ହାଇଦ୍ରାବାଦ: ଆଇସିସି ଟି-20 ବିଶ୍ବକପ 2020ର ଭାଗ୍ୟ ଆସନ୍ତାକାଲି ସ୍ପଷ୍ଟ ହୋଇଯିବ । ଜୁନ 10ରେ (ଆସନ୍ତାକାଲି) ଅନ୍ତର୍ଜାତୀୟ କ୍ରିକେଟ ପରିଷଦର ଗୁରୁତ୍ବପୂର୍ଣ୍ଣ ବୈଠକ ରହିଛି । ଏହି ବୈଠକରେ ଫଟାଫଟ କ୍ରିକେଟର ଏହି ମେଗା ଇଭେଣ୍ଟର ଭାଗ୍ୟ ନିର୍ଣ୍ଣୟ ହେବ । ପୂର୍ବ ନିର୍ଦ୍ଧାରିତ ସୂଚୀ ଅନୁଯାୟୀ ବିଶ୍ବକପ ଖେଳାଯିବ କିମ୍ବା ଆସନ୍ତାବର୍ଷକୁ ସ୍ଥଗିତ ହେବ ଏନେଇ ସ୍ପଷ୍ଟ ଘୋଷଣା ହେବ ।
ଆସନ୍ତାକାଲି ହେବାକୁ ଥିବା ବୈଠକରେ ମୁଖ୍ୟତଃ 5ଟି ବିଷୟରେ ନିଷ୍ପତ୍ତି ହେବାର ସମ୍ଭାବନା ରହିଛି ।
ଟି-20 ବିଶ୍ବକପ, ଆଇସିସି ଚେୟାରମ୍ୟାନ ନିର୍ବାଚନ, ଫ୍ୟୁଚର ଟୁର ପ୍ରୋଗ୍ରାମ (FTP), ବିସିସିଆଇ ଟ୍ୟାକ୍ସ ବିବାଦ ଓ ଆଇସିସି ସିଇଓଙ୍କ ରିପୋର୍ଟ ।
ବର୍ତ୍ତମାନର ଆଇସିସି ଚେୟାରମ୍ୟାନ ଶଶାଙ୍କ ମନୋହର ନିଜର କାର୍ଯ୍ୟକାଳ ବୃଦ୍ଧି ନେଇ ଅରାଜି ହୋଇଛନ୍ତି । ଫଳରେ ପରବର୍ତ୍ତୀ ଚେୟାରମ୍ୟାନ ନିର୍ବାଚନ ନେଇ ଘୋଷଣା ହେବାର ସମ୍ଭାବନା ରହିଛି । ସେଥିପାଇଁ ଆସନ୍ତାକାଲି ଅନୁଷ୍ଠିତ ହେବାକକୁ ଥିବା ଆଇସିସି ବୈଠକ ଉପରେ, ସମସ୍ତ କ୍ରିକେଟ ବୋର୍ଡ ଓ କ୍ରିକେଟ ଦୁନିଆର ନଜର ରହିଛି ।
