଂ ସର୍ବାଧିକ 43 ରନ କରିଥିବା ବେଳେ ଜେମିମା ରୋଡ୍ରିଗ୍ସ 25 ଓ ରାଧା ଯାଦବ 10 ରନ କରିପାରିଥିଲେ । ଅନ୍ୟ କେହି ଖେଳାଳୀ ଦୁଇ ଅଙ୍କ ରନ ମଧ୍ୟ ଛୁଇଁ ପାରିନଥିଲେ । ଶେଷରେ 18 ଓଭର ଶେଷ ସୁଦ୍ଧା ଦଳ ସମସ୍ତ ଓ୍ବିକେଟ ହରାଇ 105 ରନ କରିଥିଲା ।
