ନୂଆଦିଲ୍ଲୀ: ଶେଷରେ ନିଜ ଟ୍ବିଟକୁ ନେଇ ସୃଷ୍ଟି ହୋଇଥିବା ଚର୍ଚ୍ଚାରେ ମୁହଁ ଖୋଲିଛନ୍ତି ଭାରତୀୟ ଅଧିନାୟକ ବିରାଟ କୋହଲି । କୋହଲି କହିଛନ୍ତି, ‘ଟ୍ବିଟରୁ ମୁଁ ଏକ ଶିକ୍ଷା ପାଇଲି । ଧୋନିଙ୍କ ଅବସର ଖବର ସହ ମୋ ଟ୍ବିଟର କୌଣସି ସମ୍ପର୍କ ନାହିଁ । ଯେଉଁ ଖବର ପ୍ରସାରଣ ହେଉଛି ତାହା ଭୁଲ ।’ ରବିବାର ଖେଳାଯିବାକୁ ଥିବା ଦକ୍ଷିଣ ଆଫ୍ରିକା ବିପକ୍ଷ ପ୍ରଥମ ଟି-20 ମ୍ୟାଚ ପୂର୍ବବର୍ତ୍ତୀ ସାମ୍ବାଦିକ ସମ୍ମୀଳନିରେ ଏପରି କିଛି କହିଛନ୍ତି ବିରାଟ ।
ଘଟଣାକ୍ରମେ, ଗୁରୁବାର କୋହଲି ନିଜର ଟ୍ଵିଟର ଆକାଉଣ୍ଟରେ ଧୋନିଙ୍କ ସହ ଏକ ଫଟୋ ପୋଷ୍ଟ କରିଥିଲେ । ଏହା ଭାରତ ଓ ଅଷ୍ଟ୍ରେଲିଆ ମଧ୍ୟରେ 2016 ଟି-20 ବିଶ୍ଵକପର ଫଟୋ ଥିଲା । ଯେଉଁଥିରେ ସେ ଲେଖିଥିଲେ ଏହି ମ୍ୟାଚରେ ଧୋନି ତାଙ୍କୁ ଏମିତି ଦୌଡ଼ାଇଥିଲେ ଯେମିତି ଫିଟନେସ୍ ଟେଷ୍ଟ ଚାଲିଛି ।
ତେବେ ଏହି ଟ୍ବିଟ ପରେ ସାମାଜିକ ଗଣମାଧ୍ୟମରେ ଚର୍ଚ୍ଚା ଆରମ୍ଭ ହୋଇଯାଇଥିଲା ଯେ ଧୋନି ଅନ୍ତରାଷ୍ଟ୍ରୀୟ କ୍ରିକେଟରୁ ଦିନେ ଦୁଇ ଦିନ ମଧ୍ୟରେ ଅବସର ଘୋଷଣା କରିବେ । ମାତ୍ର ଏହାର ଖଣ୍ଡନ କରିଛନ୍ତି କୋହଲି ।
