ଭୁବନେଶ୍ବର: ବ୍ୟୁଟି ପ୍ରତିଯୋଗିତାରେ ମୁମ୍ବାଇରେ ଚମକିଲେ ଓଡିଆ ବୋହୂ ସୁରଞ୍ଜିତା ରଣା । ବିଜୟିନୀ ହୋଇ ଓଡିଶା ପାଇଁ ଆଣିଛନ୍ତି ଗର୍ବ । ୧୦ ଜଣ ପ୍ରତିଦ୍ବନ୍ଦ୍ବୀଙ୍କୁ ପଛରେ ପକାଇ ଶେଷରେ ସେ ବିଜୟର ମୁକୁଟ ପିନ୍ଧିଥିବା ମିଳିଛି ସୂଚନା ।
ମୁମ୍ବାଇରେ ଅନୁଷ୍ଠିତ ଏହି ଇଣ୍ଡିଆନ ଷ୍ଟାର ଆୱାର୍ଡ଼ ପ୍ରତିଯୋଗିତାରେ ମିସ ଆଣ୍ଡ ମିସେସ ଗ୍ଲୋବାଲ ଇଣ୍ଡିଆ ଡିଭାଇନ ପ୍ରତିଯୋଗିତାରେ ସୁରଞ୍ଜିତା ବିଜୟର ମୁକୁଟ ପିନ୍ଧିଛନ୍ତି । ୧୦ ଜଣ ଫାଇନାଲିଷ୍ଟଙ୍କ ମଧ୍ୟରୁ ସମସ୍ତଙ୍କୁ ପଛରେ ପକାଇ ଏହି ତାଜ ପିନ୍ଧିବାର ସୁଯୋଗ ଲାଭ କରିଛନ୍ତି ସୁରଞ୍ଜିତା । ସମ୍ବଲପୁରୀ ନୃତ୍ୟ ଓ ଜଜଙ୍କ ବିଭିନ୍ନ ପ୍ରଶ୍ନର ସଫଳ ଉତ୍ତର ଦେଇ ସେ ଏହି ସଫଳତା ହାସଲ କରିଥିବା ବେଳେ ବେଷ୍ଟ ଆକ୍ଟିଭିଷ୍ଟ ଆୱାର୍ଡ ମଧ୍ୟ ପାଇଛନ୍ତି ।
ସୁରଞ୍ଜିତା ଏବେ ଭୁବନେଶ୍ବର କାନନ ବିହାରର ହୋଇଥିବା ବେଳେ ସେ ଦିଲ୍ଲୀରେ ଏକ ବ୍ୟାଙ୍କରେ ଚାକିରି କରିଛନ୍ତି । ତେବେ ଏହି ପ୍ରତିଯୋଗିତାରେ ଅଂଶ ଗ୍ରହଣ କରି ସଫଳତା ପାଇଥିବାରୁ ବେଶ୍ ଖୁସି ଅଛନ୍ତି ସୁରଞ୍ଜିତାଙ୍କ ପୁରା ପରିବାର । ତେବେ ଆଗକୁ ମିସ ୟୁନିଭର୍ସ ପ୍ରତିଯୋଗିତାରେ ଭାଗ ନେଇ ଓଡ଼ିଶା ଓ ଦେଶ ପାଇଁ ଗୌରବ ଆଣିବାକୁ ଆଶା ରଖିଛନ୍ତି ସୁରଞ୍ଜିତା । ଏହି ସଫଳତା ପରେ ତାଙ୍କୁ ବିଭିନ୍ନ ମହଲରୁ ଶୁଭେଚ୍ଛାର ସୁଅ ଛୁଟୁଛି ।
ବିବାହ ପରେ ନିଜ ରାଜ୍ୟ ପାଇଁ ଏଭଳି ଏକ ପ୍ରତିଯୋଗିତାରେ ଭାଗ ନେବା ପାଇଁ ଶାଶୁ ଶ୍ବଶୁର ଓ ସ୍ବାମୀ ସମ୍ପୂର୍ଣ୍ଣ ସହଯୋଗ କରିଥିବା କୁହନ୍ତି ସେ । ଏଭଳି ସମର୍ଥନ ମିଳିବା ପରେ ସେ ବିଜୟର ମୁକୁଟ ପିନ୍ଧିଥିବାରୁ ପରିବାରକୁ ବିଜୟର ଶ୍ରେୟ ଦେଇଛନ୍ତି ।
ଭୁବନେଶ୍ବରରୁ ଦେବସ୍ମିତା ରାଉତ, ଇଟିଭି ଭାରତ
