କଟକ: ମହିଳା ସିନିୟର ଟି-20 ଟ୍ରଫିରେ ଓଡ଼ିଶାର ପରାଜୟ । ନାଗପୁରରେ ଖେଳାଯାଉଥିବା ଏହି ଟୁର୍ଣ୍ଣାମେଣ୍ଟରେ ଓଡିଶାକୁ 6 ୱିକେଟରେ ପରାସ୍ତ କରିଛି ବିଦର୍ଭ । ଟସ ଜିତି ପ୍ରଥମେ ବ୍ୟାଟିଙ୍ଗ ନିଷ୍ପତ୍ତି ନେଇଥିଲା ଓଡିଶା । ତେବେ ନିର୍ଧାରିତ 20 ଓଭରରେ 9ୱିକେଟ ହରାଇ ମାତ୍ର 76 ରନରେ ସୀମିତ ରହିଥିଲା ।
ଦଳ ପକ୍ଷରୁ ଓପନର ମାଧୁରୀ ମେହେଟ୍ଟା ସର୍ବାଧିକ 49 ରନର ପାଳି ଖେଳିଥିଲେ । ଏହାପରେ ଓଡିଶା ଘୋର ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇଥିଲା । ଅଧିନାୟିକା ମଧୁସ୍ମିତା ବେହେରା 7 ରନ କରି ଆଉଟ ହୋଇଥିଲେ । ତେବେ ଅନ୍ୟ କୌଣସି ବ୍ୟାଟ୍ସମ୍ୟାନ ଦୁଇ ଅଙ୍କ ସ୍କୋର ଛୁଇଁ ପାରି ନଥିଲେ ।
77 ରନର ବିଜୟ ଲକ୍ଷ୍ୟକୁ 14ତମ ଓଭରରେ 4ୱିକେଟ ହରାଇ ଜିତି ନେଇଛି ବିଦର୍ଭ । ଦଳ ପକ୍ଷରୁ ବୈଷ୍ଣବୀ ଉଦୟ ଖଣ୍ଡକର ସର୍ବାଧିକ 35 ଓ ଦିଶା ଦୀପକ କସତ 20 ରନ କରି ଦଳକୁ ବିଜୟ ଭେଟି ଦେଇଥିଲେ ।ଏହି ପରାଜୟ ପରେ ଗ୍ରୁପ-ବି ରେ 8 ପଏଣ୍ଟ ସହ ପଞ୍ଚମ ସ୍ଥାନରେ ରହିଛି ଓଡ଼ିଶା । 6ଟି ମ୍ୟାଚ ଖେଳି ଏଯାବତ 2 ଟି ବିଜୟ ଓ 4ଟି ରେ ପରାଜୟର ସାମ୍ନା କରିଛି ଓଡିଶା ।
କଟକରୁ ପ୍ରଭୁକଲ୍ୟାଣ ପାଲ, ଇଟିଭି ଭାରତ
