ୱାଶିଂଟନ: ହଲିଉଡ ସିଙ୍ଗର ଓ ଆକ୍ଟ୍ରେସ ମାଡୋନ୍ନାଙ୍କୁ ନେଇ ଏବେ ଦେଖାଦେଇଛି ବିପଦ । ନିକଟରେ ନିଜର କୋରୋନା ପଜିଟିଭ ସମ୍ପର୍କରେ ସେ ଇନଷ୍ଟାଗ୍ରାମ ଆକାଉଣ୍ଟରେ ସୂଚନା ଦେଇଥିଲେ । ତେବେ ଏହାପରେ ଏକ ଭିଡିଓ ଭାଇରାଲ ହୋଇଛି ଯେଉଁଥିରେ ସେ ଅନେକ ଲୋକଙ୍କ ସହ ପାର୍ଟି କରୁଥିବାର ନଜର ଆସିଛନ୍ତି ।
ଏହି ଭିଡିଓ ଫିଲ୍ମମେକର ଓ ଫଟୋଗ୍ରାଫର ଷ୍ଟିଭେନ କ୍ଲେନଙ୍କ ବର୍ଥ ଡେ ପାର୍ଟିର ଭିଡିଓ । ଏଥିରେ ମାଡୋନ୍ନା ଲାଇଭ କନସର୍ଟ କରିଥିଲେ । ଜୁମ ଆପ୍ ଦ୍ବାରା ଏହି ପାର୍ଟିରେ ଶତାଧିକ ଲୋକ ଯୋଗ ଦେଇଥିଲେ । ତେବେ ଏଥିରେ ଷ୍ଟିଭେନଙ୍କ ଅନେକ ସାଙ୍ଗ ଉପସ୍ଥିତ ଥିଲେ । ଲାଇଭ ଥିଲେ ମଧ୍ୟ ମାଡୋନ୍ନା ଷ୍ଟିଭେନଙ୍କ ସହ ଯୋଗ ଦେଇଥିଲେ । ଏପରିକି ସେ ତାଙ୍କୁ ହଗ କରିଥିବାର ମଧ୍ୟ ଭିଡିଓରେ ଦେଖାଯାଇଛି । ଏହା ମାର୍ଚ୍ଚରେ ହୋଇଥିବାର ସନ୍ଦେହ କରାଯାଉଛି । ପାର୍ଟିରେ ଯୋଗ ଦେଇଥିବା କୌଣସି ଜଣେ ବି ଲୋକ ମାସ୍କ ପିନ୍ଧିନଥିଲେ କିମ୍ବା ପ୍ରତିଷେଧକ ବ୍ୟବସ୍ଥା ନେଇନଥିଲେ । ସାମାଜିକ ଦୂରତ୍ବର କୌଣସି ପ୍ରକାର ଚିହ୍ନବର୍ଣ୍ଣ ନଥିଲା ।
ତେବେ ଏହାକୁ ନେଇ ହଲିଉଡରେ ଆଶଙ୍କା ଦେଖାଦେଇଛି । ଯଦିଚ ମାଡୋନ୍ନାଙ୍କ ରିପୋର୍ଟ ଏବେ ଯାଏଁ ପଜିଟିଭ ଆସିନି ତେବେ ତାଙ୍କଠାରେ ଲକ୍ଷଣ ଦେଖାଯାଇଥିବା ସେ ନିଜେ କହିଛନ୍ତି । ଲୋକେ ଏବେ ଟ୍ବିଟରରେ ତାଙ୍କୁ ହଲିଉଡର କନିକା କପୁର ବୋଲି କହିଛନ୍ତି । ପ୍ରକାଶ ଥାଉ କି ବଲିଉଡର ସିଙ୍ଗର କନିକା ଲଣ୍ଡନରୁ ଫେରି କୋରୋନାର ଶିକାର ହୋଇଥିଲେ ମଧ୍ୟ କାହାକୁ ଜଣାଇନଥିଲେ । ଏପରିକି ସେ ଅନେକ ପାର୍ଟିରେ ଯୋଗ ଦେଇ ରାଜନେତା ଓ ବିଭିନ୍ନ ଲୋକଙ୍କ ସଂସ୍ପର୍ଶରେ ଆସିଥିଲେ । ପରେ ସେ ସୁସ୍ଥ ହୋଇଥିଲେ ମଧ୍ୟ ତାଙ୍କ ନାମରେ ମାମଲା ରୁଜୁ ହୋଇଛି ।
ଉଲ୍ଲେଖଯୋଗ୍ୟ ଯେ 3 ଦିନ ତଳେ ନିଜ କ୍ବାରେଣ୍ଟାଇନ ଡାଏରୀର ଅଧ୍ୟାୟରେ 61 ବର୍ଷିୟା ସିଙ୍ଗର ମାଡୋନ୍ନା କୋଭିଡ 19 କଥା କହିଛନ୍ତି । ସେ କହିଛନ୍ତି ଯେ ଆଗାମୀ ସକାଳେ ମୁଁ ଏକ ନୂଆ ବାୟୁମଣ୍ଡଳରେ ପ୍ରବେଶ କରିବି । ମୋ ଦେହରେ କୋରୋନା ଭୂତାଣୁ ଥିବାର ପରୀକ୍ଷା ପରେ ଜଣାପଡିଛି । କିଛି ଲକ୍ଷଣ ଦେଖାଯାଇଥିବା ଡାକ୍ତରମାନେ କହିଛନ୍ତି । କାଲିଠାରୁ ମୁଁ କୋଭିଡ 19 ବାୟୁକୁ ନିଶ୍ବାସରେ ଗ୍ରହଣ କରିବି ବୋଲି ସେ କହିଥିଲେ ।
