ଚଣ୍ଡିଗଡ: ବିଗ୍ ବସ୍-୯ ପ୍ରତିଯୋଗୀ ତଥା ଅଭିନେତ୍ରୀ ୟୁଭିକା ଚୌଧୁରୀ ଗିରଫ । ଅନୁସୂଚିତ ଜାତି ସମାଜ ବିରୁଦ୍ଧରେ ଆପତ୍ତିଜନକ ମନ୍ତବ୍ୟ ଦେଇ ଗିରଫ ହୋଇଛନ୍ତି ୟୁଭିକା । ତାଙ୍କୁ ହରିୟାଣାର ହାଂସୀ ପୋଲିସ ଗିରଫ କରିବା ସହ ତାଙ୍କୁ ପୋଲିସ ୩ ଘଣ୍ଟା ଜେରା ମଧ୍ୟ କରିଛି ।
ତେବେ ୟୁଭିକାଙ୍କୁ ୩ ଘଣ୍ଟା ଜେରା ପରେ ପୋଲିସ ଅନ୍ତରୀଣ ଜାମିନ ଦେଇଛି । ସୂଚନା ଅନୁଯାୟୀ, ମେ’ ୨୫ରେ ୟୁଭିକା ନିଜ ସୋସିଆଲ ମିଡିଆ ବ୍ଲଗ ଆକାଉଣ୍ଟରେ ଏକ ଭିଡିଓ ଜାରି କରିଥିଲେ । ଏଥିରେ ସେ ଅନୁସୂଚିତ ଜାତି ଉପରେ ଅପମାନଜନକ ମନ୍ତବ୍ୟ ଦେଇଥିବା ଅଭିଯୋଗ ହୋଇଥିଲା । ଏପରିକି ଦଳିତ ଅଧିକାର କର୍ମୀ ରଜତ କଲସନ ଏସସି-ଏସଟି ଅଧିନିୟମ ଅନୁଯାୟୀ ହାଂସୀ ପୋଲିସ ଷ୍ଟେସନରେ ଅଭିନେତ୍ରୀଙ୍କ ବିରୋଧରେ ମାମଲା ଦାୟର କରିଥିଲେ ।
ତାଙ୍କ ବିରୋଧରେ ପଞ୍ଜୀକୃତ ହୋଇଥିବା ମାମଲାକୁ ରଦ୍ଦ କରିବାକୁ ଉଦ୍ୟମ କରି ୟୁଭିକା ପଞ୍ଜାବ-ହରିୟାଣା ହାଇକୋର୍ଟରେ ଏକ ପିଟିସନ ଦାଖଲ କରିଥିଲେ, ଯାହାକୁ କୋର୍ଟ ପ୍ରତ୍ୟାଖ୍ୟାନ କରିଥିଲେ । ଏହା ପରେ ସେ ସ୍ୱତନ୍ତ୍ର କୋର୍ଟରେ ଜାମିନ ଆବେଦନ କରିଥିଲେ ମଧ୍ୟ କୋର୍ଟ ଏହାକୁ ପ୍ରତ୍ୟାଖ୍ୟାନ କରିଥିଲେ । ପରେ ହାଇକୋର୍ଟ ତାଙ୍କୁ ଜାମିନ ପ୍ରଦାନ କରିଥିଲେ ଏବଂ ତଦନ୍ତରେ ଯୋଗଦେବାକୁ ନିର୍ଦ୍ଦେଶ ଦେଇଥିଲେ ।
ହାଇକୋର୍ଟଙ୍କ ନିର୍ଦ୍ଦେଶାନୁସାରେ ସୋମବାର ୟୁଭିକା ହାଂସୀ ପୋଲିସ ଷ୍ଟେସନରେ ଆତ୍ମସମର୍ପଣ କରିଛନ୍ତି । ଏହି ସମୟରେ ତାଙ୍କ ସ୍ୱାମୀ ପ୍ରିନ୍ସ ନରୁଲା ମଧ୍ୟ ଉପସ୍ଥିତ ଥିଲେ । ହାଂସୀ ଡିଏସ୍ପି ବିନୋଦ ଶଙ୍କର କହିଛନ୍ତି ଯେ, ୟୁଭିକା ତଦନ୍ତରେ ପୂର୍ଣ୍ଣ ସହଯୋଗ କରିଛନ୍ତି । ଯଦି ଆବଶ୍ୟକ ପଡେ ତେବେ ଆଗାମୀ ଦିନରେ ତାଙ୍କୁ ପୁଣି ଥରେ ପଚରାଉଚରା କରିବା ପାଇଁ ଡକାଯିବ ।
ବ୍ୟୁରୋ ରିପୋର୍ଟ, ଇଟିଭି ଭାରତ
