ହରାରେ: ପାକିସ୍ତାନର ପୂର୍ବତନ କ୍ୟାପଟେନ ୟୁନୁସ ଖାନଙ୍କ ଏକ 8 ବର୍ଷ ତଳର ରେକର୍ଡ ଭାଙ୍ଗିଛନ୍ତି ଆବିଦ ଅଲୀ । କ୍ରିକେଟର ଲମ୍ବା ଫର୍ମାଟରେ ଜିମ୍ବାୱେ ମାଟିରେ ପାକିସ୍ତାନ ବ୍ୟାଟ୍ସମ୍ୟାନ ଭାବେ ସର୍ବାଧିକ ରନ୍ର ରେକର୍ଡ କରିଛନ୍ତି ଆବିଦ ।
ଜିମ୍ବାୱେ ବିପକ୍ଷ ଚଳିତ ଦ୍ବିତୀୟ ଟେଷ୍ଟରେ ଆବିଦ 215 ରନ୍ର ମାରାଥନ ଇଂନିସ ଖେଳିଛନ୍ତି । ଫଳରେ ଏହି ଦ୍ବିଶତକ ତାଙ୍କୁ ଜିମ୍ବାୱେ ମାଟିରେ ପାକିସ୍ତାନ ଖେଳାଳି ଭାବେ ସର୍ବାଧିକ ରନ୍ ରେକର୍ଡର ଅଧିକାରୀ କରାଇଛି । ପୂର୍ବରୁ ପୂର୍ବତନ କ୍ୟାପଟେନ ୟୁନୁସ ଖାନ 2013ରେ ଜିମ୍ବାୱେରେ ଅପରାଜିତ 200 ରନ୍ର ଇଂନିସ ଖେଳିଥିଲେ । ମହମ୍ମଦ ୱାସିମ 1998ରେ ହରାରେ ଗ୍ରାଉଣ୍ଡରେ 192 ରନର ସହ ତାଲିକାର ତୃତୀୟରେ ରହିଛନ୍ତି ।
ପାକିସ୍ତାନ ଜିମ୍ବାୱେ ବିପକ୍ଷ ଦ୍ବିତୀୟ ତଥା ଶେଷ ଟେଷ୍ଟରେ ଦୃଢ ସ୍ଥିତିରେ ରହିଛି । 510/8ରେ ପାଳି ଘୋଷଣା କରିବା ପରେ ଜିମ୍ବାୱେ 52 ରନ୍ରେ 4 ୱିକେଟ ହରାଇ ସଙ୍କଟ ସ୍ଥିତିରେ ରହିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
