ସିଡନୀ: ଅଷ୍ଟ୍ରେଲିଆ କ୍ରିକେଟ ଟିମର ପୂର୍ବତନ କ୍ୟାପଟେନ ଜର୍ଜ ବେଲି ଟିମର ଜାତୀୟ ଚୟନକର୍ତ୍ତା ନିଯୁକ୍ତ ହୋଇଛନ୍ତି । ଏନେଇ କ୍ରିକେଟ ଅଷ୍ଟ୍ରେଲିଆ ବୋର୍ଡ(CA) ଘୋଷଣା କରିଛି । ପୂର୍ବରୁ ନ୍ୟାସନାଲ ସିଲେକ୍ସନ ପ୍ୟାନେଲ(NSP)ର ମୁଖ୍ୟ ଥିବା ଟ୍ରେଭର ହନ୍ସ ଅବସର ନେଉଛନ୍ତି । ଫଳରେ ତାଙ୍କ ସ୍ଥାନରେ ବେଲିଙ୍କୁ ନୂଆ ଦାୟିତ୍ବ ମିଳିଛି ।
ବେଲି ଓ ମୁଖ୍ୟ କୋଚ୍ ଜଷ୍ଟିନ ଲାଙ୍ଗରଙ୍କ ସହିତ ତୃତୀୟ ପ୍ୟାନେଲ ସଦସ୍ୟ ଶୀଘ୍ର ଯୋଗଦେବେ । ଏନେଇ ପ୍ରକ୍ରିୟା ଆରମ୍ଭ ହୋଇଥିବା କହିଛନ୍ତି, କ୍ରିକେଟ ଅଷ୍ଟ୍ରେଲିଆର ଜେନେରାଲ ମ୍ୟାନେଜର ବେନ ଓଲିଭର ।
ଆଗାମୀ ଟି୨୦ ବିଶ୍ବକପ, ଘରୋଇ ଆସେସ ସିରିଜ ଓ ଏକାଧିକ ଦ୍ବିପାକ୍ଷିକ ସିରିଜର ବିଦେଶ ଗସ୍ତରେ ଅଷ୍ଟ୍ରେଲିଆ ପୁରୁଷ ଟିମ ସହ କାର୍ଯ୍ୟ କରିବାକୁ ସୁଯୋଗ ମିଳିବ । ନୂଆ ଦାୟିତ୍ବ ମିଳିବା ପରେ ଏଥିପାଇଁ ଉତ୍ସାହିତ ଥିବା କହିଛନ୍ତି ବେଲି ।
ବ୍ୟୁରୋ ରିପୋର୍ଟ, ଇଟିଭି ଭାରତ
