ସୁରଟ: ଚଳିତ ସୟଦ ମୁସ୍ତାକ ଅଲ୍ଲୀ ଟ୍ରଫିରେ ଭାରତୀୟ ବୋଲରଙ୍କ କମାଲ। ହ୍ୟାଟ୍ରିକ୍ ସହ ଗୋଟିଏ ଓଭରରେ 5 ୱିକେଟ ଅକ୍ତିଆର କରିଛନ୍ତି କର୍ଣ୍ଣାଟକ ପେସର ତଥା ପୂର୍ବତନ ଭାରତୀୟ ବୋଲର ଅଭିମନ୍ୟୁ ମିଥୁନ। ଶୁକ୍ରବାର ପ୍ରଥମ ସେମିଫାଇନାଲର ହରିୟାଣା ବିପକ୍ଷ ମ୍ୟାଚରେ ଏହି ରେକର୍ଡର ଅଧିକାରୀ ହୋଇଛନ୍ତି ମିଥୁନ ।
ଏହା ପୂର୍ବରୁ ଚଳିତବର୍ଷ ଅଭିମନ୍ୟୁ ବିଜୟ ହଜାରେ ଟ୍ରଫିରେ ତାମିଲନାଡୁ ବିପକ୍ଷ ମ୍ୟାଚରେ ହ୍ୟାଟ୍ରିକ ୱିକେଟ ନେଇଥିଲେ । 39 ରନ ବ୍ୟୟରେ ସେ 5 ୱିକେଟ ହାତେଇଛନ୍ତି । ସେ ପ୍ରଥମ ଦୁଇଟି ବଲରେ ହରିୟାଣାର ସେଟ ବ୍ୟାଟ୍ସମ୍ୟାନ ହିମାଂଶୁ ରାନା (61) ଓ ରାହୁଲ ତଓ୍ବେତିଆ (32)ଙ୍କୁ ଆୁଟ କରିଥିଲେ । ଏହା ପରେ 3ୟ ବଲରେ ସୁମିତ କୁମାରଙ୍କୁ ଆଉଟ କରି ହ୍ୟାଟ୍ରିକ ପୂରଣ କରିଥିଲେ । ସେହିପରି ଚତୁର୍ଥ ବଲରେ ପ୍ରତିପକ୍ଷ ଅଧିନାୟକ ଅମିତ ମିଶ୍ରାଙ୍କୁ ଓ ୫ମ ବଲ ଓ୍ବାଇଡ ପକାଇବା ପରେ ଏକ ସିଙ୍ଗଲ ରନ୍ ବ୍ୟୟ କରିଥିଲେ । ଓଭରର ୬ଷ୍ଠ ତଥା ଅନ୍ତିମ ବଳରେ ଜୟନ୍ତ ଯାଦବଙ୍କୁ ପ୍ୟାଭେଲିଅନ ବାଟ ଦେଖାଇଥିଲେ ।
