ନୂଆଦିଲ୍ଲୀ: ୱେଷ୍ଟଇଣ୍ଡିଜ ଅଲରାଉଣ୍ଡର ଡ୍ବାଏନ ବ୍ରାଭୋ ଏମଏସ ଧୋନିଙ୍କ ଅଧିନାୟକତ୍ବର ଖୁବ ପ୍ରସଂଶା କରିଛନ୍ତି । ଚେନ୍ନାଇ ସୁପର କିଙ୍ଗ୍ସ କ୍ୟାମ୍ପରେ ଭାରତର ପୂର୍ବତନ ଅଧିନାୟକ କିପରି ତାଙ୍କ ଚାରିପାଖରେ ଥିବା ଲୋକଙ୍କୁ ଖୁବ ସହଜ ଅନୁଭବ କରାଇଥାନ୍ତି ତାହା କହିଛନ୍ତି ବ୍ରାଭୋ ।
2011 ମସିହାରୁ ସିଏସକେରେ ଧୋନିଙ୍କ ସହ ଖେଳୁଥିବା ବ୍ରାଭୋ କହିଛନ୍ତି ଯେ ଏତେ ସଂଖ୍ୟକ ଅନ୍ତର୍ଜାତୀୟ ଅଧିନାୟକ ଥାଇ ମଧ୍ୟ ଧୋନି ଅନ୍ୟମାନଙ୍କ ଅପେକ୍ଷା ଭିନ୍ନ । ଯାହାର କାରଣ ହେଉଛି ସେ ଯେଭଳି ଭାବରେ ତାଙ୍କ ଖେଳାଳିଙ୍କ ପାଇଁ ଏକ ଭିନ୍ନ ପରିବେଶ ସୃଷ୍ଟି କରନ୍ତି ।
‘‘ବର୍ଷ ବର୍ଷ ଧରି ସିଏସକେର ଡ୍ରେସିଂ ରୁମରେ ଅନେକ ଭଲ ଅଧିନାୟକ ରହିଛନ୍ତି । ଫାଫ୍ ଡୁ ପ୍ଲେସିସ୍, ବ୍ରାଣ୍ଡନ୍ ମ୍ୟାକକୁଲମ, ମୁଁ ନିଜେ, ମାଇକ ହସି । ଏମାନେ ବିଭିନ୍ନ ଦେଶର ନେତୃତ୍ବ ନେଇ ଆସିଛନ୍ତି, କିନ୍ତୁ ଏମଏସ ଏମିତି ଜଣେ ବ୍ୟକ୍ତି ଯିଏ ସବୁବେଳେ କୁହନ୍ତି, ‘‘ତୁମେ ଭଲ ଖେଳୁଛ ବୋଲି ତୁମେ ଏଠାରେ ଅଛ, ତୁମକୁ କାହାରିକୁ କିଛି ପ୍ରମାଣ ଦେବାର ଆବଶ୍ୟକତା ନାହିଁ । ତୁମେ କ’ଣ କରିପାରିବ ତାହା ଫ୍ରାଞ୍ଚାଇଜ ଦେଖେ ଓ ଜାଣେ । କେବଳ ନିଜ ପ୍ରଦର୍ଶନ ଜାରି ରଖ,’’ ବ୍ରାଭୋ ଏକ ଭିଡିଓ ଚାଟରେ କହିଛନ୍ତି ।
“ଯେତେବେଳେ ବି ଜଣେ ଖେଳାଳି ସିଏସକେକୁ ଆସେ, ତାଙ୍କ କ୍ୟାରିୟର ଯେପରି ପୁନର୍ବାର ଜନ୍ମ ହୋଇଥାଏ । କିଛି ବର୍ଷ ପୂର୍ବେ ଆସିଥିବା ସେନ ୱାଟସନଙ୍କୁ ଦେଖନ୍ତୁ, ମୁମ୍ବାଇ ଛାଡିବା ପରେ ଅମ୍ବାତି ରାୟୁଡୁଙ୍କୁ ଦେଖନ୍ତୁ । ସିଏସକେକୁ ଯେଉଁ ଖେଳାଳି ଆସେ ତାର କ୍ୟାରିୟରର ଗ୍ରାଫ ବଦଳି ଯାଏ ।
ଦୁଇଥର ପର୍ପଲ କ୍ୟାପ ଜିତିଥିବା ବ୍ରାଭୋ, ଧୋନିଙ୍କ ଆଚରଣ ଏବଂ ଖେଳାଳିଙ୍କ ଉପରେ ତାଙ୍କର ଆତ୍ମବିଶ୍ବାସ ସିଏସକେରେ କିପରି ସବୁ ସହଜ କରିଥାଏ ତାହା କହିଥିଲେ ।
“ଏମଏସ କାହା ଉପରେ ଚାପ ପକାନ୍ତି ନାହିଁ । କ୍ରିକେଟ୍ ବାହାରେ, ଆପଣ ତାଙ୍କୁ କ୍ବଚିତ ଦେଖିବାକୁ ପାଇବେ । କିନ୍ତୁ ତାଙ୍କ ରୁମ ସର୍ବଦା ଖୋଲା ରହିଥାଏ, ଆପଣ ଯେକୌଣସି ସମୟରେ ସେଠାକୁ ଯାଇପାରିବେ । ତାଙ୍କ ସହ କଥାବାର୍ତ୍ତା କରିପାରିବେ । ତାଙ୍କ ସହ କଥାବାର୍ତ୍ତା କରିବାକୁ ଖୁବ ଭଲଲାଗେ । ସେ ଏମିତି ପରିବେଶ ସୃଷ୍ଟି କରନ୍ତି ଯେଉଁଠାରେ ଯେକେହି ଖୁବ ଆରାମଦାୟକ ଅନୁଭବ କରିବ । ଏତେ ସଫଳତା ଓ ପ୍ରସଂଶା ପାଇବା ସତ୍ତ୍ବେ ସେ କେବେ ହେଲେ ସୁପରଷ୍ଟାର ଭଳି ଆଚରଣ କରନ୍ତି ନାହିଁ,’’ ବୋଲି କହିଛନ୍ତି ବ୍ରାଭୋ ।
