ଦୁବାଇ: ଚଳିତ ଆଇପିଏଲ ସଂସ୍କରଣରେ ଚତୁର୍ଥ ବିଜୟ ହାସଲ କରିଛି ଚେନ୍ନାଇ ସୁପର କିଙ୍ଗ୍ସ। ଖରାପ ପ୍ରଦର୍ଶନ ନେଇ ଚର୍ଚ୍ଚାରେ ଥିବା ଚେନ୍ନାଇ, ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ବିପକ୍ଷରେ ବହୁ ପ୍ରତିକ୍ଷିତ ବିଜୟ ହାସଲ କରିଛି ।
146 ରନର ବିଜୟ ଲକ୍ଷ୍ୟକୁ ପିଛା କରିଥିବା ଚେନ୍ନାଇ 18.4 ଓଭରରେ ହାସଲ କରିନେଇଛି । ଓପନର ଋତୁରାଜ ଗାଏକ୍ବାଡ 51 ବଲରୁ 4ଚୌକା ଓ 3 ଛକା ସହାୟତାରେ ମ୍ୟାଚ ବିଜୟୀ 65 ରନର ଇଂନିସ ଖେଳିଛନ୍ତି ।
ଏଥିସହ ଶେଷ ପର୍ଯ୍ୟନ୍ତ ଅପରାଜିତ ରହି ସିଏସକେକୁ ବିଜୟୀ କରାଇଛନ୍ତି । ଫାଫ ଡୁପ୍ଲେସିସ 25, ଅମ୍ବାତି ରାୟୁଡୁ 39 ଓ କ୍ୟାପଟେନ ମହେନ୍ଦ୍ର ସିଂ ଧୋନି 19 ରନର ଯୋଗଦାନ କରିଛନ୍ତି । ଆରସିବି ପକ୍ଷରୁ କ୍ରିସ ମୋରିସ ଓ ୟୁଜଭନ୍ଦ୍ରେ ଚହଲଙ୍କୁ ଗୋଟିଏ ଲେଖାଏଁ ୱିକେଟ ମିଳିଛି । ଫଳରେ ଆରସିବିକୁ 8 ୱିକେଟରେ ହରାଇଛି ସିଏସକେ ।
ପୂର୍ବରୁ କ୍ୟାପଟେନ ବିରାଟ କୋହଲିଙ୍କ ଅର୍ଦ୍ଧଶତକ ବଳରେ ବାଙ୍ଗାଲୋର 145 ରନ କରିପାରିଥିଲା । ଭେଟରାନ ଡି ଭିଲିୟର୍ସ 36 ବଲରୁ 39 ରନର ଇଂନିସ ଖେଳିଥିଲେ । ଅଲରାଉଣ୍ଡର ସାମ କରନ ପୁନର୍ବାର ଚେନ୍ନାଇ ପାଇଁ ଦମଦରା ପ୍ରଦର୍ଶନ ସହ 3ଟି ୱିକେଟ ଦଖଲ କରିଥିଲେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
