ନୂଆଦିଲ୍ଲୀ: କେଟୀ ଇରଫାନଙ୍କ ବଡ ସଫଳତା। ରବିବାର ଜାପାନର ନୋମୀ ଠାରେ ଆୟୋଜିତ ହୋଇଥିବା ଏସିଆନ୍ ରେସ୍ ଓ୍ବାକିଙ୍ଗ୍ ଚାମ୍ପିୟନସିପରେ ଇରଫାନ 20କି.ମି ଇଭେଣ୍ଟରେ 4ର୍ଥ ସ୍ଥାନ ହାସଲ କରିଛନ୍ତି। ଏହାପରେ ସେ 2020ରେ ହେବାକୁ ଥିବା ଟୋକିଓ ଅଲମ୍ପିକରେ ନିଜର ସ୍ଥାନ ପକ୍କା କରିଛନ୍ତି। ଏଥିସହ ବିଶ୍ବ ଆଥଲେଟିକ୍ସ ଚାମ୍ପିୟନସିପ ପାଇଁ ମଧ୍ୟ ସେ ଯୋଗ୍ୟତା ହାସଲ କରିଛନ୍ତି।
ସୂଚନାଥାଉକି, 29ବର୍ଷୀୟ ଇରଫାନ୍ 1ଘଣ୍ଟା 20ମି. 22ସେକେଣ୍ଡରେ ଏହି 20କି.ମି ଇଭେଣ୍ଟ ସମାପ୍ତ କରିଥିଲେ। ତେବେ ଆଗାମୀ ଅଲମ୍ପିକ୍ସ ପାଇଁ ଯୋଗ୍ୟତା ହାସଲ କରିବାର ସମୟ ଏକ ଘଣ୍ଟା21ମିନିଟ୍ ଧାର୍ଯ୍ୟ କରାଯାଇଥିଲା। ସେହି ନିର୍ଦ୍ଧାରିତ ସମୟ ଠାରୁ କମ୍ ସମୟରେ 20କି.ମି ଇଭେଣ୍ଟ ସମାପ୍ତ କରି ଅଲମ୍ପିକ ପାଇଁ ଉତ୍ତୀର୍ଣ୍ଣ ହୋଇଛନ୍ତି। ସେହିପରି ବିଶ୍ବ ଆଥଲେଟିକ୍ସ ଚାମ୍ପିୟନସିପ ପାଇଁ 1ଘଣ୍ଟା 22ମିନିଟ୍ 30ସେକେଣ୍ଡ ସମୟ ସୀମା ନିର୍ଦ୍ଧାରିତ କରାଯାଇଥିଲା। ଏହି ପ୍ରତିଯୋଗିତା ଚଳିତ ବର୍ଷ ଦୋହା ଠାରେ 27 ସେପ୍ଟମ୍ବରରୁ 6 ଅକ୍ଟୋବର ଯାଏଁ ଚାଲିବ।
ତେବେ ଇରଫାନଙ୍କ ବ୍ୟତୀତ ଭାରତର ଅନ୍ୟ କୌଣସି ଆଥଲେଟ ଏଯାଏଁ ଅଲମ୍ପିକ୍ସ ପାଇଁ ଯୋଗ୍ୟତା ହାସଲ କରିନାହଁନ୍ତି। ସୂଚନାଥାଉକି, କେଟୀଙ୍କ ସର୍ବଶ୍ରେଷ୍ଠ ପ୍ରଦର୍ଶନ 1ଘଣ୍ଟା 20ମିନିଟ୍ 21 ସେକେଣ୍ଡ ରହିଛି । ଯାହା ସେ 2012 ଅଲମ୍ପିକ୍ସରେ ଏହି ରେକର୍ଡ ନିଜ ନାଁରେ କରିଥିଲେ।
