ମୁମ୍ବାଇ: ଦେଶ ଭକ୍ତି ଉପରେ ଆଧାରିତ ଆକ୍ସନ ହିରୋ ଜନ ଅବ୍ରାହମଙ୍କ ଅଭିନୀତ ଫିଲ୍ମ ‘ବାଟଲା ହାଉସ’ ଖୁବଶୀଘ୍ର ରିଲିଜ ହେବାକୁ ପ୍ରସ୍ତୁତ ହୋଇସାରିଲାଣି । ଫିଲ୍ମଟି ସ୍ବାଧୀନତା ଦିବସରେ ରିଲିଜ ହେବ । ଏହାପୂର୍ବରୁ ଉପ ରାଷ୍ଟ୍ରପତି ଏମ. ଭେଙ୍କେୟା ନାଇଡୁଙ୍କ ପାଇଁ ଶନିବାର ଦିଲ୍ଲୀରେ ଏକ ସ୍ପେଶାଲ ସ୍କ୍ରିନିଂର ଆୟୋଜନ କରାଯାଇଥିଲା ।
ଏହି ଅବସରରେ ଜନ କହିଛନ୍ତି, ‘‘ ଉପ ରାଷ୍ଟ୍ରପତି ଏମ. ଭେଙ୍କେୟା ନାଇଡୁଙ୍କୁ ନିଜ କାମ ଦେଖାଇବା ଆମ ପାଇଁ ସମ୍ମାନର କଥା । ମୁଁ ଚାହୁଁଛି ଯେ ସେ ଆମ ଫିଲ୍ମ ଉପରେ ଯେକୌଣସି ପ୍ରତିକ୍ରିୟା ଦିଅନ୍ତୁ । ସେ ଆମକୁ ଏହି ସୁଯୋଗ ଦେବାରୁ ଅନେକ ଅନେକ ଧନ୍ୟବାଦ ଦେବାକୁ ଚାହୁଁଛି । ତାଙ୍କ ସହ ସାକ୍ଷାତ କରିବା ଏବଂ କଥାବାର୍ତ୍ତା କରିବାକୁ ବ୍ୟାକୁଳ ଅଛି ।’’
ନିଖିଲ ଆଡଭାନୀ ଦ୍ବାରା ନିର୍ଦ୍ଦେଶିତ ‘ବାଟଲା ହାଉସ’ 2008ରେ ହୋଇଥିବା ସିରିଏଲ ବ୍ଲାଷ୍ଟରେ ପୋଲିସ ଓ ଆତଙ୍କବାଦୀ ମଧ୍ୟରେ ଘଟିଥିବା ଏନକାଉଣ୍ଟର ଉପରେ ଆଧାରିତ ।
ଜନ ଏହି ଫିଲ୍ମରେ ଉକ୍ତ ଅପରେଶନର ଦାୟିତ୍ବ ସମ୍ଭାଳିଥିବା ଡିସିପି ସଞ୍ଜୀବ କୁମାର ଯାଦବଙ୍କ ଭୂମିକାରେ ଅଭିନୟ କରୁଥିବାର ଦେଖାଯିବେ । ତାଙ୍କ ସହ ଫିଲ୍ମରେ ‘ସୁପର 30’ ଅଭିନେତ୍ରୀ ମୃଣାଳ ଠାକୁର ମୁଖ୍ୟ ଭୂମିକାରେ ନଜର ଆସିବେ ।
