ଇସଲାମବାଦ: ଭାରତୀୟ କ୍ରିକେଟର୍ ବିରାଟ କୋହଲିଙ୍କ ପ୍ରଶଂସକ କେବଳ ଭାରତରେ ନୁହେଁ, ସାରା ବିଶ୍ବରେ ରହିଛନ୍ତି । ଏହାର ସଦ୍ୟତମ ଉଦାହରଣ ଦେଖିବାକୁ ମିଳିଛି ପାକିସ୍ତାନର ବାଲୁଚିସ୍ତାନରେ । ଏଠାରେ ବିରାଟ କୋହଲିଙ୍କର ଜଣେ ପ୍ରଶଂସକ କୋହଲିଙ୍କର ଏକ ବାଲୁକା ଚିତ୍ର ପ୍ରସ୍ତୁତ କରିଛନ୍ତି । ସୋସିଆଲ ମିଡିଆରେ ଏହାର ଫଟୋ ଓ ଭିଡିଓ ବେଶ ଭାଇରାଲ ହେବାରେ ଲାଗିଛି । ବିରାଟ କୋହଲିଙ୍କ ଚମତ୍କାର ବାଲୁକା କଳା ତିଆରି କରିଥିବା ଏହି କଳାକାରଙ୍କ ନାମ ହେଉଛି ସଚ୍ଚନ । ସେ ପାକିସ୍ତାନର ବାଲୁଚିସ୍ତାନର ବାସିନ୍ଦା ବୋଲି ଜଣାପଡ଼ିଛି ।
ତେବେ ବିରାଟ କୋହଲିଙ୍କ ପାକିସ୍ତାନୀ ପ୍ରଶଂସକ ସଚ୍ଚନ ତାଙ୍କ ପ୍ରିୟ କ୍ରିକେଟରଙ୍କ ଚିତ୍ର ବାଲି ଉପରେ ଆଙ୍କିବାଥିବା ବେଳେ ଏହାର ଫଟୋ ଓ ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ଯାହାକୁ ସମସ୍ତେ ମଧ୍ୟ ବେଶ ପସନ୍ଦ କରୁଛନ୍ତି । ଏହା ବ୍ୟତୀତ ସୋସିଆଲ ମିଡିଆ ୟୁଜର୍ସ କ୍ରମାଗତ ଭାବରେ ଏହାକୁ ନେଇ ନିଜର ମତାମତ ଦେଉଛନ୍ତି । ଏହା ପୂର୍ବରୁ ଏସିଆ କପ୍ ୨୦୨୩ ମ୍ୟାଚ୍ ବେଳେ ମଧ୍ୟ କିଛି ପାକିସ୍ତାନୀ ପ୍ରଶଂସକ ନିଜ ଦେଶର ନୁହେଁ, ବରଂ କେବଳ ବିରାଟ କୋହଲିଙ୍କ ଖେଳ ଦେଖିବାକୁ ଆସିଥିବା ପ୍ରତିକ୍ରିୟା ରଖିଥିଲେ । ଯାହାର ଭିଡିଓ ମଧ୍ୟ ସାମାଜିକ ଗଣମାଧ୍ୟମରେ ଭାଇରାଲ ହେଉଛି ।
ଏହା ମଧ୍ୟ ପଢ଼ନ୍ତୁ...Asia Cup 2023 Ind vs Pak: ଶାହୀନଙ୍କୁ ପ୍ରଶଂସା ଆଳରେ ଭାରତୀୟ ବ୍ୟାଟରଙ୍କୁ ଟ୍ରୋଲ କଲେ ଶେହବାଜ ଶରିଫ
ପ୍ରକାଶଯୋଗ୍ୟ, ଗତକାଲି(ଶୁକ୍ରବାର) ପାକିସ୍ତାନ ବିପକ୍ଷରେ ଏସିଆ କପ୍ ୨୦୨୩ ଅଭିଯାନ ଆରମ୍ଭ କରିଛି ଭାରତ । ଶ୍ରୀଲଙ୍କାର ପାଲ୍ଲେକଲରେ ଖେଳାଯାଇଥିବା ଏହି ମ୍ୟାଚ୍ର ପ୍ରଥମ ଇନିଂସ ଖେଳାଯିବା ପରେ ବର୍ଷା ପ୍ରଭାବରେ ମ୍ୟାଚ୍କୁ ବାତିଲ କରିଦିଆଯାଇଥିଲା । ଟସ୍ ଜିତିବା ପରେ ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଥିବା ଭାରତର ପ୍ରଦର୍ଶନ ଏତେ ଭଲ ନଥିଲା । ଏହି ମ୍ୟାଚ୍ରେ ବିରାଟ କୋହଲି ମଧ୍ୟ ଭଲ ଖେଳିପାରି ନଥିଲେ । ବିରାଟ କୋହଲି ୭ ମାତ୍ର ବଲରୁ ୪ ରନ୍ ସ୍କୋର କରି ବାମହାତୀ ଦୃତ ବୋଲର ଶାହୀନ ଶାହ ଆଫ୍ରିଦିଙ୍କ ବଲରେ ଆଉଟ୍ ହୋଇଥିଲେ । ଯାହାକୁ ନେଇ ତାଙ୍କୁ ସୋସିଆଲ ମିଡିଆରେ ବହୁତ ସମାଲୋଚନାର ଶିକାର ହେବାକୁ ପଡ଼ିଥିଲା । ଏହାରି ଭିତରେ ଖୋଦ ପାକିସ୍ତାନୀ ପ୍ରଶଂସକଙ୍କ ଏଭଳି ଚିତ୍ରକଳା ସାମ୍ନାକୁ ଆସିବା ପରେ ଏହାକୁ ବେଶ ପସନ୍ଦ କରିଛନ୍ତି ସୋସିଆଲ ମିଡିଆ ୟୁଜର୍ସ ।
ବ୍ୟୁରୋ ରିପୋର୍ଟ, ଇଟିଭି ଭାରତ
