ଭୁବନେଶ୍ବର: ନାରୀ ଯାହାର ନଖ ଦର୍ପଣରେ ସାରା ସଂସାର ଥାଏ । ସେଥିପାଇଁ ତ ନାରୀ ଇଶ୍ବରଙ୍କ କାନଭାସର ଏକ ଅନବଦ୍ୟ ସୃଷ୍ଟି । ଆଉ ସେ ହେଉଛି ସ୍ନେହ, ଶ୍ରଦ୍ଧା ସହନଶୀଳତା ଓ ମମତାର ସାକ୍ଷାତ ପ୍ରତିମା । ତେଣୁ ନାରୀଟିଏ ଚିର ନମସ୍ୟା । ସେହି ନାରୀର ସମ୍ମାନାର୍ଥେ ସବୁଦିନ ସମର୍ପିତ । କିନ୍ତୁ ଏ ସମାଜ ନାରୀଙ୍କ ସେବା ତ୍ୟାଗ ଓ ସମର୍ପଣର ଗାଥାକୁ କେବଳ ଗୋଟିଏ ଦିନ ମନେ ପକାଉଛି । ଆଉ ସେହି ଦିନକୁ ଆମେ ଅନ୍ତର୍ଜାତୀୟ ମହିଳା ଦିବସ ପାଳନ କରୁଛେ । ଆଉ ଏହି ସମର୍ପଣ ଦିବସରେ ମହିଳାଙ୍କୁ ସମ୍ମାନ ଦେବାକୁ ଅନେକ କିଛି କାର୍ଯ୍ୟକ୍ରମ ହେଉଥିବା ବେଳେ ଏହି ଦିନ ରିଲିଜ ହେବ ବର୍ଷା ପ୍ରିୟଦର୍ଶନୀଙ୍କ ସ୍ବତନ୍ତ୍ର ମହିଳା କୈନ୍ଦ୍ରିକ ଗୀତ ।
ଏହି ଗୀତଟି ମହିଳାଙ୍କ ସମ୍ମାନ ଓ ତାଙ୍କ ପ୍ରତି ହେଉଥିବା ଅତ୍ୟାଚାରର ସଚେତନତା ଉପରେ ପ୍ରସ୍ତୁତ ହୋଇଛି । ଏହାର ସୁଟିଂ ଭୁବନେଶ୍ବରରେ ଚାଲିଛି। ମୁଖ୍ୟ ଭୂମିକାରେ ଜଣାଶୁଣା ଅଭିନେତ୍ରୀ ନୈନା ଦାସ ରହିଥିବା ବେଳେ ତାଙ୍କ ବିପକ୍ଷରେ ରହିଛନ୍ତି ଅଭିନେତା ରାକେଶ । ଅଭିନେତ୍ରୀ ବର୍ଷା ପ୍ରିୟଦର୍ଶନୀ ଏହାର ପ୍ରଯୋଜନା ଦେଇଥିବା ବେଳେ ଗୀତଟି ବେଶ୍ ହୃଦୟସ୍ପର୍ଶୀ ହେବ ବୋଲି କହିଛନ୍ତି ବର୍ଷା । ସେହିପରି ନୈନା ଦାସ କହିଛନ୍ତି, ନାରୀ ଆଉ ପୁରୁଷ ଉଭୟ ସମାନ ଓ ପରିପୂରକ । ତେଣୁ ଜଣେ ପୁରୁଷ ପଛରେ ଯେମିତି ନାରୀର ହାତ ଥାଏ ସେହଭଳି ଜଣେ ନାରୀର ସଫଳତା ପାଇଁ ପୁରୁଷଟିଏ ତା ପଛରେ ରହିବା ସହ ତାଙ୍କୁ ସମର୍ଥନ କରିବାର ଆବଶ୍ୟକ ରହିଛି ।
ଭୁବନେଶ୍ବରରୁ ଦେବସ୍ମିତା ରାଉତ, ଇଟିଭି ଭାରତ
