ଲକ୍ଷ୍ନୌ: ଦକ୍ଷିଣ ଆଫ୍ରିକା ବିରୋଧରେ ବିଜୟ ପରେ ଉତ୍ସବମୁଖର ଭାରତୀୟ ମହିଳା କ୍ରିକେଟ ଦଳ। ଏଭଳି ଏକ ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଭାରତ ଓ ଦକ୍ଷିଣ ଆଫ୍ରିକା ମଧ୍ୟରେ ହୋଇଥିବା ଦ୍ବିତୀୟ ଦିନିକିଆ ମ୍ୟାଚରେ ଭାରତୀୟ ମହିଳା ଦଳ ଜବରଦସ୍ତ ବିଜୟ ହାସଲ କରିଛି। ଦକ୍ଷିଣ ଆଫ୍ରିକାକୁ 9 ୱିକେଟରେ ମାତ ଦେଇଥିଲା ଦଳ।
ହୋଟେଲ ରୁମରେ ଭାରତୀୟ କ୍ରିକେଟର ବିଜୟ ଉତ୍ସବରେ ନାଚୁଥିବା ଭିଡିଓ ଏବେ ଭାଇରାଲ ହେବାକୁ ଲାଗିଛି। ମହିଳା କ୍ରିକେଟର ବେଦା କୃଷ୍ଣମୂର୍ତ୍ତୀ ଏହି ଭିଡିଓ ନିଜ ଇନଷ୍ଟାଗ୍ରାମ ଆକାଉଣ୍ଟରେ ସେୟାର କରିଛନ୍ତି। ଯେଉଁଥିରେ 4 ଭାରତୀୟ ମହିଳା ଖେଳାଳି ଖୁସିରେ ନାଚୁଥିବା ଦେଖିବାକୁ ମିଳିଛି। ଭିଡିଓରେ ବେଦା କୃଷ୍ଣମୂର୍ତ୍ତୀଙ୍କ ସହ ରହିଛନ୍ତି ଆକାଂକ୍ଷା କୋହଲି, ବି.ଆର ବନିଥା ଓ ମମତା ମାବେନ। ଏହି ନୃତ୍ୟ ଭିଡିଓକୁ ଫ୍ୟାନମାନେ ଖୁବ ପସନ୍ଦ କରୁଛନ୍ତି।
ଭାରତ ସହ 5ଟିକିଆ ଦିନିକିଆ ମ୍ୟାଚ ସିରିଜ ଖେଳୁଛି ଦକ୍ଷିଣ ଆଫ୍ରିକ ମହିଳା କ୍ରିକେଟ ଦଳ। ପ୍ରଥମ ମ୍ୟାଚରେ ଦକ୍ଷିଣ ଆଫ୍ରିକା ବାଜିମାତ କରିଥିବା ବେଳେ ଦ୍ବିତୀୟ ମ୍ୟାଚରେ ଦକ୍ଷିଣ ଆଫ୍ରିକାକୁ 9 ୱିକଟରେ ହରାଇଛି ଭାରତୀୟ ଦଳ। ଭାରତ ଓ ଦକ୍ଷିଣ ଆଫ୍ରିକା ମଧ୍ୟ ତୃତୀୟ ଦିନିକିଆ ମ୍ୟାଚ ମାର୍ଚ୍ଚ 12 ତାରିଖରେ ଖେଳାଯିବ। ବର୍ତ୍ତମାନ ସୁ୍ଦ୍ଧା ଟସର ଭୁମିକା ଗୁରୁତ୍ବପୂର୍ଣ୍ଣ ରହିଛି। କାରଣ ଯେଉଁ ଟିମ ଟସ ଜିତିଛି ସେହି ଟିମ ମ୍ୟାଚରେ ମଧ୍ୟ ବିଜୟ ଲାଭ କରିଛି।
ବ୍ୟୁରୋ ରିପୋର୍ଟ, ଇଟିଭି ଭାରତ
