ନୂଆଦିଲ୍ଲୀ: ଧୋନିଙ୍କ ଦୁଇ ଅସ୍ତ୍ର କୁହାଯାଉଥିବା ଯୁବରାଜ ସିଂ ଓ ସୁରେଶ ରାଇନଙ୍କ ମଧ୍ୟରେ ଫାଟ । 2011 ବିଶ୍ବକପ ବିଜୟୀ ଦଳରେ ପୂର୍ବତନ ଅଧିନାୟକଙ୍କ ଦୁଇ ଅସ୍ତ୍ର ଥିଲେ ଏହି ଦୁଇ ବାମହାତୀ ବ୍ୟାଟ୍ସମ୍ୟାନ । ମାତ୍ର ରବିବାର ପୂର୍ବତନ ଖେଳାଳି ଯୁବରାଜ ସିଂ ଏକ ଜାତୀୟ ଗଣମାଧ୍ୟମକୁ ଦେଇଥିବା ସାକ୍ଷାତକାରରେ ଏହା ସ୍ପଷ୍ଟ ବାରି ହେଉଛି ଯେ, ରାଇନ-ଧୋନିଙ୍କ ଉପରେ ଖପ୍ପା ଅଛନ୍ତି ଯୁବି ।
ଭାରତର ପୂର୍ବତନ ଅଲରାଉଣ୍ଡର ଯୁବରାଜ ସିଂ କହିଛନ୍ତି ଯେ, ବ୍ୟାଟ୍ସମ୍ୟାନ୍ ସୁରେଶ ରାଇନା ଜଣେ ଏମିତି ଖେଳାଳି ଯାହାଙ୍କୁ ମହେନ୍ଦ୍ର ସିଂ ଧୋନି ଭାରତୀୟ ଦଳର ଅଧିନାୟକ ଥିବା ସମୟରେ ବହୁତ ସମର୍ଥନ କରିଥିଲେ । ଯୁବରାଜ ଶ୍ରୀଲଙ୍କା ବିପକ୍ଷରେ ଫାଇନାଲ ପୂର୍ବରୁ ରାଇନା ଏବଂ ୟୁସୁଫ ପଠାନଙ୍କ ମଧ୍ୟରେ ଚୟନ ଦ୍ବନ୍ଦ୍ବ ବିଷୟରେ କହିଥିଲେ, ‘‘ସେତେବେଳେ ସୁରେଶ ରାଇନାଙ୍କର ବେଶ ଫ୍ୟାନ ଫଲୋଇଂ ରହିଥିଲା । କାରଣ ତାଙ୍କ ପଛରେ ସବୁ ସମୟରେ ଧୋନିଙ୍କ ସମର୍ଥନ ଥିଲା । ପ୍ରତ୍ୟେକ ଅଧିନାୟକଙ୍କ ଦଳରେ ଜଣେ ଜଣେ ପ୍ରିୟ ଖେଳାଳିଥାନ୍ତି । ମୋତେ ଲାଗଛି ରାଇନାଙ୍କ ଦଳରେ ଲଗାତର ସ୍ଥାନ ପାଇବା ପଛରେ ଧୋନିଙ୍କ ସମର୍ଥନ ରହିଛି । ’’
ସେ ଆହୁରୀ କହିଛନ୍ତି ‘‘ ୟୁସୁଫ ପଠାନ ମଧ୍ୟ ସେତେବେଳେ ଭଲ ପ୍ରଦର୍ଶନ କରୁଥିଲେ ଏବଂ ମୁଁ ମଧ୍ୟ ଭଲ ପ୍ରଦର୍ଶନ କରୁଥିଲି ଏବଂ ୱିକେଟ୍ ମଧ୍ୟ ନେଉଥିଲି । କିନ୍ତୁ ରାଇନା ସେତେବେଳେ ଭଲ ଫର୍ମରେ ନଥିଲେ । ସେତେବେଳେ ସେମାନଙ୍କର ବାମହାତୀ ସ୍ପିନର ନଥିଲେ ଏବଂ ମୁଁ ୱିକେଟ୍ ନେଉଥିଲି ତେଣୁ ସେମାନେ ତାଙ୍କ ପାଖରେ କୌଣସି ବିକଳ୍ପ ନଥିଲା । ’’
ସୂଚନାଥାଉ କି, ଧୋନି ଦଳର ଅଧିନାୟକ ଭାବରେ ଥିବା ସମୟରେ ରାଇନା ଭାରତୀୟ ଦଳରେ ଜଣେ ନିୟମିତ ଖେଳାଳି ଥିଲେ । କିନ୍ତୁ ବିରାଟ କୋହଲି ଜାନୁଆରୀ 2017 ରେ ଅଧିନାୟକ ପଦ ପାଇଲା ପରେ ତାଙ୍କ ଅନ୍ତର୍ଜାତୀୟ ଦଳରେ ଚୟନ କମ ହୋଇଯାଇଛି । ରାଇନାଙ୍କ ଶେଷ ପ୍ରଦର୍ଶନ ଜୁଲାଇ 2018 ରେ ଇଂଲଣ୍ଡ ବିପକ୍ଷରେ ଦିନିକିଆ ଥିଲା । ସେହିପରି ତାଙ୍କ ଶେଷ ଟେଷ୍ଟ୍ 2014/15 ଅଷ୍ଟ୍ରେଲିଆ ବିପକ୍ଷରେ ଥିଲା | ଯେଉଁଥିରେ ଧୋନି ଦୀର୍ଘତମ ଫର୍ମାଟରୁ ଅବସର ନେଇଥିଲେ ।
