ଟୋକିଓ: କଡା ସଂଘର୍ଷପୂର୍ଣ୍ଣ ମ୍ୟାଚ୍ରେ ବାଜିମାରିଲେ ଭାରତୀୟ ବ୍ୟାଡମିଣ୍ଟନ ଷ୍ଟାର ପିଭି ସିନ୍ଧୁ । ଚଲିତ ଟୋକଓ ଅଲମ୍ପିକରେ ବ୍ୟାଡମିଣ୍ଟନ ମହିଳା ଏକକ ସେମିଫାଇନାଲରେ ପ୍ରବେଶ କରିଛନ୍ତି ସିନ୍ଧୁ । ଜାପାନର ଅକାନେ ୟାମାଗୁଚିଙ୍କୁ କ୍ବାର୍ଟର-ଫାଇନାଲ ମୁକାବିଲାରେ ୨୧-୧୨, ୨୨-୨୦ରେ ହରାଇଲେ ସିନ୍ଧୁ । ୫୬ ମିନିଟ ଧରି ଖେଳାଯାଇଥିବା ଏହି ମ୍ୟାଚରେ ଉଭୟ ଖେଳାଳି ଶ୍ରେଷ୍ଠ ପ୍ରଦର୍ଶନ କରିଥିଲେ । କଡା ଟକ୍କର ଦେଖିବାକୁ ମିଳିଥିଲା ବିଶ୍ବ ବ୍ୟାଡମିଣ୍ଟନର ଦୁଇ ତାରକାଙ୍କ ମଧ୍ୟରେ ।
ପ୍ରଥମ ସେଟ୍କୁ ୨୧-୧୩ ପଏଣ୍ଟ ବ୍ୟବଧାନରେ ଜିତିବା ସହ ବିଜୟ ରାସ୍ତା ସଫା କରିଥିଲେ ସିନ୍ଧୁ । ଅନ୍ୟପଟେ କଡା ପ୍ରତିନ୍ଦ୍ବନ୍ଦ୍ବୀତା ସହ ଗୋଟିଏ ଗୋଟିଏ ପଏଣ୍ଟ ପାଇଁ ସଂଘର୍ଷ କରିଥିଲେ ଘରୋଇ ମାଟିରେ ଖେଳୁଥିବା ଅଲମ୍ପିକ ଆୟୋଜକ ଜାପାନ ଖେଳାଳି ୟାମାଗୁଚି । ଦ୍ବିତୀୟ ସେଟ୍ରେ ସିନ୍ଧୁଙ୍କ ବିଜୟ ସହଜ ହେବ ବୋଲି ଅନୁମାନ କରାଯାଉଥିଲା । ମାତ୍ର ସମସ୍ତଙ୍କୁ ଭୁଲ ପ୍ରମାଣିତ କରିଥିଲେ ୟାମାଗୁଚି । ଅଧିକ ଆକ୍ରମଣାତ୍ମକ ରଣନୀତିରେ ଖେଳିବା ସହ ପରାଜିତ ହେବାକୁ ପ୍ରସ୍ତୁତ ନୁହଁନ୍ତି ବୋଲି ଦର୍ଶାଇଥିଲେ । ଏକ ସମୟରେ ୧୨-୬ରେ ଆଗୁଥିବା ସିନ୍ଧୁଙ୍କୁ ୧୮-୨୦ରେ ପଛରେ ପକାଇଥିଲେ ୟାମାଗୁଚି । ତେବେ ଶେଷ ହସ ହସିଥିଲେ ସିନ୍ଧୁ । ୨୦-୨୦ରେ ସ୍କୋର ବରାବର ରହିଥିବାବେଳେ ଅତି ଚତୁରତାର ସହ ମ୍ୟାଚ ପଏଣ୍ଟ ହାସଲ କରିଥିଲେ ସିନ୍ଧୁ । ୨୨-୨୦ରେ ବିଜୟୀ ହୋଇ ସେମିଫାଇନାଲ ଟିକେଟ ହାସଲ କରିଥିଲେ ।
କ୍ବାର୍ଟର ମୁକାବିଲାର ଦ୍ବିତୀୟ ସେଟ୍ରେ ଅବିଶ୍ବସନୀୟ ୫୪ଟି ସଟ୍ ଅବିରତ ଉଭୟ ସିନ୍ଧୁ ଓ ୟାମାଗୁଚି ଖେଳିଥିଲେ ଓ ଏହା ୧ ମିନିଟ ୨ ସେକେଣ୍ଡ ସମୟ ନେଇଥିଲା । କେତେ ସଂଘର୍ଷପୂର୍ଣ୍ଣ ଥିଲା ଏହି ମ୍ୟାଚ ଏହା ବୟାନ କରୁଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
