ନୂଆଦିଲ୍ଲୀ: ମାଳଦୀପରୁ ସୁରକ୍ଷିତ ଭାବରେ ସିଡନୀରେ ପହଞ୍ଚିଲେ ଆଇପିଏଲର ଯୋଗ ଦେଇଥିବା ସମସ୍ତ ଅଷ୍ଟ୍ରେଲିଆ ଖେଳାଳି । ଏହାକୁ ନେଇ ବିସିସିଆଇକୁ ଧନ୍ୟବାଦ ଦେଇଛନ୍ତି ଅଷ୍ଟ୍ରେଲିଆ କ୍ରିକେଟ ବୋର୍ଡର ସିଇଓ ନିକ ହକଲି । ଆଇପିଏଲର 14ତମ ସଂସ୍କରଣରେ ଏକାଧିକ ଖେଳାଳି କୋରୋନା ସଂକ୍ରମିତ ହେବାପରେ ଟୁର୍ଣ୍ଣାମେଣ୍ଟକୁ ଅଧାରୁ ସ୍ଥଗିତ କରାଯାଇଥିଲା । ତେବେ ଭାରତରୁ ଅଷ୍ଟ୍ରେଲିଆକୁ ବିମାନ ଯାତ୍ରା ଉପରେ କଟକଣା ଜାରି ହୋଇଥିବାରୁ ଅଷ୍ଟ୍ରେଲିଆ ସମସ୍ତ ଖେଳାଳି ମାଳଦୀପ ଗସ୍ତ କରିଥିଲେ ।
ଆଇପିଏଲରେ ମୋଟ 38 ଜଣ ଅଷ୍ଟ୍ରେଲିଆ ଖେଳାଳି ଓ ସପୋର୍ଟ ଷ୍ଟାଫ ଯୋଗ ଦେଇଥିଲେ । ମାଳଦୀପରେ କ୍ବାରେଣ୍ଟିନ ଅବଧି ଶେଷ କରିଥିଲେ ସମସ୍ତ ଖେଳାଳି । ସେପଟେ ମେ 15 ତାରିଖ ଯାଏଁ ଅଷ୍ଟ୍ରେଲିଆକୁ ବିମାନ ଯାତ୍ରା କଟକଣା ଲାଗିଥିଲା । ଏହି ଅବଧି ଶେଷ ହେବାପରେ ପରେ ଅଷ୍ଟ୍ରେଲିଆ ଯାତ୍ରା କରିଥିଲେ ସମସ୍ତ ଖେଳାଳି । ଏହି ତାଲିକାରେ ଡେଭିଡ ୱାର୍ଣ୍ଣର, ପ୍ୟାଟ କମିନ୍ସ, ଷ୍ଟିଭ ସ୍ମିଥ, ଗ୍ଲେନ ମାକ୍ସୱେଲ ଓ ଚେନ୍ନାଇ ସୁପର କିଙ୍ଗ୍ସର କୋଚ ମାଇକେଲ ହସି ମଧ୍ୟ ସାମିଲ ଥିଲେ ।
