ହାଇଦ୍ରାବାଦ: ବିସିସିଆଇର ସ୍ବତନ୍ତ୍ର ସାଧାରଣ ବୈଠକ ଶନିବାର ଅନୁଷ୍ଠିତ ହେବ । ଏନେଇ ସଭାପତି ସୌରଭ ଗାଙ୍ଗୁଲି ଶୁକ୍ରବାର ରାତିରେ ମୁମ୍ବାଇ ପହଞ୍ଚିବାର ସୂଚନା ରହିଛି । ବୈଠକ ଭର୍ଚୁଆଲ ମାଧ୍ୟମରେ ଅନୁଷ୍ଠିତ ହେବାକୁଥିଲେ ମଧ୍ୟ ଗାଙ୍ଗୁଲି ମୁମ୍ବାଇରେ ଉପସ୍ଥିତ ରହିବେ ବୋଲି ଜଣାପଡିଛି । ଟି20 ବିଶ୍ବକପ ଆୟୋଜନ, ଅଧାରୁ ସ୍ଥଗିତ ଥିବା ଆଇପିଏଲର 14ତମ ସଂସ୍କରଣର ଅବଶିଷ୍ଟାଂଶ ଓ ଘରୋଇ କ୍ରିକେଟରଙ୍କ ଦରମା ନେଇ ଆଲୋଚନା ହେବାକୁ ଥିବାରୁ ବୈଠକ ବେଶ ଗୁରୁତ୍ବପୂର୍ଣ୍ଣ ରହିଛି ।
ଜୁନ 1ରେ ଆଇସିସିର ବୈଠକ ରହିଛି । ଏହିଦୃଷ୍ଟିରୁ ଆସନ୍ତାକାଲି ବିସିସିଆଇର SGM ଉପରେ ସମସ୍ତଙ୍କ ନଜର ରହିଛି । ସେପ୍ଟେମ୍ବର 15ରୁ ଅକ୍ଟୋବର 15 ମଧ୍ୟରେ ଆଇପିଏଲର ବାକିଅଂଶ ଭାରତରେ ଖେଳାଯିବାକୁ ଯୋଜନା ବିସିସିଆଇର ଯୋଜନା ରହିଛି । ତେବେ ଭାରତରେ କୋଭିଡ-19 ସ୍ଥିତି ଉପରେ ଏହା ନିର୍ଭର କରେ । ଆଇପିଏଲ 2021ର ସଂପୂର୍ଣ୍ଣ ଆୟୋଜନ ଟି20 ବିଶ୍ବକପ ପାଇଁ ସକରାତ୍ମକ ଦିଗ ହେବ ।
ଗତ ଆପେକ୍ସ କାଉନସିଲ ବୈଠକରେ ବିସିସିଆଇ ଟି20 ବିଶ୍ବକପ ପାଇଁ 9ଟି ଭେନ୍ୟୁ ଚୟନ କରିଥିଲା । ଏହାମଧ୍ୟରେ ମୁମ୍ବାଇ, ନୂଆଦିଲ୍ଲୀ, ଚେନ୍ନାଇ, କୋଲକାତା, ବେଙ୍ଗାଲୁରୁ, ହାଇଦ୍ରାବାଦ, ଧର୍ମଶାଳା, ଅହମ୍ମଦାବାଦ ଓ ଲକ୍ଷ୍ନୌ ରହିଥିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
