ସିଡନୀ: ଅମ୍ପାୟରଙ୍କୁ ଅନୁଚିତ ବ୍ୟବହାର ପାଇଁ ଅଷ୍ଟ୍ରେଲିଆ କ୍ୟାପଟେନ ଟିମ ପେନ ଦଣ୍ଡିତ । ପେନଙ୍କ ମ୍ୟାଚ ଫିର 15 ପ୍ରତିଶତ ଜୋରିମାନା ଆକାରରେ କାଟିଛି ଆଇସିସି । ଭାରତ ବିପକ୍ଷ ତୃତୀୟ ଟେଷ୍ଟରେ ଅଷ୍ଟ୍ରେଲୀୟ କ୍ୟାପଟେନ ଆଦର୍ଶ ଆଚରଣ ବିଧି ଲେଭଲ 2ର ନିୟମର ଉଲ୍ଲଙ୍ଘନ କରିଥିବା ଆଇସିସି ପକ୍ଷରୁ କୁହାଯାଇଛି ।
ପେନ ଆଇସିସିର ଆଦର୍ଶ ଆଚରଣ ବିଧିର 2.8 ଧାରାର ନିୟମର ଉଲ୍ଲଙ୍ଘନ କରିଛନ୍ତି । ଅନ୍ତର୍ଜାତୀୟ ମ୍ୟାଚରେ ଅମ୍ପାୟରଙ୍କ ନିଷ୍ପତ୍ତି ନାଖୁସ ଜାହିର କରିବା ସହ ଅନୁଚିତ ବ୍ୟବହାର ପାଇଁ ଏହି ଧାରା ରହିଛି ।
ଏଥିସହ ଗୋଟିଏ ଡିମେରିଟ ପଏଣ୍ଟ ପେନଙ୍କ ଶୃଙ୍ଖଳା ରୋକର୍ଡରେ ଯୋଡି ହୋଇଛି । 24ମାସର ସମୟରେ ଏହା ପେନଙ୍କ ପ୍ରଥମ ଅପରାଧ ବୋଲି କୁହାଯାଇଛି ।
ଚେତେଶ୍ବର ପୂଜାରାଙ୍କୁ ବିପକ୍ଷରେ ଏକ ଆଉଟ ପାଇଁ ଅପିଲ କରିବା ପରେ ଅମ୍ପାୟର ସହମତି ପ୍ରକାଶ କରିନଥିଲେ । ପରେ ପେନ ଏଥିରେ ଅମ୍ପାୟରଙ୍କ ପ୍ରତି ନାଖୁସ ଜାହିର କରିଥିଲେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
