ହାଇଦ୍ରାବାଦ: ଏଜବଷ୍ଟନରେ ଚାଲିଛି ଘରୋଇ ଇଂଲଣ୍ଡ ବିପକ୍ଷ ଭାରତର ଟେଷ୍ଟ ମ୍ୟାଚ । ଗତକାଲି ଇଂଲଣ୍ଡ ଟସ୍ ଜିତି ପ୍ରଥମେ ବୋଲିଂ ପାଇଁ ନିଷ୍ପତ୍ତି ନେଇଥିଲା । ଭାରତକୁ ପ୍ରଥମେ ବ୍ୟାଟିଂ ପାଇଁ ଆମନ୍ତ୍ରଣ କରିଥିଲା ଇଂଲଣ୍ଡ । ଖେଳ ଆରମ୍ଭରୁ ଭାରତ ବିପର୍ଯ୍ୟୟ ବ୍ୟାଟିଂର ସାମନା କରିଥିଲା । ଓପନର ବ୍ୟାଟିଂରେ ବିଫଳ ହେବା ପରେ ମିଡିଲ ଅର୍ଡର ବ୍ୟାଟର ମଧ୍ୟ କ୍ରିଜରେ ତିଷ୍ଠି ପାରିନଥିଲେ । ପରେ ୱିକେଟ କିପର ଋଷଭ ପନ୍ତ ଏବଂ ଅଲରାଉଣ୍ଡର ରବୀନ୍ଦ୍ର ଜାଡେଜାଙ୍କ ପାର୍ଟନରଶିପ ୨୨୨ ରନର ଭାଗୀଦାର ହୋଇ ଦଳକୁ ସ୍କୋର ଅଭିମୁଖେ ନେଇଥିଲେ । ଉଭୟ ଋଷଭ ପନ୍ତ ଏବଂ ରବୀନ୍ଦ୍ର ଜାଡେଜା ଶତକ ହାସଲ କରିଛନ୍ତି ।
ସେହିପରି ଅଧିନାୟକ ଜଶପ୍ରିତ ବୁମରା ମଧ୍ୟ ନିଜର ଅଧିନାୟକ ଦାୟିତ୍ବକୁ ବେଶ ଭଲ ଭାବରେ ତୁଲାଇବାରେ ଲାଗିଛନ୍ତି । ଫାଷ୍ଟ ବୋଲର ଜଶପ୍ରିତ ବୁମରାଙ୍କର ବୋଲିଂ ପ୍ରଦର୍ଶନ ଚମତ୍କାର ରହିଥିବା ବେଳେ ବ୍ୟାଟିଂ ପ୍ରଦର୍ଶନରେ ମଧ୍ୟ ସେ ସମସ୍ତଙ୍କୁ ଚକିତ କରିଦେଇଛନ୍ତି । ଭାରତ ୪୧୬ ରନ କରି ଅଲଆଉଟ ହୋଇଥିବା ବେଳେ ବର୍ତ୍ତମାନ ସୁଦ୍ଧା ଇଂଲଣ୍ଡର ୫ଟି ୱିକେଟ ହାତେଇଛି ଭାରତ । ଯାହା ଫଳରେ ଭାରତ ଏହି ମ୍ୟାଚକୁ ନିୟନ୍ତ୍ରଣକୁ ଆଣିଛି । ଏହି ମ୍ୟାଚରେ ଅଧିନାୟକ ବୁମରା ନିଜର ଫର୍ମ ଜାରି ରଖିଛନ୍ତି । ବ୍ୟାଟିଂର ଶେଷ ଓଭର ଇଂଲଣ୍ଡ ପାଇଁ ମହଙ୍ଗା ସାବ୍ୟସ୍ତ କରିଛନ୍ତି ବୁମରା । ଗୋଟିଏ ଓଭରରେ ୩୫ ରନ ସଂଗ୍ରହ କରି ଟେଷ୍ଟ ଇତିହାସରେ ରେକର୍ଡ କରିଛନ୍ତି ବୁମରା । ସେହିପରି ଭାବରେ ବୋଲିଂ ପ୍ରଦର୍ଶନରେ ମଧ୍ୟ ବୁମରା ନିଜର ଦମଦାର ପ୍ରଦର୍ଶନ ଦେଖାଇଛନ୍ତି । ଏହି ମ୍ୟାଚରେ ବୁମରା ଏପର୍ଯ୍ୟନ୍ତ ୩ ୱିକେଟ ହାତେଇ ସାରିଛନ୍ତି ।
