ମେଲବୋର୍ଣ୍ଣ: ଟିମ ଇଣ୍ଡିଆ କ୍ୟାପଟେନ ବିରାଟ କୋହଲିଙ୍କୁ ଭେଟେରାନ ଅଷ୍ଟ୍ରେଲିଆ ସ୍ପିନର ଲାଥନ ଲାୟନଙ୍କ ପ୍ରଶଂସା । ଲାୟନ କହିଛନ୍ତି କୋହଲି ଜଣେ ସୁପରଷ୍ଟାର । ପରିସ୍ଥିତି ଆବଶ୍ୟକତାଙ୍କୁ କୋହଲି ଭଲଭାବେ ପଢିପାରନ୍ତି । ତେବେ ଆଗାମୀ ଭାରତ-ଅଷ୍ଟ୍ରେଲିଆ ସିରିଜ ରୋମାଞ୍ଚକର ହେବ ବୋଲି ସେ ଆଶାବାଦୀ ଅଛନ୍ତି ଲାୟନ ।
ଚଳିତ ବର୍ଷ ଶେଷ ଭାଗରେ ଭାରତର ଅଷ୍ଟ୍ରେଲିଆ ଗସ୍ତ ରହିଛି । ଏହି ଗସ୍ତରେ ବିରାଟବାହୀନି କଙ୍ଗାରୁ ଟିମ ବିପକ୍ଷରେ 4ଟି ଟେଷ୍ଟ ଖେଳିବାର ସୂଚୀ ରହିଛି । ତେବେ କୋରୋନା ଭାଇରସ ସଂକ୍ରମଣକୁ ଦୃଷ୍ଟିରେ ରଖି ଏହି ଟେଷ୍ଟ ସିରିଜ ବିନା ଦର୍ଶକରେ ଖେଳାଯିବା ନେଇ ଆଶା କରାଯାଉଛି । ତେବେ ଏପରି ହେଲେ ବିରାଟ କୋହଲି ଖାଲି ଷ୍ଟାଡିୟମରେ କିପରି ଅଷ୍ଟ୍ରେଲିଆ ବୋଲରଙ୍କୁ ସାମ୍ନା କରୁଛନ୍ତି ତାହା ଉପରେ ସମସ୍ତଙ୍କ ନଜର ରହିବ ।
2018-19ରେ ଭାରତୀୟ ଦଳ ଅଷ୍ଟ୍ରେଲିଆ ଗସ୍ତ କରିଥିଲା । ଏହି ଗସ୍ତରେ ପ୍ରଥମ ଥର ଅଷ୍ଟ୍ରେଲିଆ ମାଟିରେ ଘରୋଇ ଦଳକୁ ହରାଇ ଇତିହାସ ରଚିଥିଲା ଟିମ ଇଣ୍ଡିଆ ।
