ସିଡନୀ: ଶେଷ ପର୍ଯ୍ୟନ୍ତ ଲଢେଇ ସତ୍ତ୍ବେ 3ୟ ଟି-20ରେ ଭାରତ ପରାସ୍ତ । ଅଧାରେ ରହିଗଲା ସିରିଜ କ୍ଳିନ ସୁଇପ୍ ଆଶା । 187ରନର ବିଜୟ ଲକ୍ଷ୍ୟକୁ ପିଛା କରିଥିବା ଭାରତୀୟ ଦଳ 174ରେ ଅଟକିଯାଇଥିଲା । କ୍ୟାପଟେନ ବିରାଟ କୋହଲି 61 ବଲରୁ 4 ଚୌକା ଓ 3 ଛକା ସହାୟତାରେ 85 ରନର ଇଂନିସ ଖେଳିଥିଲେ ।
ମାତ୍ର ଦଳକୁ ବିଜୟୀ କରାଇପାରିନଥିଲେ । ଶିଖର ଧାୱନ 28 ଓ ହାର୍ଦ୍ଦିକ ପାଣ୍ଡ୍ୟା 20 ରନର ଇଂନିସ ଖେଳିଥିଲେ । ତେବେ ଲୋକେଶ ରାହୁଲ ଓ ଶ୍ରେୟସ ଆୟର ଶୂନରେ ଆଉଟ ହେଇ ନିରାଶ କରିଥିଲେ । ଫଳରେ ବିଜୟ ଠାରୁ 13 ରନ ଦୂରରେ ରହିଯାଇଥିଲା ଭାରତ ।
ସମସ୍ତ ଅଷ୍ଟ୍ରେଲୀୟ ବୋଲର ମାପଚୁପି ବୋଲିଂ କରିଥିଲେ । ମିଚେଲ ସୁଇପସନ 4 ଓଭରରେ 23 ରନ ବ୍ୟୟରେ 3ଟି ୱିକେଟ ହାସଲ କରିବା ସହ ସଫଳତମ ବୋଲର ରହିଥିଲେ । ଗ୍ଲେନ ମାକ୍ସୱେଲ, ସିନ ଆବଟ୍ଟ, ଆଣ୍ଡିୟୁ ଟାଇ ଓ ଆଡାମ ଜାମ୍ପା ଗୋଟିଏ ଲେଖାଏଁ ୱିକେଟ ଅକ୍ତିଆର କରିଥିଲେ । ପ୍ରଭାବୀ ବୋଲିଂ ପାଇଁ ସୁଇପସନ ପ୍ଲେଆର ଅଫ ଦ ମ୍ୟାଚ ହୋଇଥିଲେ । ହାର୍ଦ୍ଦିକ ପାଣ୍ଡ୍ୟା ମ୍ୟାନ ଅଫ ଦ ସିରିଜ ହୋଇଛନ୍ତି ।
ପୂର୍ବରୁ ମାଥ୍ୟୁ ୱେଡଙ୍କ 53 ବଲରୁ 80 ଓ ମାକ୍ସୱେଲଙ୍କ 36 ବଲରୁ 54 ରନ ବଳରେ ଭାରତ ସାମ୍ନାରେ ଅଷ୍ଟ୍ରେଲିଆ 186 ରନର ବିଜୟ ଲକ୍ଷ୍ୟ ରଖିଥିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
