ହାଇଦ୍ରାବାଦ: ଭାରତୀୟ କ୍ରିକେଟ ଟିମର ପୂର୍ବତନ ଅଧିନାୟକ ମହେନ୍ଦ୍ର ସିଂହ ଧୋନିଙ୍କ ଅବସର ନେଇ ଚର୍ଚ୍ଚା ହେଉଥିବା ବେଳେ ଟିମର ମୁଖ୍ୟ କୋଚ ରବି ଶାସ୍ତ୍ରୀ କହିଛନ୍ତି ଯେ ଧୋନିଙ୍କ ଟି-20 କ୍ୟାରିଅର ଏବେ ବି ଉଜ୍ଜୀବିତ ଅଛି । ଶାସ୍ତ୍ରୀ ଏକ ସାକ୍ଷାତକାରରେ କହିଛନ୍ତି ଯେ ଟିମକୁ ଦୁଇ ଦୁଇ ଥର ବିଶ୍ବ ବିଜେତା କରାଇଥିବା ଅଧିନାୟକ କେବେ ବି ନିଜକୁ ଟିମ ଉପରେ ଲଦି ଦେଇ ନାହନ୍ତି ।
ରବି ଶାସ୍ତ୍ରୀ କହିଛନ୍ତି , ‘ଧୋନିଙ୍କ ଟି-20 କ୍ୟାରିଅର ସମାପ୍ତ ହୋଇ ନାହିଁ । ସେ ଆଇପିଏଲରେ ଖେଳିବେ । ଧୋନିଙ୍କ ବିଷୟରେ ଗୋଟିଏ କଥା ସ୍ପଷ୍ଟ କରି ଦେଉଛି ଯେ ସେ କେବେ ବି ନିଜକୁ ଟିମ ଉପରେ ଲଦି ଦେଇ ନାହାନ୍ତି । ଯଦି ତାଙ୍କୁ ଲାଗେ ଯେ ସେ ଆଉ ଖେଳି ପାରିବେ ନାହିଁ, ଟେଷ୍ଟ କ୍ରିକେଟ ଭଳି ସେ ନିଜେ ହିଁ କହି ଦେବେ ଯେ ମୁଁ ଯଥେଷ୍ଟ କ୍ରିକେଟ ଖେଳି ସାରିଛି । କିନ୍ତୁ ଯଦି ସେ ଆଇପିଏଲରେ ଶ୍ରେଷ୍ଠ ପ୍ରଦର୍ଶନ କରନ୍ତି ତେବେ ଆଗକୁ ମଧ୍ୟ ଟି-20 ଖେଳିବେ ।
ଏଥିରୁ ଏକ ପ୍ରକାର ନିଶ୍ଚିତ ହୋଇଛି ଯେ ଚଳିତ ବର୍ଷ ଅକ୍ଟୋବରରୁ ଅଷ୍ଟ୍ରେଲିଆ ଠାରେ ଖେଳାଯିବାକୁ ଥିବା ଟି-20 ବିଶ୍ବକପରେ ଭାରତୀୟ ଟିମରେ ଖେଳିବେ ଧୋନି । ତେବେ 2019 ଜୁଲାଇ ଠାରୁ ଧୋନି କୌଣସି ଅନ୍ତର୍ଜାତୀୟ ମ୍ୟାଚ ଖେଳି ନାହାଁନ୍ତି, କିନ୍ତୁ ସେ ଅବସର ନେବା ନେଇ ସିଧାସଳଖ କୌଣସି ପ୍ରତିକ୍ରିୟା ମଧ୍ୟ ଦେଇ ନାହାଁନ୍ତି । ଏମିତିରେ ସେ ଯଦି ଟି-20 ବିଶ୍ବକପ ଖେଳନ୍ତି ତେବେ ତାଙ୍କ ଅନୁଭବ ଟିମ ପାଇଁ ବେଶ ଲାଭ ଦାୟକ ହେବ ।
ଆଇପିଏଲରେ ତାଙ୍କ ଖେଳିବାକୁ ବିଶ୍ବକପର ପ୍ରସ୍ତୁତି ବୋଲି ମନେ କରାଯାଉଛି । ତେବେ ଏହା ପୂର୍ବରୁ ନ୍ୟୁଜିଲାଣ୍ଡ ଗସ୍ତରେ ଧୋନିଙ୍କ ଚୟନ ହେଉଛି ନା ନାହିଁ ସେନେଇ ବେଶ ଉତ୍ସାହିତ ଅଛନ୍ତି ମାହିଙ୍କ ଫ୍ୟାନ୍ସ ।
ବ୍ୟୁରୋ ରିପୋର୍ଟ, ଇଟିଭି ଭାରତ
