ବେଙ୍ଗାଲୁରୁ: ଡ୍ରଗ୍ ସେବନ କରୁଥିବା ମାମଲାରେ ଗିରଫ ହୋଇଥିବା କନ୍ନଡ ଅଭିନେତ୍ରୀ ରାଗିଣୀ ଦ୍ୱିବେଦୀଙ୍କୁ ଗୁରୁବାର ସୁପ୍ରିମକୋର୍ଟ ଜାମିନ ପ୍ରଦାନ କରିଛନ୍ତି । ରାଗିଣୀଙ୍କୁ ସେପ୍ଟେମ୍ବର 4 ତାରିଖରେ ଗିରଫ କରାଯାଇଥିଲା ।
ନଭେମ୍ବରରେ କର୍ଣ୍ଣାଟକ ହାଇକୋର୍ଟ ରାଗିଣୀ ଏବଂ ସଞ୍ଜନା ଗାଲ୍ରାନିଙ୍କ ଦ୍ବାରା ଦାଖଲ ହୋଇଥିବା ଜାମିନ ଆବେଦନକୁ ଖାରଜ କରିଦେଇଥିଲେ । ପାର୍ଟି ତଥା ଇଭେଣ୍ଟରେ ଡ୍ରଗ୍ସ ସେବନ ତଥା ଯୋଗାଣ ଅଭିଯୋଗରେ ପୋଲିସ ଅନ୍ୟ ଅଭିଯୁକ୍ତମାନଙ୍କୁ ମଧ୍ୟ ଗିରଫ କରିଥିଲା ।
ଆଇପିସିର ବିଭିନ୍ନ ବିଭାଗ ଅଧୀନରେ 120 ବି (ଅପରାଧିକ ଷଡଯନ୍ତ୍ର) ଏବଂ 1985 ର ନାର୍କୋଟିକ୍ ଡ୍ରଗ୍ ଏବଂ ସାଇକୋଟ୍ରୋପିକ୍ ପଦାର୍ଥ ଅଧିନିୟମ ଅନୁଯାୟୀ ଧାରା 21, 21C, 27A, 27Bଏବଂ ଧାରା 29 ଅନୁଯାୟୀ ଏହି ଅଭିଯୁକ୍ତମାନଙ୍କୁ ଗିରଫ କରାଯାଇଥିଲା । ରାଗିଣୀଙ୍କୁ ସେପ୍ଟେମ୍ବର 4ରେ ଗିରଫ କରାଯାଇଥିବା ବେଳେ ସେପ୍ଟେମ୍ବର ୨ ତାରିଖରେ ସଞ୍ଜନାଙ୍କୁ ଗିରଫ କରାଯାଇଥିଲା ।
ସେମାନଙ୍କ ଦ୍ବାରା ପୂର୍ବରୁ ଦାଖଲ କରାଯାଇଥିବା ଜାମିନ ଆବେଦନକୁ ସେପ୍ଟେମ୍ବର 28 ତାରିଖରେ କୋର୍ଟ ଖାରଜ କରିଦେଇଥିଲେ । ଅଭିଯୁକ୍ତ ଆବେଦନକାରୀ ଏବଂ ପ୍ରବର୍ତ୍ତନ ନିର୍ଦ୍ଦେଶାଳୟର ସବିଶେଷ ଶୁଣାଣି ପରେ ହାଇକୋର୍ଟ ଅକ୍ଟୋବର 25 ରେ ଏହାର ଆଦେଶ ସଂରକ୍ଷଣ ରଖିଥିଲେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
