ନୂଆଦିଲ୍ଲୀ: ହାଇପ୍ରୋଫାଇଲ କ୍ରିକେଟ ଟୁର୍ଣ୍ଣାମେଣ୍ଟ ଆଇପିଏଲ ଜାରି ରହିଛି । ଏଯାବତ 15ଟି ମୁକାବିଲା ଖେଳା ସରିଛି । ଆଜି 16ତମ ମୁକାବିଲାରେ ଦିଲ୍ଲୀ କ୍ୟାପିଟାଲ୍ସ ଓ ମୁମ୍ବାଇ ଇଣ୍ଡିଆନ୍ସ ମଧ୍ୟରେ ମ୍ୟାଚ୍ ଖେଳାଯିବ । ଉଭୟ ଦଳ ଚଳିତ ସିଜନରେ ବିଜୟ ସ୍ବାଦ ଚାଖିବାକୁ ଅନାଇ ବସିଛନ୍ତି । ପ୍ରଥମ ବିଜୟ ଲକ୍ଷ୍ୟ ନେଇ ଆଜି ମଇଦାନକୁ ଓହ୍ଲାଇବେ ଦୁଇ ଦଳ । ଘରୋଇ ଗ୍ରାଉଣ୍ଡରେ ଏହା ଦିଲ୍ଲୀର ଦ୍ବିତୀୟ ମୁକାବିଲା ।
DC VS MI: ଚଳିତ ଆଇପିଏଲ ସଂସ୍କରଣରେ ଦିଲ୍ଲୀ ଓ ମୁମ୍ବାଇ ବିଜୟ ଖାତା ଖୋଲିନାହାନ୍ତି । ଦିଲ୍ଲୀ 3ଟି ମ୍ୟାଚ ଖେଳିଥିବା ବେଳେ ମୁମ୍ବାଇ 2ଟି ମ୍ୟାଚ ଖେଳିଛି । ହେଲେ ଦୁଇ ଦଳ ପାଇଁ ବିଜୟ ସ୍ବପ୍ନ ହୋଇଛି । ଦିଲ୍ଲୀ ପଏଣ୍ଟ ଟେବୁଲ ଶେଷରେ ରହିଥିବାବେଳେ ମୁମ୍ବାଇ ଶେଷ ଆଡୁ ଦ୍ବିତୀୟ ସ୍ଥାନରେ ରହିଛି । ପୂର୍ବ ସିଜନରେ ମଧ୍ୟ ମୁମ୍ବାଇର ନିରାଶାଜନକ ପ୍ରଦର୍ଶନ ରହିଥିଲା । ଏଥର ମଧ୍ୟ ମୁମ୍ବାଇର ପ୍ରଦର୍ଶନ ଭଲ ନାହିଁ । ଲଗାତାର ଦୁଇଟି ମ୍ୟାଚରେ ପରାସ୍ତ ହୋଇଛି ରୋହିତ ଶର୍ମାଙ୍କ ନେତୃତ୍ବାଧୀନ ମୁମ୍ବାଇ ଇଣ୍ଡିଆନ୍ସ । ପ୍ରଥମ ମୁକାବିଲାରେ ଆରସିବି ଓ ଦ୍ବିତୀୟ ମ୍ୟାଚରେ ଚେନ୍ନାଇ ସୁପରକିଙ୍ଗସ ନିକଟରୁ ପରାସ୍ତ ହୋଇଥିଲା । ଆଜିର ମୁକାବିଲାରେ ଦିଲ୍ଲୀକୁ ହରାଇ ପ୍ରଥମ ବିଜୟ ହାସଲ କରିବା ଲକ୍ଷ୍ୟରେ ରହିଛି ମୁମ୍ବାଇ । ମୁମ୍ବାଇର ବୋଲିଂ ବିଭାଗ ଦୁର୍ବଳ ରହିଛି । ଏହାବାଦ ଆହତ ସମସ୍ୟା ଓ ଖେଳାଳିଙ୍କ ଅନୁପସ୍ଥିତି ଦଳ ପାଇଁ ଚିନ୍ତାର କାରଣ ହୋଇଛି । ବିଜୟ ଖାତା ଖୋଲିବାକୁ ହେଲେ ଉତ୍ତମ ରଣନୀତି ସହ ଉଭୟ ବିଭାଗରେ MIକୁ ଭଲ ପ୍ରଦର୍ଶନ କରିବାକୁ ପଡିବ ।
