କୋଲକାତା: ଜନ୍ମଦିନକୁ ଜବରଦସ୍ତ ଷ୍ଟାଇଲ୍ରେ ସେଲିବ୍ରେଟ୍ କରିଛନ୍ତି କ୍ରିକେଟ୍ ଜଗତର କିଙ୍ଗ୍ ବିରାଟ କୋହଲି । ବିଶ୍ବକପ୍ ୨୦୨୩ରେ ଦକ୍ଷିଣ ଆଫ୍ରିକା ବିପକ୍ଷ ମ୍ୟାଚ୍ରେ ସେ ୪୯ତମ ଦିନିକିଆ ଶତକ ହାସଲ କରି ମାଷ୍ଟର ବ୍ଲାଷ୍ଟର ସଚିନ୍ ତେନ୍ଦୁଲକରଙ୍କ ରେକର୍ଡର ସମକକ୍ଷ ହୋଇଛନ୍ତି । ତେବେ ଏହି ରେକର୍ଡ ସହ ଆଉ ଏକ ବିରଳ ରେକର୍ଡ ମଧ୍ୟ କରିଛନ୍ତି କିଙ୍ଗ୍ କୋହଲି । ପ୍ରଥମ ଭାରତୀୟ କ୍ରିକେଟର ଭାବେ ନିଜ ଜନ୍ମଦିନରେ ବିଶ୍ବକପ୍ ଶତକ ହାସଲ କରିବାର ଗୌରବ ଅର୍ଜନ କରିଛନ୍ତି ବିରାଟ । ଏହା ସହିତ ଜନ୍ମଦିନରେ ଦିନିକିଆ ଶତକ ହାସଲ କରିବାରେ ସେ ପୂର୍ବତନ ଭାରତୀୟ କ୍ରିକେଟର ବିନୋଦ କାମ୍ବଲି ଓ ସଚିନ ତେନ୍ଦୁଲକରଙ୍କ ସମକକ୍ଷ ହୋଇଛନ୍ତି ।
ନିଜ ଜନ୍ମଦିନରେ ଦିନିକିଆ ଶତକ ହାସଲକାରୀ ରେକର୍ଡ ଉପରେ ନଜର ପକାଇଲେ ମୁମ୍ବାଇ ପାଇଁ ଘରୋଇ କ୍ରିକେଟ୍ ଖେଳିଥିବା ପୂର୍ବତନ ଭାରତୀୟ କ୍ରିକେଟର ବିନୋଦ କାମ୍ବଲି ନିଜ ଜନ୍ମଦିନରେ ଦିନିକିଆ କ୍ରିକେଟ୍ରେ ଶତକ ହାସଲ କରିବାର ରେକର୍ଡ ନିଜ ନାମରେ ରଖିଛନ୍ତି । ସେ ୧୯୯୩ରେ ଶ୍ରୀଲଙ୍କା ବିପକ୍ଷ ଏକ ମ୍ୟାଚ୍ରେ ନିଜ ଜନ୍ମଦିନରେ ଅପରାଜିତ ୧୦୦ ରନର ପାଳି ଖେଳିଥିଲେ । ଏହାପରେ ମହାନ କ୍ରିକେଟର ସଚିନ ତେନ୍ଦୁଲକର ଏହି ରେକର୍ଡ ୧୯୯୮ରେ ନିଜ ନାଁରେ କରିଥିଲେ । ନିଜ ଜନ୍ମଦିନରେ ଅଷ୍ଟ୍ରେଲିଆ ବିପକ୍ଷରେ ୧୩୪ ରନର ବିସ୍ଫୋରକ ପାଳି ଖେଳିଥିଲେ ତେନ୍ଦୁଲକର । ଏହି ଦିନ କ୍ରିକେଟ୍ରେ 'Desert Storm' ଭାବେ ମନେ ରଖାଯାଇଛି ।
ବିଦେଶୀ ବ୍ୟାଟରଙ୍କ ବର୍ଥ ଡେ' ରେକର୍ଡ ଉପରେ ନଜର ପକାଇଲେ ଶ୍ରୀଲଙ୍କାର କିମ୍ବଦନ୍ତୀ କ୍ରିକେଟର ସନଥ ଜୟସୁରିୟା ୨୦୦୮ ମସିହାରେ ବାଂଲାଦେଶ ବିପକ୍ଷରେ ନିଜ ଜନ୍ମଦିନରେ ଶତକ ହାସଲ କରିଥିଲେ । ୨୦୧୧ରେ ପାକିସ୍ତାନ ବିପକ୍ଷରେ ନିଜ ଜନ୍ମଦିନରେ ଅପରାଜିତ ୧୩୧ ରନର ଧୂଆଁଧାର ପାଳି ଖେଳିଥିଲେ ପୂର୍ବତନ ନ୍ୟୁଜିଲାଣ୍ଡ ବ୍ୟାଟର ରସ୍ ଟେଲର । ସେହିଭଳି ନ୍ୟୁଜିଲାଣ୍ଡ ବ୍ୟାଟର ଟମ୍ ଲାଥମ ୨୦୨୨ରେ ନେଦରଲ୍ୟାଣ୍ଡ ବିପକ୍ଷରେ ୧୪୦ ରନର ଅପରାଜିତ ପାଳି ଖେଳି ଏହି ତାଲିକାରେ ନିଜ ନାଁ ଯୋଡ଼ିଥିଲେ । ଚଳିତ ବିଶ୍ବକପ୍ ୨୦୨୩ରେ ପାକିସ୍ତାନ ବିପକ୍ଷରେ ନିଜ ଜନ୍ମଦିନରେ ଶତକୀୟ ପାଳି ଖେଳିଥିଲେ ଅଷ୍ଟ୍ରେଲୀୟ ଓପନର ମିଚେଲ୍ ମାର୍ଶ । ବେଙ୍ଗାଲୁରୁରେ ଖେଳାଯାଇଥିବା ଏହି ମ୍ୟାଚ୍ରେ ସେ ୧୨୧ ରନର ଦମଦାର ପାଳି ଖେଳିଥିଲେ ।
ବ୍ୟୁରୋ ରିପୋର୍ଟ, ଇଟିଭି ଭାରତ