କେନ୍ଦ୍ରାପଡା: ଓଲିଉଡର ଲୋକପ୍ରିୟ ଅଭିନେତା ବିଜୟ ମହାନ୍ତି ବର୍ତ୍ତମାନ ହାଇଦ୍ରାବାଦର ଲକଡିକାପୁଲ ସ୍ଥିତ ଗ୍ଲୋବାଲ ହସ୍ପିଟାଲରେ ଚିକିତ୍ସିତ ହେଉଛନ୍ତି । ବୁଧବାର ଛାତିରେ ଯନ୍ତ୍ରଣା ହେତୁ ତାଙ୍କୁ ଆଇସିୟୁରେ ଭର୍ତ୍ତି କରାଯାଇଥିଲା। ହୃଦଘାତରେ ପୀଡିତ ଥିବାରୁ ଏବେ ସେ ଭେଣ୍ଟିଲେଟରରେ ଅଛନ୍ତି । ଯାହାକୁ ନେଇ ଦୁଃଖି ତାଙ୍କ ପ୍ରଶଂସକ। ବର୍ତ୍ତମାନ ତାଙ୍କ ଆରୋଗ୍ୟ ପ୍ରାର୍ଥନା କରିବାରେ ଲାଗିଛନ୍ତି ସମସ୍ତେ । ଏମିତି ଦେଖିବାକୁ ମିଳିଛି ତାଙ୍କ ଜନ୍ମସ୍ଥାନ କେନ୍ଦ୍ରାପଡାରେ।
ତାଙ୍କ ଆଶୁ ଆରୋଗ୍ୟ କାମନା କରି ଜନ୍ମସ୍ଥାନ କେନ୍ଦ୍ରାପଡ଼ା ପାଣ୍ଡିରି ଗ୍ରାମରେ ସମୂହ ଦୀପ ଦାନ ଓ ପୂଜାର୍ଚ୍ଚନା କରାଯାଇଛି l
ଗାଁରେ ରହୁଥିବା ବିଜୟଙ୍କ ପରିବାର ସଦସ୍ୟ ମାନେ କୂଳଦେବତା ଲକ୍ଷ୍ମୀ-ନାରାୟଣଙ୍କ ମନ୍ଦିରରେ ପୂଜାର୍ଚ୍ଚନା କରିବା ସହିତ ଦୀପ ଦାନ କରି ତାଙ୍କ ଆରୋଗ୍ୟ କାମନା କରିଛନ୍ତି l
ହାଇଦ୍ରାବାଦରେ ତାଙ୍କ ଅସୁସ୍ଥତା ଖବର ପାଇ ଗାଁରେ ଥିବା ପରିବାର ଲୋକେ ବ୍ୟସ୍ତ ହୋଇପଡିଛନ୍ତି l ଲକଡାଉନ ପରେ ବିଜୟ ଗାଁକୁ ଆସି ବୁଲିଯିବା ପାଇଁ କହି ଯାଇଥିଲେ ମଧ୍ୟ ହଠାତ ବୁଧବାର ଅସୁସ୍ଥ ହୋଇ ମେଡିକାଲରେ ପଡିବା ନେଇ ଖବର ପାଇବା ପରେ ଗାଁ ଲୋକେ ବିଜୟ ଶୀଘ୍ର ଆରୋଗ୍ୟ ହୋଇ ନିଜ ଜନ୍ମମାଟିକୁ ଫେରନ୍ତୁ ବୋଲି କାମନା କରିଛନ୍ତି।
ପ୍ରକାଶ ଥାଉକି ୧୯୫୦ ମସିହାରେ ବିଜୟ ପାଣ୍ଡିରି ଗ୍ରାମରେ ଜନ୍ମ ଗ୍ରହଣ କରିଥିଲେ l ଗାଁରେ ହିଁ ତାଙ୍କର ବାଲ୍ୟକାଳ କଟିଥିଲା l ଗାଁରେ ଶିକ୍ଷା ଗ୍ରହଣ କରି ଶେଷରେ ଅଭିନୟ ଶିକ୍ଷା ପାଇଁ ନ୍ୟାସନାଲ ସ୍କୁଲ ଅଫ ଡ୍ରାମାରେ ଯୋଗଦେଇଥିଲେ l
କେନ୍ଦ୍ରପଡାରୁ ରାଧାକାନ୍ତ ମହାନ୍ତି, ଇଟିଭି ଭାରତ
