ଶାରଜାହ: ଶୁକ୍ରବାର ଖେଳାଯିବ ଆଇପିଏଲ 2020 ଟୁର୍ଣ୍ଣାମେଣ୍ଟର 23ତମ ମ୍ୟାଚ । ପ୍ରଦର୍ଶନ ନେଇ ସଂଘର୍ଷ କରୁଥିବା ଷ୍ଟିଭ ସ୍ମିଥଙ୍କ ରାଜସ୍ଥାନ ରୟାଲ୍ସକୁ ଭେଟିବ ଶକ୍ତିଶାଳୀ ଦିଲ୍ଲୀ କ୍ୟାପିଟାଲ୍ସ । ଶାରଜାହ କ୍ରିକେଟ ଷ୍ଟାଡିୟମରେ ଖେଳାଯିବ ଏହି ମ୍ୟାଚ ।
5ଟି ମ୍ୟାଚ ଖେଳି ଦିଲ୍ଲୀ 4ଟିରେ ବିଜୟୀ ହୋଇଛି । ଫଳରେ 8 ପଏଣ୍ଟ ସହ ପଏଣ୍ଟ ଟେବୁଲର 2ୟ ସ୍ଥାନରେ ରହିଛି । ଅନ୍ୟପଟେ ରାଜସ୍ଥାନ 5ଟି ମ୍ୟାଚରୁ 4 ପଏଣ୍ଟ ହାସଲ କରି ପଏଣ୍ଟ ଟେବୁଲର 7ମ ସ୍ଥାନରେ ରହିଛି ।
ଦିଲ୍ଲୀ ସଫଳତାର କାରଣ ରହିଛି ଦଳଗତ ପ୍ରଦର୍ଶନ । ଯୁବ ଓ ଅଭିଜ୍ଞ ଖେଳାଳିକୁ ନେଇ ଟିମ ସନ୍ତୁଳିତ ନଜର ଆସିଥିବା ବେଳେ, କ୍ରିକେଟର ସମସ୍ତ ବିଭାଗରେ ପ୍ରଭାବୀ ପ୍ରଦର୍ଶନ କରିଛି । ପୃଥ୍ବୀ ଶ, ଶିଖର ଧାୱନ, କ୍ୟାପଟେନ ଶ୍ରେୟସ ଆୟର, ଋଷଭ ପନ୍ତ, ମାର୍କସ ଷ୍ଟୋଇନିସ ବ୍ୟାଟରେ କରିସ୍ମା ଦେଖାଇଛନ୍ତି । ରୟାଲ ଚ୍ୟାଲେଞ୍ଜର୍ସ ବିପକ୍ଷରେ ଶେଷ ମ୍ୟାଚ ଖେଳିଥିଲା ଦିଲ୍ଲୀ । ଷ୍ଟୋଇନିସ ନିମ୍ନ କ୍ରମରେ ବ୍ୟାଟିଂ ଆସି 26 ବଲରୁ ଅପରାଜିତ 53 ରନର ଇଂନିସ ଖେଳି ଟିମକୁ ସମ୍ମାନଜନକ ସ୍କୋରରେ ପହଞ୍ଚାଇବା ସହ ବିଜୟରେ ପ୍ରମୁଖ ଭୁମିକା ନିଭାଇଥିଲେ ।
ବୋଲିଂ ବିଭାଗରେ କାଗିସୋ ରବାଡା ଟିମର ସର୍ବାଧିକ ୱିକେଟ ହାସଲକାରୀ ବୋଲର ସାବ୍ୟସ୍ତ ହୋଇଛନ୍ତି । ଅନରିଚ ନର୍ଟଜେ ମଧ୍ୟ ଡେଥ ଓଭରରେ ଘାତକ ସାବ୍ୟସ୍ତ ହୋଇଛନ୍ତି । ତେବେ ଷ୍ଟାର ସ୍ପିନର ଅମିତ ମିଶ୍ର ଆହତ କାରଣରୁ ବାଦ ପଡିବା ପରେ, ଟିମ ପାଇଁ ସାମାନ୍ୟ ଚିନ୍ତାର କାରଣ ହୋଇପାରେ । ମାତ୍ର ରବିଚନ୍ତ୍ରନ ଅଶ୍ବିନୀ ଓ ଅକ୍ସର ପଟେଲ ମିଶ୍ରଙ୍କ ସ୍ଥାନ ପୂରଣ କରିପାରନ୍ତି । ରାଜସ୍ଥାନ ରୟାଲ୍ସ ବିପକ୍ଷରେ ପୁନଃ ଏହି ଯୋଡି କମାଲ କରିପାରନ୍ତି ।
ଅନ୍ୟପଟେ ରାଜସ୍ଥାନର ବ୍ୟାଟିଂ ଲାଇନଅପ ଷ୍ଟିଭ ସ୍ମିଥ, ସଞ୍ଜୁ ସାମସନ ଓ ଜସ ବଟଲରଙ୍କ ଉପରେ ନିର୍ଭର କରୁଛି । ସ୍ପିଡଷ୍ଟାର ଜୋଫ୍ରା ଆର୍ଚରଙ୍କ ଉପରେ ବୋଲିଂ ବିଭାଗ ମଧ୍ୟ ନିର୍ଭର କରିବ ।
