ନୂଆଦିଲ୍ଲୀ: ସନଣ୍ଡେକୁ ଭରପୁର ଭପଭୋଗ କରିବେ କ୍ରିକେଟପ୍ରେମୀ । ସୁପର ସନଣ୍ଡେରେ ଆଜି ସୁପର ଫାଇଟ । ହାଇପ୍ରୋଫାଇଲ କ୍ରିକେଟ ଟୁର୍ଣ୍ଣାମେଣ୍ଟ ଆଇପିଏଲରେ ଆଜି ଦୁଇଟି ମୁକାବିଲା ରହିଛି । ଇଣ୍ଡିଆନ ପ୍ରିମିୟର ଲିଗର 41ତମ ମୁକାବିଲାରେ ଚେନ୍ନାଇ ସୁପର କିଙ୍ଗସ ଓ ପଞ୍ଜାବ କିଙ୍ଗସ ମଧ୍ୟରେ ହେବାକୁ ଥିବାବେଳେ 42ତମ ମ୍ୟାଚ ରାଜସ୍ଥାନ ରୟାଲ୍ସ ଓ ମୁମ୍ବାଇ ଇଣ୍ଡିଆନ୍ସ ମଧ୍ୟରେ ଖେଳାଯିବ । ଚେନ୍ନାଇ ଓ ପଞ୍ଜାବ ମ୍ୟାଚ ଆଇପିଏଲ ଇତିହାସରେ 999ତମ ମୁକାବିଲା ହେବାକୁ ଥିବାବେଳେ ରାଜସ୍ଥାନ ଓ ମୁମ୍ବାଇ ମ୍ୟାଚ 1000ତମ ମ୍ୟାଚ ହେବ ।
CSK VS PBKS: ଚଳିତ ସିଜନରେ ଚେନ୍ନାଇ ସୁପର କିଙ୍ଗସ ଓ ପଞ୍ଜାବ ପ୍ରଥମ ଥର ପାଇଁ ପରସ୍ପରକୁ ଭେଟିବାକୁ ଯାଉଛନ୍ତି । ଚେନ୍ନାଇ ତାର ପୂର୍ବ ମ୍ୟାଚରେ ରାଜସ୍ଥାନଠୁ ପରାସ୍ତ ହୋଇଥିଲା । ପଞ୍ଜାବ ତାର ଶେଷ ମୁକାବିଲାରେ ଲକ୍ଷ୍ନୌଠୁ ପରାସ୍ତ ହୋଇଥିବା । ଉଭୟ ଦଳ କମବ୍ୟାକ ଲକ୍ଷ୍ୟରେ ରହିଛନ୍ତି । ଚେନ୍ନାଇ ମୋଟ 8ଟି ମ୍ୟାଚ ଖେଳି 5ଟି ଜିତି ପଏଣ୍ଟ ଟେବୁଲ ଚତୁର୍ଥ ସ୍ଥାନରେ ରହିଛି । ପଞ୍ଜାବ 8ଟିରୁ 4ଟିରେ ବିଜୟ ହାସଲ କରି ଟେବୁଲର ଷଷ୍ଠ ସ୍ଥାନରେ ରହିଛି । ଆଜି ଉଭୟ ଦଳ ବିଜୟ ସ୍ବପ୍ନ ନେଇ ଗ୍ରାଉଣ୍ଡକୁ ଓହ୍ଲାଇବେ । ଗତ 15 ବର୍ଷ ମଧ୍ୟରେ ଉଭୟ ଦଳ ପରସ୍ପରକୁ 27ଥର ଭେଟିଛନ୍ତି । ଏଥିରେ ଚେନ୍ନାଇ ସୁପର କିଙ୍ଗସ 15ଟି ଓ ପଞ୍ଜାବ କିଙ୍ଗସ 12ଟି ଲେଖାଏଁ ମ୍ୟାଚ ଜିତିଛନ୍ତି । ପୂର୍ବ ସିଜନରେ ପଞ୍ଜାବ କିଙ୍ଗସ ସୁପର କିଙ୍ଗସକୁ 2ଟି ମ୍ୟାଚରେ ପରାସ୍ତ କରିଥିଲା । ଆଜି ଚେନ୍ନାଇ ସୁପର କିଙ୍ଗସ ପଞ୍ଜାବକୁ ପରାସ୍ତ କରି ପୂର୍ବ ପରାଜୟର ପ୍ରତିଶୋଧ ନେବା ଲକ୍ଷ୍ୟରେ ରହିଛି । ତେବେ ଘରୋଇ ଚିପକ ଷ୍ଟାଡିୟମରେ ଚେନ୍ନାଇ ଚମକକୁ ଅପେକ୍ଷା କରିଛନ୍ତି ଫ୍ୟାନ୍ସ ।
RR VS MI: ଆଇପିଏଲରେ ସବୁଠି ସଫଳ ଦଳ ତଥା 5ଥର ଚମ୍ପିଆନ ମୁମ୍ବାଇ ଇଣ୍ଡିଆନ୍ସକୁ ଭେଟିବ ରାଜସ୍ଥାନ ରୟାଲ୍ସ । 5ଥର ଚମ୍ପିଆନ ମୁମ୍ବାଇର ଗତ ବର୍ଷ ପରି ଏ ବର୍ଷ ମଧ୍ୟ ନୈରାଶଜନକ ପ୍ରଦର୍ଶନ ରହିଛି । ରାଜସ୍ଥାନ ଭଲ ଫର୍ମରେ ରହିଛି । ରାଜସ୍ଥାନ 8ଟି ମ୍ୟାଚ ଖେଳି 5ଟି ମ୍ୟାଚ ଜିତି ଟେବୁଲ ଦ୍ବିତୀୟ ସ୍ଥାନରେ ରହିଛି । ମୁ୍ମ୍ବାଇ 7ଟି ମ୍ୟାଚ ଖେଳି ମାତ୍ର 3ଟିରେ ବିଜୟ ହାସଲ କରି ନବମ ସ୍ଥାନରେ ରହିଛି । ପୂର୍ବ ରେକର୍ଡ ଅନୁସାରେ ମୁମ୍ବାଇ ପଲ୍ଲା ଭାରି ଥିଲେ ସୁଦ୍ଧା ରାଜସ୍ଥାନର ଯେଉଁଭଳି ଚମକପ୍ରଦ ପ୍ରଦର୍ଶନ ରହିଛି ମ୍ୟାଚକୁ ନେଇ କିଛି ଅନୁମାନ କରି ହେବ ନାହିଁ । ଉଭୟ ଦଳ ମଧ୍ୟରେ ଖେଳାଯାଇଥିବା 27ଟି ମୁକାବିଲାରେ ମୁମ୍ବାଇ 14 ଓ ରାଜସ୍ଥାନ 13ଟି ମ୍ୟାଚ ଜିତିଛି । ଗତ ସିଜନରେ ଦୁଇଦଳ ପରସ୍ପରକୁ ଦୁଇଥର ଭେଟିଥିଲେ । ଗୋଟିଏ ଲେଖାଏଁ ମ୍ୟାଚ ଜିତିଥିଲେ । ରାଜସ୍ଥାନ ଓ ମୁମ୍ବାଇର ଏହି ମ୍ୟାଚ ଆଇପିଏଲ ଇତିହାସରେ ଆଉ ଏକ ଫର୍ଦ୍ଦ ଯୋଡିବ । 2008ରୁ ଆରମ୍ଭ ହୋଇଥିବା ଏହି କ୍ରିକେଟ ଟୁର୍ଣ୍ଣାମେଣ୍ଟର ଏହା 1000ତମ ମ୍ୟାଚ ହେବାକୁ ଯାଉଛି ।
ଏହା ବି ପଢନ୍ତୁ...Wrestlers Protest: ଜନ୍ତର ମନ୍ତରରେ କୁସ୍ତିଯୋଦ୍ଧାଙ୍କୁ ଭେଟିଲେ ପ୍ରିୟଙ୍କା-କେଜ୍ରିୱାଲ
