ନୂଆଦିଲ୍ଲୀ: ଭାରତୀୟ କ୍ରିକେଟ ଦଳର ପୂର୍ବତନ ଅଧିନାୟକ ସୁନୀଲ ଗାଭାସ୍କର ନାସିର ହୁସେନଙ୍କ କଥାକୁ ଗ୍ରହଣ କରିନାହାଁନ୍ତି ଯେ ସୌରଭ ଗାଙ୍ଗୁଲି ଦଳର ଅଧିନାୟକ ଦାୟିତ୍ବ ଗ୍ରହଣ କରିବା ପୂର୍ବରୁ ଭାରତ ଏକ ‘ସରଳ’ ଦଳ ଥିଲା । ଗତ ସପ୍ତାହରେ ଇଂଲଣ୍ଡର ପୂର୍ବତନ ଅଧିନାୟକ ହୁସେନ କ୍ରିକେଟ କନେକ୍ଟେଡ ସୋ ସମୟରେ କହିଥିଲେ ଯେ ଗାଙ୍ଗୁଲିଙ୍କୁ ଅଧିନାୟକ ଭାବେ ନିଯୁକ୍ତି ଭାରତକୁ ଅଧିକ କଠୋର ଓ ସଶକ୍ତ କରିଥିଲା ଏବଂ ପରେ ଭାରତ ବିଦେଶରେ ଅଧିକ ମ୍ୟାଚ ଜିତିବା ଆରମ୍ଭ କରିଥିଲା ।
ତେବେ ଏହାର ଜବାବରେ ଭାରତର ପୂର୍ବତନ ଅଧିନାୟକ ସୁନୀଲ ଗାଭାସ୍କର ମିଡ-ଡେ ପାଇଁ ନିଜ ସ୍ତମ୍ଭରେ ଲେଖିଛନ୍ତି ଯେ, ନାସିର କହିଥଲେ ପୂର୍ବରୁ ଦଳ ବିରୋଧୀଙ୍କୁ ଶୁଭକାମନା ଜଣାଉଥିଲା ଓ ତାଙ୍କୁ ଦେଖି ହସୁଥିଲେ ମଧ୍ୟ । ଏହି ଧାରଣାକୁ ଦେଖନ୍ତୁ: ଯଦି ଆପଣ ସରଳ ଓ ଭଲ ତେବେ ଆପଣ ଦୁର୍ବଳ ଅଟନ୍ତି। ଯେପର୍ଯ୍ୟନ୍ତ ଆପଣ ବିରୋଧୀଙ୍କ ସାମ୍ନାରେ ନଥିବେ, ଆପଣ କଠୋର ନୁହଁନ୍ତି । ସେ କହୁଛନ୍ତି ଯେ ସଚିନ ତେନ୍ଦୁଲକର, ରାହୁଲ ଦ୍ରାବିଡ, ବିରେନ୍ଦ୍ର ସେହୱାଗ, ଭିଭିଏସ ଲକ୍ଷ୍ମଣ, ଅନିଲ କୁମ୍ବଲେ, ହରଭଜନ ସିଂ ଆଦି ଖେଳାଳି କଠୋର ନଥିଲେ ?
ଯେହେତୁ ସେମାନେ ପାଟି କରୁନଥିଲେ, ଶପଥ କରୁନଥିଲେ, ଚିତ୍କାର କରୁନଥିଲେ, ଅଶ୍ଳୀଳ ଇଙ୍ଗିତରେ ହାତ ଉଠାଉନଥିଲେ ଓ ସରଳତାର ସହ କେବଳ ନିଜ କାମ କରୁଥିଲେ, ତେବେ ସେମାନେ କଣ ଦୁର୍ବଳ ଥିଲେ ?
1975-76 ମସିହାରେ ଗାଭାସ୍କରଙ୍କୁ ଭାରତୀୟ ଦଳର ଅଧିନାୟକ ଭାବରେ ନିଯୁକ୍ତ କରାଯାଇଥିଲା ଏବଂ ସେବେଠାରୁ କପିଲ ଦେବ, ଜି ବିଶ୍ବନାଥ, ଦିଲୀପ ଭେଙ୍ଗସରକାର, କ୍ରିଷ୍ଣମାଚାରୀ ଶ୍ରୀକାନ୍ତ, ମହମ୍ମଦ ଆଝାରୁଦ୍ଦିନ, ସଚିନ ତେନ୍ଦୁଲକରଙ୍କ ପରି ଭାରତୀୟ କ୍ରିକେଟର ସର୍ବକାଳୀନ ମହାନ ବ୍ୟକ୍ତିଙ୍କୁ ନେଇ ଦେଶର ନେତୃତ୍ବ ନେବାର ସୁଯୋଗ ପ୍ରଦାନ କରାଯାଇଥିଲା। 1983 ମସିହାରେ କପିଲ ଦେବ ଭାରତକୁ ନିଜର ପ୍ରଥମ ବିଶ୍ବକପ ଜିତିବାର ଦୁଇ ବର୍ଷ ପରେ ଗାଭାସ୍କରଙ୍କ ଅଧୀନରେ ଭାରତ 1985ରେ ଅଷ୍ଟ୍ରେଲିଆରେ କ୍ରିକେଟ ବିଶ୍ବ ଚାମ୍ପିଅନସିପ ଜିତିଥିଲେ।
ଗାଭାସ୍କର ତାଙ୍କ ମନ୍ତବ୍ୟ ପାଇଁ ହୁସେନଙ୍କୁ ନିନ୍ଦା କରିଥିଲେ ଏବଂ 2000 ମସିହାରେ ଗାଙ୍ଗୁଲିଙ୍କୁ ଅଧିନାୟକ ଭାବରେ ନିଯୁକ୍ତ ହେବା ପୂର୍ବରୁ ଭାରତୀୟ ଦଳ ବିଷୟରେ ହୁସେନଙ୍କ ଜ୍ଞାନ ଉପରେ ପ୍ରଶ୍ନ କରିଥିଲେ ।
