ନୂଆଦିଲ୍ଲୀ: କ୍ରିକେଟ ମହାସମର ପାଇଁ ପ୍ରସ୍ତୁତ ଭାରତୀୟ ଯୋଦ୍ଧା । ଏନେଇ ଇସାରା ଦେଇଛନ୍ତି ଭାରତୀୟ ପେସ ବୋଲର ମହମ୍ମଦ ଶାମି । ଶାମି କହିଛନ୍ତି, "ଆଗାମୀ ବିଶ୍ବକପରେ ମୋ ୟର୍କର ତାର ଜଲୱା ଦେଖାଇବାକୁ ଯାଉଛି ।" ତେବେ ଏକ ଜାତୀୟ ଗଣମାଧ୍ୟମକୁ ସାକ୍ଷାତକାର ଦେଇ ଶାମି ଏମିତି କହିଛନ୍ତି ।
ଶାମି ପୁଣି କହିଛନ୍ତି, " ଇଂଲଣ୍ଡର ଫ୍ଲାଟ ପିଚ୍ ବ୍ୟାଟ୍ସମ୍ୟାଙ୍କ ପାଇଁ ଭୂସ୍ବର୍ଗ ସାଜିବ । ମାତ୍ର ବୋଲର ମଧ୍ୟ କିଛି କମରେ ନାହାଁନ୍ତି । ମୁଁ ମୋର ପୂର୍ବ ନିର୍ଦ୍ଧାରିତ ରଣ କୌଶଳରେ ବୋଲିଂ କରିବି । ମୋ ପାଖରେ ସୁଇଙ୍ଗ ଓ ଗତି ରହିଛି । ତେଣୁ ମୁଁ ମୋର ଫର୍ମକୁ ନେଇ ବ୍ୟସ୍ତ ହେଉନାହିଁ । ମୋର ବିଶ୍ବାସ ରହିଛି ଇଂଲଣ୍ଡର ପାଣିପାଗ ମୋତେ ଭଲ ପ୍ରଦର୍ଶନ କରିବାକୁ ସାହାଯ୍ୟ କରିବ ।"
ସୂଚନାଥାଉ କି, 2015 ବିଶ୍ବକପରେ ଶାମି ଭାରତୀୟ ପେସ ବିଭାଗର ନେତୃତ୍ବ ନେଇଥିଲେ । ତେବେ ଏବେ ଯାଏ ଶାମି 63ଟି ଦିନିକିଆ ମ୍ୟାଚ ଖେଳି 113ଟି ୱିକେଟ ଅକ୍ତିଆର କରିଛନ୍ତି । ତାଙ୍କର ବେଷ୍ଟ ବୋଲିଂ ଫିଗର ରହିଛି 4/35 ।
ତେବେ ବ୍ୟାଟ୍ସମ୍ୟାନଙ୍କୁ ଚେତାବନୀ ଦେଇ ସାମି କହିଛନ୍ତି, "ମୋ ପାଖରେ ମୋ ବ୍ରହ୍ମାସ୍ତ୍ର- ମୋ ୟର୍କର ରହିଛି । ଯାହାକୁ ମୁଁ ବିଶ୍ବକପରେ ବିପୁଳ ପରିମାଣରେ ବ୍ୟବହାର କରିବି । ଯାହାକି ବ୍ୟାଟ୍ସମ୍ୟାନଙ୍କ ପାଇଁ ନର୍କ ସାଜିବ ।"
ବ୍ୟୁରୋ ରିପୋର୍ଟ, ଇଟିଭି ଭାରତ
