ମୁମ୍ବାଇ: 14ତମ ଆଇପିଏଲ ମହାକୁମ୍ଭ ପାଇଁ ଅଭ୍ୟାସ ଆରମ୍ଭ କଲା ଦିଲ୍ଲୀ କ୍ୟାପିଟାଲ୍ସ ଦଳ। ମୁମ୍ବାଇର କ୍ରିକେଟ କ୍ଲବ ଅଫ ଇଣ୍ଡିଆରେ ଦିଲ୍ଲୀ କ୍ୟାପିଟାଲ୍ସର ଖେଳାଳୀ ଅଭ୍ୟାସ ଆରମ୍ଭ କରିଛନ୍ତି। ଗତ ସୋମବାର ଦଳରେ ୱିକେଟକିପର ଋଷଭ ପନ୍ତ ଓ ଇଂଲଣ୍ଡ ବ୍ୟାଟସମ୍ୟାନ ସାମ ବିଲିଂସ, ଅଲରାଉଣ୍ଡର ଟମ କୁରାନ ସାମିଲ ହୋଇଥିଲେ।
ମଙ୍ଗଳବାର ଆରମ୍ଭ ହୋଇଥିବା ଅଭ୍ୟାସ ଶିବିରରେ ଉମେଶ ଯାଦବ, ଇଶାନ୍ତ ଶର୍ମା, ଆଜିଙ୍କ୍ୟ ରାହାଣେ ଓ ଅମିତ ମିଶ୍ରା ଭଳି ଖେଳାଳି ସାମିଲ ହୋଇଛନ୍ତି। ଦିଲ୍ଲା ସ୍କ୍ବାଡର ସପୋର୍ଟ ଷ୍ଟାଫ ଓ ଅନ୍ୟ ସହକାରୀ କୋଚ ଦଳୀୟ ଖେଳାଳିଙ୍କୁ ଅଭ୍ୟାସରେ ସହଯୋଗ କରିଛନ୍ତି। ଏହି ସମୟରେ କୋଭିଡ ଏସଓପିକୁ ପାଳନ କରିଛନ୍ତି ପ୍ରତ୍ୟକ୍ଷ ଖେଳାଳି ଓ ସପୋର୍ଟ ଷ୍ଟାଫ। ମୁଖ୍ୟ କୋଚ ରିକି ପଣ୍ଟିଂ ଓ ବୋଲିଂ କୋଚ ଜେମସ ହୋପସ ମଧ୍ୟ ଦଳ ସହ ଯୋଗ ଦେଇଛନ୍ତି। ତେବେ ଦୁହେଁ ବିସିସିଆଇର ଏସଓପି ଅନୁଯାୟୀ କ୍ବାରେଣ୍ଟିନରେ ରହିଛନ୍ତି।
କ୍ବାରେଣ୍ଟିନରେ ରହିବା ସମୟରେ ପ୍ରତ୍ୟେକ ଖେଳାଳି ଓ ସପୋର୍ଟ ଷ୍ଟାଫଙ୍କ ଏକାଧିକ ଥର କୋରୋନା ଯାଞ୍ଚ କରାଯିବ। ପୂର୍ବତନ ଭାରତୀୟ ୱିକେଟକିପର ଅଜୟ ରାତ୍ରା ଦିଲ୍ଲୀର ସହକାରୀ କୋଚ ଦାୟିତ୍ବରେ ରହିଛନ୍ତି। ସହକାରୀ ନିଯୁ୍କ୍ତ ହେବାପରେ ଖୁସି ଜାହିର କରିଛନ୍ତି ଅଜୟ ରାତ୍ରା। ଏପ୍ରିଲ 9 ତାରିଖରେ ଆଇପିଏଲ -14 ଆରମ୍ଭ ହେବାକୁ ଥିବା ବେଳେ ଏପ୍ରିଲ 10 ତାରିଖରେ ଦିଲ୍ଲୀ ପ୍ରଥମ ମ୍ୟାଚ ଚେନ୍ନାଇ ସୁପର କିଙ୍ଗ୍ସ ସହ ଖେଳିବ। ଏହି ମ୍ୟାଚକୁ ନେଇ ଉଭୟ ଦଳ ଉତ୍ସାହିତ ରହିଛନ୍ତି।
ବ୍ୟୁରୋ ରିପୋର୍ଟ, ଇଟିଭି ଭାରତ
