ଚଣ୍ଡୀଗଡ: ସେ ଥିଲେ ଭାରତୀୟ ହକିର 2ୟ କିମ୍ବଦନ୍ତୀ । ମେଜର ଧ୍ୟାନଚାନ୍ଦଙ୍କ ପରେ ତାଙ୍କୁ ହିଁ ହକିର ଯାଦୁଗର ଭାବେ ଗଣାଯାଉଥିଲା । ତିନି ତିନୋଟି ଅଲମ୍ପିକ୍ ଗୋଲ୍ଡ ମେଡାଲ ବିଜେତା ଏହି ମହାନ ଭାରତୀୟ ହକି ଖେଳାଳି ଆଉ ଆମ ଗହଣରେ ନାହାନ୍ତି । 96 ବୟସରେ ତାଙ୍କର ପରଲୋକ ଘଟିଛି । ହେଲେ ପୂର୍ବତନ ଭାରତୀୟ ଅଧିନାୟକଙ୍କୁ ସେ କହିଯାଇଥିବା କଥା ଆଜି ପ୍ରତି ଭାରତୀୟ କ୍ରିକେଟରଙ୍କ କର୍ଣ୍ଣରେ ଗୁଞ୍ଜରିତ ହୁଏ ।
ଭାରତରେ ଲୋକପ୍ରିୟ ଖେଳ କ୍ରିକେଟ ପ୍ରତି କେବେ ଆକର୍ଷିତ ହୋଇନଥିବା ବଲବୀର ସିଂହ ସିନିୟର କିନ୍ତୁ ଥରେ ପୂର୍ବତନ ଭାରତୀୟ ଅଧିନାୟକ ମହେନ୍ଦ୍ର ସିଂ ଧୋନିଙ୍କୁ କହିଥିଲେ, ଭାରତର ପ୍ରତି ବିଜୟ ମୋତେ ଉତ୍ତମ ସ୍ବାସ୍ଥ୍ୟ ପାଇଁ ସାହାଯ୍ୟ କରେ । 4 ବର୍ଷ ତଳର ଘଟଣା । ସେ ଦିନ ଥିଲା ଭାରତ-ଅଷ୍ଟ୍ରେଲିଆ ଟି-20 ବିଶ୍ବକପ ମ୍ୟାଚ । ପଞ୍ଜାବର ମୋହାଲି ଗ୍ରାଉଣ୍ଡରେ ଆୟୋଜିତ ଏହି ମ୍ୟାଚକୁ ଦେଖିବାକୁ ଆସିଥିଲେ ବଲବୀର । ତେବେ ମ୍ୟାଚ ପୂର୍ବରୁ ସେ ଭାରତୀୟ ଦଳକୁ ଶୁଭେଚ୍ଛା ଜଣାଇବେ ବୋଲି ଇଚ୍ଛା ପ୍ରକଟ କଲେ ।
ପରେ ତାଙ୍କୁ ଭାରତୀୟ ଦଳ ସହ ଭେଟ କରାଗଲା । ସେଠାରେ ଧୋନି ତାଙ୍କ ସ୍ବାସ୍ଥ୍ୟବସ୍ଥା ସମ୍ପର୍କରେ ପଚାରିଥିଲେ । ତେବେ ସ୍ମିତ ହାସ୍ୟ ଦେଇ ସିନିୟର ବଲବୀର ଯାହା ଉତ୍ତର ରଖିଥିଲେ ତାହା ସେଦିନ ସମସ୍ତ ଭାରତୀୟ ଖେଳାଳିଙ୍କୁ ଉତ୍ସାହିତ କରିଥିଲା । ସେ କହିଥିଲେ, ‘‘ଧୋନି, ଭାରତର ପ୍ରତି ବିଜୟ ମୋତେ ଉତ୍ତମ ସ୍ବାସ୍ଥ ପାଇଁ ସାହାଯ୍ୟ କରେ । ମୁଁ ଚାହୁଁଛି ଭାରତ 3ୟ ଥର ପାଇଁ ବିଶ୍ବକପ ବିଜୟୀ ହେଉ । ଯାହା ମୋତେ ଆହୁରି ଦୀର୍ଘାୟୁ କରିଦେବ ।’’ ସେତେବେଳେ ବଲବୀରଙ୍କୁ 92 ବର୍ଷ ବୟସ ହୋଇଥିଲା ।
ଉଲ୍ଲେଖଥାଉ କି, ଉକ୍ତ ମ୍ୟାଚରେ ଭାରତ ଅଷ୍ଟ୍ରେଲିଆକୁ ପରାସ୍ତ କରି ଏକ ରୋମାଞ୍ଚର ବିଜୟ ସହ ଟି-20 ବିଶ୍ବକପ ସେମିଫାଇନାଲରେ ପ୍ରବେଶ କରିଥିଲା । ପରେ ସେମିଫାଇନାଲରେ ୱେଷ୍ଟଇଣ୍ଡିଜ୍ଠୁ ହାରି ବିଶ୍ବକପ ଫାଇନାଲ ଖେଳିବାରୁ ବଞ୍ଜିତ ହୋଇଥିଲା ।
