ମାଞ୍ଚେଷ୍ଟର: ତିନି ମ୍ୟାଚ ବିଶିଷ୍ଟ ସିରିଜର ପ୍ରଥମ ଟେଷ୍ଟରେ ଚାରି ୱିକେଟରେ ପରାଜୟର ସମ୍ମୁଖୀନ ହେବା ପରେ ଇଂଲଣ୍ଡ ଦ୍ବିତୀୟ ମ୍ୟାଚରେ ଇଣ୍ଡିଜ ଉପରେ ଆକ୍ରମଣ କରି ପ୍ରଥମ ଇନିଂସରେ 469 ରନ ସଂଗ୍ରହ କରିଥିଲା । ଓଲ୍ଡ ଟ୍ରାଫର୍ଡରେ ଟସ୍ ଜିତିବା ପରେ ଜେସନ୍ ହୋଲ୍ଡରଙ୍କ ନେତୃତ୍ବାଧୀନ ୱେଷ୍ଟଇଣ୍ଡିଜ ପ୍ରଥମ ଟେଷ୍ଟରେ ବୋଲିଂ ଆକ୍ରମଣର ପୁନରାବୃତ୍ତି ଆଶାରେ ଆୟୋଜକଙ୍କୁ ବ୍ୟାଟିଂ ପାଇଁ ଆମନ୍ତ୍ରିତ କରିଥିଲା ।
ତେବେ ଡୋମ ସିବିଲି (120) ଏବଂ ବେନ ଷ୍ଟୋକ୍ସ (176)ଙ୍କ ବିଚକ୍ଷଣ ପାଳି ବଳରେ ଇଂଲଣ୍ଡ ୱେଷ୍ଟଇଣ୍ଡିଜ୍ ବୋଲିଂ ଫୋର୍ସକୁ ଧରାଶାୟୀ କରି ସ୍କୋର ବୋର୍ଡରେ 469/9 ରନ ଲଗାଇ ପାଳି ଘୋଷଣା କରିଥିଲା । ୱେଷ୍ଟଇଣ୍ଡିଜ ଏହାର ଉତ୍ତରରେ 287 ରନ କରି ଅଲ ଆଉଟ ହୋଇଥିଲା ।
କ୍ରିକେଟ କାର୍ଯ୍ୟକଳାପ ବ୍ୟତୀତ, ଏହି ସିରିଜ କୋଭିଡ-19 ମହାମାରୀ ମଧ୍ୟରେ ଅନ୍ତର୍ଜାତୀୟ କ୍ରିକେଟ ପ୍ରତ୍ୟାବର୍ତ୍ତନକୁ ମଧ୍ୟ ଚିହ୍ନିତ କରିଥିଲା ଏବଂ ଆଇସିସି ଦ୍ବାରା ଦିଆଯାଇଥିବା ନିୟମ ଅନୁଯାୟୀ ମ୍ୟାଚ ପରିଚାଳିତ ହୋଇଛିଲା । ଆଇସିସିର ନିୟମ ମାନଙ୍କ ମଧ୍ୟରେ ସବୁଠାରୁ ଅଧିକ ଚର୍ଚ୍ଚାରେ ରହିଥିଲା ବଲରେ ଛେପର ବ୍ୟବହାର ମନା ହୋଇଥିଲା ।
ତେବେ ଏହି ମ୍ୟାଚରେ ସ୍ପଷ୍ଟ ହୋଇଥିଲା ଯେ ଖେଳାଳି ବର୍ତ୍ତମାନ ମଧ୍ୟ କୋଭିଡ-19 ନିୟମ ସହ ଖେଳିବା ନେଇ ସ୍ବାଭାବିକ ହୋଇ ପାରି ନାହାନ୍ତି । ଚତୁର୍ଥ ଦିନ ମ୍ୟାଚରେ ମଧ୍ୟାହ୍ନ ଭୋଜନ ପୂର୍ବରୁ ଦେଖିବାକୁ ମିଳିଥିଲା ଡୋମ ସିବିଲି ବଲରେ କିଛି ଛେପ ଲଗାଇ ଦେଇଥିଲେ । ଯାହାପରେ ଇଂଲଣ୍ଡ ଖେଳାଳି ଏନେଇ ଅମ୍ପାୟାରଙ୍କୁ ସୂଚୀତ କରିଥିଲେ । ମାଇକେଲ ଗୋଗ ଏକ ସାନିଟାଇଜଡ୍ ଟିସୁ ଖୋଲି ବଲର ଉଭୟ ପାର୍ଶ୍ବରେ ଘଷିଲେ। ଏହା ଦେଖି ମନେ ହେଉଛି, ବଲକୁ ଚମକାଇବା ପାଇଁ ଛେପର ବ୍ୟବହାର କରିବାର ଅଭ୍ୟାସ ଖେଳାଳିଙ୍କ ମନରୁ ଯିବା ପାଇଁ କିଛି ସମୟ ଲାଗିବ । ଖେଳାଳିମାନେ ଛେପ ନିଷେଧ ନିୟମ ଉଲଙ୍ଘନ କରିବା କ୍ଷେତ୍ରରେ, ପାଞ୍ଚ ରନ୍ ପେନାଲ୍ଟି ଲାଗୁ ହେବା ପୂର୍ବରୁ ଦୁଇଟି ଚେତାବନୀ ଦିଆଯାଏ ।
