ହାଇଦ୍ରାବାଦ: ପୁଣି କ୍ରିକେଟ ବିଶ୍ବକପରେ ଦର୍ଶକ ଦେଖିପାରିବେ ସବୁଠୁ ସଂଘର୍ଷପୂର୍ଣ୍ଣ ମ୍ୟାଚ । ଦୁଇ ପାରମ୍ପରିକ ପ୍ରତିଦ୍ବନ୍ଦୀ ଭାରତ ଓ ପାକିସ୍ତାନ ମଧ୍ୟରେ ହେବାକୁ ଯାଉଛି ହାଇଭୋଲଟେଜ ଟକ୍କର । 19 ବର୍ଷରୁ କମ ବିଶ୍ବକପ ସେମିଫାଇନାଲରେ ମୁହାଁମୁହିଁ ହୋଇଛନ୍ତି ଭାରତ-ପାକିସ୍ତାନ।
କ୍ବାର୍ଟର ଫାଇନାଲରେ ଅଷ୍ଟ୍ରେଲିଆକୁ ହରାଇ ସେମିରେ ସ୍ଥାନ ପକ୍କା କରିଛି ଭାରତୀୟ ଦଳ । ଏହାପରେ ପାକିସ୍ତାନ, ଆଫଗାନିସ୍ତାନକୁ ହରାଇ ସେମିରେ ପ୍ରବେଶ କରିଛି । 19 ବର୍ଷରୁ କମ ବିଶ୍ବକପର ଗତ ସଂସ୍କରଣର ଚମ୍ପିଆନ ରହିଥିଲା ଜୁନିୟର ଟିମ ଇଣ୍ଡିଆ । ଏଥିସହିତ ମୋଟ 4ଥର ଚମ୍ପିଆନ ହୋଇସାରିଛି ଦଳ । ଅନ୍ୟପଟେ ପାକିସ୍ତାନ 2004 ଓ 2006 19 ବର୍ଷରୁ କମ ବିଶ୍ବକପରେ ଚମ୍ପିଆନ ହୋଇଥିଲା ।
ମ୍ୟାଚ ପୂର୍ବରୁ ପାକିସ୍ତାନ ବ୍ୟାଟ୍ସମ୍ୟାନ ମହମ୍ମଦ ହୁରାଇରା ପ୍ରତିକ୍ରିୟା ରଖିଛନ୍ତି । ହୁରାଇରା କହିଛନ୍ତି ପାକିସ୍ତାନ ଏହି ମ୍ୟାଚକୁ ଏକ ସାଧାରଣ ମ୍ୟାଚ ଭାବି ଖେଳିବ । ଆଫଗାନିସ୍ତାନ ବିପକ୍ଷରେ ପାକିସ୍ତାନ ପକ୍ଷରୁ ବିଜୟର ହିରୋ ରହିଥିଲେ ମହମ୍ମଦ ହୁରାଇରା । 76 ବଲରୁ 64 ରନର ମ୍ୟାଚ ବିଜୟୀ ଇଂନିସ ଖେଳିଥିଲେ ହୁରାଇରା ।
