ନୂଆଦିଲ୍ଲୀ: ପୂର୍ବତନ କୋଚ୍ ଗ୍ୟାରୀ କିର୍ଷ୍ଟନ, ଯାହାଙ୍କ ଅଧୀନରେ ଭାରତ 2011 ବିଶ୍ବକପ ଜିତିଥିଲା, ସଚିନ ତେନ୍ଦୁଲକରଙ୍କ କାର୍ଯ୍ୟଶ ଶୈଳୀକୁ ପ୍ରଶଂସା କରି ତାଙ୍କୁ ସହଜ କ୍ରିକେଟର ବୋଲି କହିଥିଲେ। କିର୍ଷ୍ଟନ ସ୍ବୀକାର କରିଛନ୍ତି ଯେ 2008 ରୁ 2011 ମଧ୍ୟରେ ଭାରତୀୟ କ୍ରିକେଟ ଦଳର ପ୍ରଶିକ୍ଷକ ଭାବରେ କାର୍ଯ୍ୟ କରିବା ତାଙ୍କ କ୍ୟାରିୟରର ଅନ୍ୟତମ ସ୍ମରଣୀୟ ସ୍ମୃତି ଅଟେ ଏବଂ ସେ ତାଙ୍କ କୋଚିଂ ସମୟରେ ଜଣେ ଯୁବ ବିରାଟ କୋହଲିଙ୍କ ନିକଟରେ ବହୁତ ପ୍ରତିବଦ୍ଧତା ଦେଖିଥିବାର ପ୍ରକାଶ କରିଛନ୍ତି । ଏହାସହ ଧୋନିଙ୍କ ଅବସର ନେଇ ମଧ୍ୟ ମତ ରଖିଛନ୍ତି ଗ୍ୟାରୀ ।
“ସଚିନଙ୍କ ସହ କାମ କରିବା ସହଜ ଥିଲା କାରଣ ଜଣେ ବ୍ୟକ୍ତି ଭାବରେ ତାଙ୍କର ଦୃଢ଼ ମୂଲ୍ୟବୋଧ ଅଛି । 2011ରେ ବିରାଟ ଜଣେ ମହାନ ଖେଳାଳି ଥିଲେ ଏବଂ ସେ ବର୍ତ୍ତମାନ ସର୍ବଶ୍ରେଷ୍ଠ ଅଟନ୍ତି ବୋଲି କିର୍ଷ୍ଟନ୍ କହିଛନ୍ତି।
“ମୁଁ ଭାରତୀୟ ଦଳର କୋଚିଂ କରିବାକୁ ଭଲ ପାଉଥିଲି। ଏହା ମୋ ଜୀବନର ସର୍ବୋତ୍ତମ ଦିନ ଥିଲା । ଖେଳାଳିଙ୍କ ସହ ଏହା ଏକ ଚମତ୍କାର ଯାତ୍ରା ଏବଂ ବିଶ୍ବକପର ଅତ୍ୟନ୍ତ ମନଲୋଭା ସ୍ମୃତି । ବିଶ୍ବକପ ଜିତିବା ପାଇଁ ଖେଳାଳିଙ୍କ ଠାରୁ ବହୁତ ଆଶା ଥିଲା ଏବଂ ସେମାନେ ଏହାକୁ ଅବିଶ୍ବସନୀୟ ଭାବରେ ପୂରଣ କରି ଦେଖାଇ ଥିଲେ ।
ଏମଏସ ଧୋନିଙ୍କ ଭବିଷ୍ୟତକୁ ନେଇ କିର୍ଷ୍ଟନ କହିଛନ୍ତି ଯେ ଭାରତର ପୂର୍ବତନ ଅଧିନାୟକ ଭଲ ଭାବରେ ଜାଣନ୍ତି ଯେ କେବେ ତାଙ୍କର ଯିବା ସମୟ । ଗତ ବର୍ଷ ଭାରତ ବିଶ୍ବକପ ହାରିଯିବା ପରେ ଧୋନି ଆଉ ମଇଦାନକୁ ଫେରି ନାହାନ୍ତି ତେଣୁ ଧୋନିଙ୍କ ଅବସର ନେଇ ଚର୍ଚ୍ଚା ସେବେଠାରୁ ଚାଲିଛି । ବହୁ ପୂର୍ବତନ ତଥା ବର୍ତ୍ତମାନର କ୍ରିକେଟର ଅନୁଭବ କରୁଛନ୍ତି ଯେ ଧୋନି ଭାରତୀୟ ଦଳକୁ ଫେରିବା ଆଉ ସମ୍ଭବ ନୁହେଁ, ପରୋକ୍ଷରେ ସୂଚାଇ ଦେଇଛନ୍ତି ଯେ ଭାରତର ପୂର୍ବତନ ଅଧିନାୟକଙ୍କ କ୍ରିକେଟ କ୍ୟାରିୟର ସରିଯାଇଛି । ତଥାପି, ଧୋନିଙ୍କ ଛଡା ଏହି ନିଷ୍ପତ୍ତି ଆଉ କେହି ଠିକ ଭାବେ ନେଇ ପାରିବେନି ବୋଲି କିର୍ଷ୍ଟନ ଅନୁଭବ କରନ୍ତି ।
“ଏମଏସ ଜଣେ ଅବିଶ୍ବସନୀୟ କ୍ରିକେଟର। ବୁଦ୍ଧି, ଶାନ୍ତତା, ଶକ୍ତି, ଆଥଲେଟିକ୍ସ, ଗତି ଏବଂ ଜଣେ ମ୍ୟାଚ୍ ବିଜେତା ତାଙ୍କୁ ଅନ୍ୟମାନଙ୍କଠାରୁ ଅଲଗା କରି ଆଧୁନିକ ଯୁଗର ଶ୍ରେଷ୍ଠ କ୍ରୀଡ଼ାବିତଙ୍କ ମଧ୍ୟରେ ସ୍ଥାନିତ କରେ,’’ ବୋଲି କିର୍ଷ୍ଟନ କହିଛନ୍ତି । ସେ ନିଜ ସର୍ତ୍ତ ଅନୁଯାୟୀ ଖେଳ ଛାଡିବାର ଅଧିକାର ହାସଲ କରିଛନ୍ତି ଏବଂ ସେହି ସମୟ କେବେ ଆସିବ ତାହା ତାଙ୍କୁ କେହି ଜଣାଇବା ଉଚିତ ନୁହେଁ। ”
