ଆଡିଲେଡ: ଭାରତ-ଅଷ୍ଟ୍ରେଲିଆ ମଧ୍ୟରେ ଖେଳାଯିବାକୁ ଥିବା ବହୁ ପ୍ରତିକ୍ଷିତ ବର୍ଡର ଗାଭାସ୍କର ଟ୍ରଫି ପାଇଁ ଆରମ୍ଭ ହୋଇଛି କାଉଣ୍ଟଡାଉନ । ସିରିଜର ପ୍ରଥମ ଟେଷ୍ଟ ଆଡିଲେଡରେ ଦିବାରାତ୍ର ମ୍ୟାଚ ହେବ । ଏହି ମ୍ୟାଚ ପାଇଁ ଅଷ୍ଟ୍ରେଲିଆ ସ୍କ୍ବାଡରେ ମାର୍କସ ହାରିସ ସାମିଲ ହୋଇଛନ୍ତି । ଏନେଇ ଶନିବାର ଅଷ୍ଟ୍ରେଲିଆ କ୍ରିକେଟ ବୋର୍ଡ(ସିଏ) ପକ୍ଷରୁ ସ୍ପଷ୍ଟ କରାଯାଇଛି ।
ପ୍ରଥମ ଟେଷ୍ଟରେ ଡେଭିଡ ୱାର୍ଣ୍ଣର ଓ ୱିଲ ପୁକୋଭସ୍କି ଚୟନ ପାଇଁ ଉପଲବ୍ଧ ନଥିବାରୁ ହାରିସଙ୍କ ସ୍ଥାନ ପକ୍କା ହୋଇଛି ।
ସିଡନିରେ ଖେଳାଯାଇଥିବା ଭାରତ ବିପକ୍ଷ ଦ୍ବିତୀୟ ଦିନିକିଆରେ ଫିଲ୍ଡିଂ ସମୟରେ ଆହତ ହୋଇଥିଲେ ୱାର୍ଣ୍ଣର । ଅନ୍ୟପଟେ ପୁକୋଭସ୍କି ଅଭ୍ୟାସ ମ୍ୟାଚରେ ଆହତ ହୋଇଥିଲେ । ଉଭୟ ବ୍ୟାଟ୍ସମ୍ୟାନ ବକ୍ସିଂ ଡେ ଟେଷ୍ଟରେ ଟିମକୁ ଫେରିବାକୁ ଲକ୍ଷ୍ୟ ରଖିଛନ୍ତି । ଏନେଇ ଅଷ୍ଟ୍ରେଲିଆର ଜାତୀୟ ଚୟନକର୍ତ୍ତା ଟ୍ରେଭର ହର୍ଣ୍ଣସ ଏକ ଅଫିସିଆଲ ଘୋଷଣାନାମାରେ ସୂଚନା ଦେଇଛନ୍ତି ।
ହାରିସ ଗତ ବର୍ଷ ଇଂଲଣ୍ଡ ବିପକ୍ଷ ଆସେସ ସିରିଜରେ ଅଷ୍ଟ୍ରେଲିଆ ସ୍କ୍ବାଡର ପ୍ରମୁଖ ସଦସ୍ୟ ଥିଲେ । ଡିସେମ୍ବର 17ରେ ଆଡିଲେଡରେ ଭାରତ ଅଷ୍ଟ୍ରେଲିଆ ମଧ୍ୟରେ ପ୍ରଥମ ଟେଷ୍ଟ ଖେଳାଯିବ ।
ବ୍ୟୁରୋ ରିପୋର୍ଟ, ଇଟିଭି ଭାରତ
