ଶାରଜାହ: ସୋମବାର ମହିଳା ଟି-20 ଚ୍ୟାଲେଞ୍ଜ 2020ର ଫାଇନାଲ ମୁକାବିଲା ସୁପରନୋଭାସ ଓ ଟ୍ରେଲବ୍ଳେଜର୍ସ ଟିମ ମଧ୍ୟରେ ଖେଳାଯିବ । ତେବେ ଫାଇନାଲ ଫାଇଟ ପୂର୍ବରୁ ଟ୍ରେଲବ୍ଳେଜର୍ସ କ୍ୟାପଟେନ ସ୍ମୃତି ମାନ୍ଧାନା ଟିମକୁ ଦେଇଛନ୍ତି ବିଜୟ ମନ୍ତ୍ର । ଶାରଜାହ କ୍ରିକେଟ ଷ୍ଟାଡିୟମରେ ଖେଳାଯିବାକୁ ଥିବା ଏହି ଫାଇନାଲ ମୁକାବିଲାରେ ଫିଲ୍ଡିଂ ବିଭାଗ ଦୃଢ ହେବା ଉଚିତ ବୋଲି କହିଛନ୍ତି ମାନ୍ଧାନା ।
ଭର୍ଚୁଆଲ ସାମ୍ବାଦିକ ସମ୍ମିଳନୀରେ ମାନ୍ଧାନା କହିଛନ୍ତି, ଶେଷ ମ୍ୟାଚର ପ୍ରଦର୍ଶନକୁ ଦୃଷ୍ଟିରେ ରଖି ଫିଲ୍ଡିଂ ଉପରେ ଧ୍ୟାନ ଦେବାକୁ ହେବ । ସୁପରନୋଭାସ ବିପକ୍ଷ ପୂର୍ବ ମ୍ୟାଚରେ 15ରୁ 20 ରନ ଅଧିକ ବ୍ୟୟ କରିଥିଲୁ । ବୋଲିଂ ବିଭାଗ ପାଇଁ ରଣନୀତି ପ୍ରସ୍ତୁତ । ଫାଇନାଲ ମ୍ୟାଚରେ ପ୍ରଭାବୀ ପ୍ରଦର୍ଶନ ସହ ଟୁର୍ଣ୍ଣାମେଣ୍ଟ ବିଜୟ ନେଇ ଆଶାବାଦୀ ରହିଛି ।"
ଟ୍ରେଲବ୍ଳେଜର୍ସ ପୂର୍ବ ମ୍ୟାଚରେ ହରମନପ୍ରିତ କୌରଙ୍କ ସୁପରନୋଭାସ ଠାରୁ 2 ରନରେ ପରାସ୍ତ ହୋଇଥିଲା । ମାତ୍ର ରାଉଣ୍ଡ ରବିନ ଟୁର୍ଣ୍ଣାମେଣ୍ଟରେ ଭେଲୋସିଟି ବିପକ୍ଷରେ ବଡ ବ୍ୟବଧାନରେ ବିଜୟୀ ହୋଇଥିଲା । ଫଳରେ 3ଟି ଟିମ ଗୋଟିଏ ଲେଖାଏଁ ମ୍ୟାଚ ଜିତିଥିଲେ ମଧ୍ୟ ରନ ରେଟ୍ ଆଧାରରେ ସୁପରନୋଭାସ ଓ ଟ୍ରେଲବ୍ଳେଜର୍ସ ଫାଇନାଲକୁ ଉନ୍ନୀତ ହୋଇଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
