ଚେନ୍ନାଇ: ଭାରତ ବିପକ୍ଷ ପ୍ରଥମ ଟେଷ୍ଟରେ ଇଂଲଣ୍ଡର ପ୍ରଭାବୀ ପ୍ରଦର୍ଶନ ଜାରି ରହିଛି । ଅନ୍ୟପଟେ ଚେନ୍ନାଇ ଟେଷ୍ଟର ଦ୍ବିତୀୟ ଦିନର ଶେଷରେ ଏକ ଭିଡିଓ ସାମ୍ନାକୁ ଆସିଛି ଯାହା, କ୍ରିକେଟ ମହଲରେ ହଟଚମଟ ସୃଷ୍ଟି କରିଛି । ଏହି ସମୟର ଏକ ଭିଡିଓ ଭାଇରାଲ ମଧ୍ୟ ହୋଇଛି । ଭିଡିଓରେ ସ୍ପିନର କୁଲଦୀପ ଯାଦବଙ୍କ ଗଳାକୁ ଧରିଛନ୍ତି ଦ୍ରୁତ ବୋଲର ମହମ୍ମଦ ସିରାଜ ।
ଇଂଲଣ୍ଡ ବିପକ୍ଷ ପ୍ରଥମ ଟେଷ୍ଟରେ ଉଭୟ ସିରାଜ ଓ କୁଲଦୀପଙ୍କୁ ଭାରତୀୟ ଚୂଡାନ୍ତ ଏକାଦଶରେ ସ୍ଥାନ ମିଳିନାହିଁ । ସିରାଜ ଅଷ୍ଟ୍ରେଲିଆରେ 3ଟି ମ୍ୟାଚ ଖେଳି ସର୍ବାଧିକ (13 ୱିକେଟ) ୱିକେଟ ଦଖଲକାରୀ ଭାରତୀୟ ବୋଲର ରହିଥିଲେ ।
ସିରାଜଙ୍କ ସ୍ଥାନରେ ଭେଟେରାନ ପେସର ଇଶାନ୍ତ ଶର୍ମାଙ୍କୁ ସ୍ଥାନ ମିଳିଥିବାବେଳେ, କୁଲଦୀପ ଯାଦବଙ୍କ ବଦଳରେ ସାହାବାଜ ନଦୀମଙ୍କୁ ସୁଯୋଗ ମିଳିଛି । କୁଲଦୀପ ଶେଷ ଥର ପାଇଁ ଦୁଇବର୍ଷ ପୂର୍ବେ ସିଡନୀରେ ଖେଳିଥିଲେ ଓ 5 ୱିକେଟ ହାସଲ କରିଥିଲେ । କୁଲଦୀପଙ୍କ ବଦଳରେ ଚେନ୍ନାଇ ଟେଷ୍ଟରେ ନଦୀମଙ୍କୁ ସୁଯୋଗ ମିଳିବା ପରେ ଅନେକ କ୍ରିକେଟପ୍ରେମୀ ବିସ୍ମିତ କରିଥିଲେ ।
ତେବେ ଶନିବାର ଭାଇରାଲ ହୋଇଥିବା ଭିଡିଓରେ ଦୁଇ ଖେଳାଳି ସିରାଜ ଓ କୁଲଦୀପଙ୍କ ମଧ୍ୟରେ କଣ ଘଟିଛି ସ୍ପଷ୍ଟ ହୋଇନାହିଁ । ତେବେ ପରବର୍ତ୍ତୀ ସମୟରେ ଏହା ସାମ୍ନାକୁ ଆସିବାର ସମ୍ଭାବନା ରହିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
