ହାଇଦ୍ରାବାଦ: ଭାରତରେ ଦିବା-ରାତ୍ର ଟେଷ୍ଟ ମ୍ୟାଚ ପରେ ଏବେ ଅଷ୍ଟ୍ରେଲିଆରେ ଭାରତ ପିଙ୍କ୍ ଟେଷ୍ଟ ମ୍ୟାଚ ଖେଳିବା ନେଇ ଆଶା ପୋଷଣ କରିଛନ୍ତି ପୂର୍ବତନ ଅଷ୍ଟ୍ରେଲିଆ ସ୍ପିନର ଶେନ ୱାର୍ନ । ଆସନ୍ତା ବର୍ଷ ବିରାଟ ବାହିନୀ ଅଷ୍ଟ୍ରେଲିଆରେ ମ୍ୟାଚ ଖେଳିବା ନେଇ ଆଶା କରିଛନ୍ତି ସେ । ଭାରତ ବନାମ ବାଂଲାଦେଶ ଦ୍ବିତୀୟ ଟେଷ୍ଟ ମ୍ୟାଚ ଶୁକ୍ରବାର କୋଲକାତାରେ ଆରମ୍ଭ ହୋଇଛି । ଉଭୟ ଟିମ ପ୍ରଥମ ଥର ପାଇଁ ଗୋଲାପି ବଲରେ ଖେଳୁଛନ୍ତି । ଏହି ଦିବା-ରାତ୍ର ମ୍ୟାଚ ପାଇଁ ୱାର୍ନ କୋହଲି ଓ ଗାଙ୍ଗୁଲିଙ୍କୁ ଶୁଭେଚ୍ଛା ଜଣାଇଛନ୍ତି ।
ବିସିସିଆଇ ଅଧ୍ୟକ୍ଷ ସୌରଭ ଗାଙ୍ଗୁଲିଙ୍କ ଏକ ଟ୍ବିଟର ଜବାବ ଦେଇ ୱାର୍ନ ଲେଖିଛନ୍ତି ଯେ, ‘ଆପଣଙ୍କୁ ଓ କୋହଲିଙ୍କୁ ଦିବା-ରାତ୍ର ଟେଷ୍ଟ ଖେଳିବା ପାଇଁ ରାଜି ହୋଇଥିବାରୁ ଅନେକ ଶୁଭେଚ୍ଛା । ମୁଁ ଆଶା କରୁଛି ଯେ ଏଡିଲେଡରେ ପୁଣି ଥରେ ଟିମ ଦିବା-ରାତ୍ର ଟେଷ୍ଟ ଖେଳିବ । ଏହା ଖୁବ ଶାନଦାର ହେବ ।’
ଇଂଲଣ୍ଡର ପୂର୍ବତନ ଅଧିନାୟକ ମାଇକେଲ ଭନ ମଧ୍ୟ ଏନେଇ ପ୍ରତିକ୍ରିୟା ରଖିଛନ୍ତି । ଭନ କହିଛନ୍ତି ଯେ, ‘ସାବାସ ସୌରଭ । ଆଶା କରୁଛି ଯେ ଆସନ୍ତା ଶୀତରେ ଅଷ୍ଟ୍ରେଲିଆରେ ମଧ୍ୟ ଦିବା-ରାତ୍ର ମ୍ୟାଚ ଖେଳିବ ଭାରତୀୟ ଟିମ’ । ଆସନ୍ତା ବର୍ଷ ନଭେମ୍ବରରେ ଅଷ୍ଟ୍ରେଲିଆ ଗସ୍ତ କରିବ ଭାରତୀୟ ଟିମ । ଯେଉଥିରେ 4 ମ୍ୟାଚ ବିଷିଷ୍ଟ ସିରିଜ ରହିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
