ମୁମ୍ବାଇ: ମାର୍ଚ୍ଚ ୨୬ରୁ ଆରମ୍ଭ ହେବାକୁ ଯାଉଛି ବିଶ୍ବର ବିତ୍ତଶାଳୀ ତଥା ବୃହତ ଟି-୨୦ କ୍ରିକେଟ ଲିଗ ଇଣ୍ଡିଆନ ପ୍ରିମିୟର ଲିଗ (IPL) । କ୍ରିକେଟର ଏହି ବିରାଟ ଉତ୍ସବକୁ ନେଇ କ୍ରିକେଟ ଫ୍ୟାନ୍ସଙ୍କ ମଧ୍ୟରେ ଉତ୍କଣ୍ଠା ବଢିବାରେ ଲାଗିଛି । ଏଥର ଟୁର୍ଣ୍ଣାମେଣ୍ଟରେ ଦୁଇଟି ନୂଆ ଟିମ ସାମିଲ ହୋଇଥିବାରୁ ଟୁର୍ଣ୍ଣାମେଣ୍ଟ ଅଧିକ ପ୍ରତିନ୍ଦନ୍ଦ୍ବୀତାପୂର୍ଣ୍ଣ ହେବାର ସମ୍ଭାବନା ରହିଛି । ଏଥିସହିତ ମେଗା ନିଲାମୀରେ ଷ୍ଟାର ଖେଳାଳିଙ୍କ କ୍ୟାମ୍ପ୍ ବଦଳିଥିବାରୁ ସମସ୍ତ ୧୦ଟି ଟିମ ପ୍ରାୟତଃ ସମାନ ଭାବେ ଶକ୍ତିଶାଳୀ ରହିଛନ୍ତି । ସବୁଠୁ ମଜାଦାର କଥା ହେଉଛି କିଛି ଖେଳାଳିଙ୍କୁ ନୂଆ ଅବତାରରେ ଆଇପିଏଲର ଏହି ସଂସ୍କରଣରେ ଦେଖିବାକୁ ମିଳିବ । ଷ୍ଟାର ଭାରତୀୟ ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟା, ଓପନର ମୟଙ୍କ ଅଗ୍ରୱାଲ ଓ ଦକ୍ଷିଣ ଆଫ୍ରିକୀୟ ବ୍ୟାଟ୍ର ଫାଫ୍ ଡୁପ୍ଲେସିସଙ୍କୁ ଆଇପିଏଲ ଟିମର ଅଧିନାୟକ ଭାବେ ଦେଖିବାକୁ ମିଳିବ ।
ଡୁପ୍ଲେସିସଙ୍କ ଆଇପିଏଲ ଅଧିନାୟକ ଡେବ୍ୟୁ:
ଡୁପ୍ଲେସିସ ଦକ୍ଷିଣ ଆଫ୍ରିକା ଜାତୀୟ କ୍ରିକେଟ ଟିମର ପୂର୍ବତନ ଅଧିନାୟକ ରହିସାରିଥିବାରୁ ପୂର୍ବରୁ ତାଙ୍କର ଅଧିନାୟକ ଅଭିଜ୍ଞତା ରହିଛି । ମାତ୍ର ଆଇପିଏଲରେ ଅଧିନାୟକ ଭାବେ ଡେବ୍ୟୁ କରିବେ ଡୁପ୍ଲେସିସ । ଷ୍ଟାର ବ୍ୟାଟ୍ର ବିରାଟ କୋହଲି IPLର ଚର୍ଚ୍ଚିତ ଫ୍ରାଞ୍ଚାଇଜ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର(RCB)ର ଅଧିନାୟକ ଛାଡିବା ପରେ ଡୁପ୍ଲେସିସଙ୍କୁ ଚେନ୍ନାଇ ସୁପର କିଙ୍ଗ୍ସରୁ ଆମଦାନୀ କରି ନେୃତୃତ୍ବ ଭାର ପ୍ରଦାନ କରିଛି RCB । ଆଇପିଏଲ ଟୁର୍ଣ୍ଣାମେଣ୍ଟର ଦ୍ବିତୀୟ ସର୍ବାଧିକ ସଫଳତମ ଟିମ ମହେନ୍ଦ୍ର ସିଂହ ଧୋନିଙ୍କ ଚେନ୍ନାଇ ସୁପର କିଙ୍ଗ୍ସ(CSK)ର ମ୍ୟାଚ୍ ବିଜେତା ଖେଳାଳି ରହିଥିଲେ ଡୁପ୍ଲେସିସ ।
ଅଗ୍ରରୱାଲଙ୍କ ଅଧିନାୟକତ୍ବରେ ଭାଗ୍ୟ ପରୀକ୍ଷା କରିବ ପଞ୍ଜାବ:
ପଞ୍ଜାବ କିଙ୍ଗ୍ସ କ୍ୟାମ୍ପ୍ ଛାଡି କେଏଲ ରାହୁଲ ନୂଆ ଟିମ ଲକ୍ଷ୍ନୌକୁ ଡିଆଁ ମାରିବା ପରେ, ପଞ୍ଜାବର କିଙ୍ଗ ହୋଇଛନ୍ତି ମୟଙ୍କ । ଆଇପିଏଲର ନୂଆ ସଂସ୍କରଣରେ ସେନାପତି ପରିବର୍ତ୍ତନ ପରେ ପଞ୍ଜାବର ପ୍ରଦର୍ଶନ ବଦଳୁଛି କି ନାହିଁ, ସମସ୍ତଙ୍କ ନଜର ରହିବ । ତେବେ ମେଗା ନିଲାମୀରେ କିଛି ଷ୍ଟାର ମ୍ୟାଚ୍ ବିଜେତା ଖେଳାଳିଙ୍କୁ କ୍ୟାମ୍ପ୍ରେ ସାମିଲ କରିଥିବାରୁ ପଞ୍ଜାବ ଏଥର ଭଲ ପ୍ରଦର୍ଶନ ପାଇଁ ଦୃଢ ଆଶାବାଦୀ ରହିଛି । ଅଧିନାୟକ ମୟଙ୍କ ମଧ୍ୟ କହିସାରିଛନ୍ତି ଯେ, ଏଥର ପଞ୍ଜାବ ଟାଇଟେଲ ବିଜୟୀ ସ୍କ୍ବାଡ୍ ପାଇଛି ।
