ଇଂଲଣ୍ଡ: ଭାରତକୁ ଘାରିଛି ଆହତ ଚିନ୍ତା । ପ୍ରଥମେ ଧୱନ, ତାପରେ ଭୁବି ଆଉ ଏବେ ବିଜୟ ଶଙ୍କର । ବୁଧବାର ନେଟରେ ଅଭ୍ୟାସ କଲାବେଳେ ବୁମରା ବିଜୟ ଶଙ୍କରଙ୍କୁ ବୋଲିଂ କରୁଥିଲେ । ଏତିକି ବେଳେ ବଲ ଆସି ବାଜିଥିଲା ବିଜୟଙ୍କ ପାଦ ଆଙ୍ଗୁଠିରେ, ଯାହାପରେ ଶଙ୍କରଙ୍କୁ ଖୁବ କଷ୍ଟ ହୋଇଥିଲା । କିନ୍ତୁ ଏନେଇ ଚିନ୍ତା କରିବାର କୌଣସି ଆବଶ୍ୟକତା ନାହିଁ ବୋଲି ସୂଚନା ରହିଛି ।
ଗୁରୁବାର ସ୍ଲିପର ପିନ୍ଧି ଅଳ୍ପ ଛୋଟେଇ ଚାଲୁଥିବାର ଦେଖିବାକୁ ମିଳିଥିଲେ ଶଙ୍କର । ପରେ ତାଙ୍କୁ ଜଗିଙ୍ଗ କରୁଥିବାର ଦେଖିବାକୁ ମିଳିଥିଲା । କିନ୍ତୁ ସେ ଅଳ୍ପ ସମୟ ପରେ ଥକି ପଡିଥିଲେ ।
ବୁଧବାର ବିସିସିଆଇ ଶିଖର ଧୱନ ବିଶ୍ବକପରୁ ବାଦ ପଡିବା ନେଇ ସ୍ପଷ୍ଟ କରିଥିଲା । ତାଙ୍କ ସ୍ଥାନରେ ଯୁବ ବ୍ୟାଟ୍ସମ୍ୟାନ ଋଷଭ ପନ୍ତ ନିଜ ସ୍ଥାନ ପକ୍କା କରିଛନ୍ତି । ସେପଟେ ପାକିସ୍ତାନ ବିପକ୍ଷ ମ୍ୟାଚ ବେଳେ ମାଂସପେଶୀ ଟାଣି ହୋଇଯିବାରୁ ତାଙ୍କୁ ମଧ୍ୟ ଟିମ ମ୍ୟାନେଜମେଣ୍ଟ ଆଠ ଦିନ ପାଇଁ ଆରମ ଦେଇଛନ୍ତି । ତେବେ ଭୁବିଙ୍କ ବିକଳ୍ପ ଭାବେ ଭାରତ ପାଖରେ ମହମ୍ମଦ ସାମି ରହିଛନ୍ତି ।
ତେବେ ଶଙ୍କରଙ୍କ ଆହତ ହେବା ଭାରତ ପାଇଁ ଚିନ୍ତାର କାରଣ ହୋଇପାରିଥାନ୍ତା । କାରଣ ଉଭୟ ବ୍ୟାଟ ଓ ବଲରେ ଭାରତ ପାଇଁ ଉପଯୋଗୀ ସାବ୍ୟସ୍ତ ହୋଇଛନ୍ତି ବିଜୟ । ଭାରତ ତାର ପରବର୍ତ୍ତୀ ମ୍ୟାଚ ସାଉଥ ହମ୍ପଟନର ରୋଜ ବାଉଲରେ ଆଫଗାନିସ୍ତାନ ବିପକ୍ଷରେ ଖେଳିବ । ସୂଚନା ଯୋଗ୍ୟ ଯେ ଆଫଗାନିସ୍ତାନ 5ଟି ପରାଜୟ ସହ ପଏଣ୍ଟ ତାଲିକାର ସର୍ବନିମ୍ନରେ ରହିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
