କଟକ: ଆଉ କିଛି କ୍ଷଣର ଅପେକ୍ଷା । ଆରମ୍ଭ ହେବ ବହୁ ପ୍ରତିକ୍ଷୀତ ବାରବାଟୀ ବ୍ୟାଟେଲ । ବାରବାଟୀରେ ହେବ ଇଣ୍ଡିଆ-ଇଣ୍ଡିଜ ଟ୍ରଫି ଟକ୍କର । ମ୍ୟାଚ ଜିତି ସିରିଜ କବଜା ଲକ୍ଷରେ ରହିଛନ୍ତି ଉଭୟ ଦଳ । ଇଣ୍ଡିଜ ବିପକ୍ଷ ଘରୋଇ ଦିନିକିଆ 1-1ରେ ବରାବର ରହିଛି । ଫଳରେ ଉଭୟ ଦଳ ପାଇଁ ଏହା କର ବା ମର ମ୍ୟାଚ । ତେବେ ଏହି ସଂଘର୍ଷପୂର୍ଣ୍ଣ ମ୍ୟାଚ କଣ ଟିମ ଇଣ୍ଡିଆ ପକ୍ଷରେ ଯିବ ? କଟକର ବାରବାଟୀ କଣ ବିରାଟ ବାହିନୀ ପାଇଁ ଲକି ସାବ୍ୟସ୍ତ ହେବ? କିଏ ଜିତିବ ମ୍ୟାଚ? ବାରବାଟୀ ପିଚ କାହାକୁ ଦେବ ସାଥ ? ଏହି ସବୁ ପ୍ରଶ୍ନର ସମାଧାନ ଆମର ଏହି ରିପୋର୍ଟରେ ।
କ୍ରିକେଟ ବିଶେଷଜ୍ଞ ମତରେ ବାରବାଟୀ ପିଚ ବ୍ୟାଟ୍ସମ୍ୟାନଙ୍କ ଫେବରରେ ରହିଛି । ପିଚ୍ ଫ୍ଲାଟ ଓ ସଠିକ୍ ସମତଳ ହୋଇଥିବାରୁ ବ୍ୟାଟ୍ସମ୍ୟାନଙ୍କ ପ୍ରଦର୍ଶନ ଭଲ ରହିବ । କିନ୍ତୁ ସେପଟେ କଟକକୁ ସାଜିଛି କାକର ଚିନ୍ତା । ମ୍ୟାଚରେ ଡ୍ୟୁ ଫ୍ୟାକ୍ଟର ସାଜିବାକୁ ଯାଉଛି କାଳ । ସନ୍ଧ୍ୟାରେ ବୋଲରଙ୍କୁ ନିର୍ଦ୍ଧୁମ ଛେଚିବେ ବ୍ୟାଟ୍ସମ୍ୟାନ । କଟକରେ ଏବେ ତାପମାତ୍ରା କମ ରହିଥିବାରୁ ଓ ପ୍ରବଳ ଶୀତ ଥିବାରକୁ ସନ୍ଧ୍ୟାରେ କାକର ପଡିବାର ସମ୍ଭାବନା ଖୁବ ଅଧିକ ରହିଛି । ଫଳରେ ବଲ ସୁଇଙ୍ଗ କରିବ ନାହିଁ । ଏପରି ସ୍ଥଳରେ ଟସ ନେବ ଗୁରୁତ୍ବପୂର୍ଣ୍ଣ ଭୂମିକା । ଯେଉଁ ଦଳ ଟସ ଜିତିବ ସେ ପ୍ରଥମ ବୋଲିଂ କରିବାକୁ ଚାହିଁବ ।
ତେବେ ଯଦି ସିରିଜର ଗତ ଦୁଇଟି ମ୍ୟାଚ ଦେଖିବା, ଦୁଇଟି ମ୍ୟାଚରେ ଟସ ପକାଇ ବିଫଳ ହୋଇଛନ୍ତି ଅଧିନାୟକ କୋହଲି । ତେଣୁ ବାରବାଟୀରେ କୋହଲିଙ୍କୁ ଟସ ଜିତିବା ନିତାନ୍ତ ଆବଶ୍ୟକ ହୋଇପଡିଛି । ଅନ୍ୟପଟେ ଗତକାଲି(ଶନିବାର) ମ୍ୟାଚ ପୂର୍ବବର୍ତ୍ତୀ ସାମ୍ବାଦିକ ସମ୍ମିଳନୀରେ ଯୁବ ଖେଳାଳି ଶ୍ରେୟଶ ଆୟର କହିଛନ୍ତି, ବିଶାଖାପାଟଣା ବିଜୟ ମନ୍ତ୍ରରେ ବାରବାଟୀକୁ ଓହ୍ଲାଇବ ଘରୋଇ ଦଳ । ଉଲ୍ଲେଖଥାଉକି, ପ୍ରଥମ ବ୍ୟାଟିଂ କରି ଉକ୍ତ ମ୍ୟାଚରେ 386 ସ୍କୋର କରିଥିଲା ଟିମ ଇଣ୍ଡିଆ । ଏହା ପରେ କୁଲଦୀପ ଯାଦବଙ୍କ ହ୍ୟାଟ୍ରିକ୍ ସଫଳତା ବଳରେ ଭାରତ ଇଣ୍ଡିଜ୍ ଟିମକୁ 107ରନରେ ମାତ ଦେଇଥିଲା । ଅନ୍ୟପଟେ ବାରବାଟୀର ଆଉଟ ଫିଲ୍ଡ ଦ୍ରୁତ ରହିଛି । ଗ୍ରାଉଣ୍ଡରେ ସ୍କୋର 300ରୁ 320 କିମ୍ବା 350 ହେବା ନେଇ ଆଶା କରିଛନ୍ତି ଗ୍ରାଉଣ୍ଡ ଷ୍ଟାପ । ଏପରି ସ୍ଥିତିରେ ଯଦି ଟିମ ଇଣ୍ଡିଆ ପ୍ରଥମେ ବ୍ୟାଟିଂ କରେ, ବିଶାଖାପାଟଣ ପରି ବାରବାଟୀରେ ପୁଣିଥରେ ଏକ ବଡ ସ୍କୋର କରିବାକୁ ପଡିବ ବିରାଟ ବାହିନୀକୁ ।
ବ୍ୟୁରୋ ଇନପୁଟ, ଇଟିଭି ଭାରତ
