ଲକ୍ଷ୍ନୌ: ଜାରି ରହିଛି 5 ରାଜ୍ୟରେ ଭୋଟ ଗଣତି । ବାସ୍ ଆଉ କିଛି ଘଣ୍ଟାର ଅପେକ୍ଷା । ଆସିବ 2022ର ଜନାଦେଶ । କିଏ ଜିତିଛି ଜନତାଙ୍କ ଦିଲ୍ । କାହା ସପକ୍ଷରେ ଯିବ ଜନମତ । କିଏ ହାତେଇବ ୟୁପି । କାହା ମୁଣ୍ଡରେ ହାତୀ ସୁନାକଳସ ଢାଳିବ ତାହା ଉପରେ ନଜର । ନିର୍ବାଚନ କଥା ଯଦି ଆମେ କହିବା ୟୁପିର ହସ୍ତିନାପୁର କଂଗ୍ରେସ ପ୍ରାର୍ଥୀକୁ ନେଇ ଚାଲିଛି ଜୋରଦାର ଚର୍ଚ୍ଚା । କଂଗ୍ରେସ ପାଇଁ ଏହି ଆସନରୁ ଲଢୁଛନ୍ତି ଅର୍ଚ୍ଚନା ଗୌତମ । ଅର୍ଚ୍ଚନାଙ୍କ ପ୍ରାର୍ଥୀତ୍ବକୁ ନେଇ ଯେମିକି ଚର୍ଚ୍ଚା ସାଉଁଟି ନାହାନ୍ତି ପେସାକୁ ନେଇ ସେ ବେଶ ଚର୍ଚ୍ଚାରେ ଅଛନ୍ତି । ‘ବିକିନି ଗର୍ଲ’ ଭାବେ ସେ ବେଶ ଚର୍ଚ୍ଚିତ । ଆଜି ୟୁପିର 403 ଆସନର ଜନାଦେଶ ଆସିବାକୁ ଥିବାବେଳେ ହସ୍ତିନାପୁର ଆସନକୁ ନେଇ ଚାଲିଛି ସରଗରମ ଆଲୋଚନା ।
ଅର୍ଚ୍ଚନା ଗୌତମଙ୍କ 'ପ୍ରତିଦ୍ୱନ୍ଦ୍ୱୀ'
ୟୁପିର ହସ୍ତିନାପୁର ବିଧାନସଭା ଆସନରୁ କଂଗ୍ରେସର ଅର୍ଚ୍ଚନା ଗୌତମ (Archana Gautam Congress)ଙ୍କ ପ୍ରତିନ୍ଦ୍ବନ୍ଦୀ ଭାବେ ବିଜେପିର ଦୀନେଶ ଖଟିକ୍, ସମାଜବାଦୀ ପାର୍ଟିର ଯୋଗେଶ ବର୍ମା ଏବଂ ବିଏସପିର ସଞ୍ଜୀବ କୁମାର ନିର୍ବାଚନ ଲଢୁଛନ୍ତି । ଆଜି ସମସ୍ତ ନିଷ୍ପତ୍ତିର ଘଡି । କିଏ ମାରିବ ବାଜି । ତାହାକୁ ଅପେକ୍ଷା ।
କାହିଁକି ଚର୍ଚ୍ଚିତ ହସ୍ତିନାପୁର ସିଟ୍
ଏହି ଆସନଟି ଅନୁସୂଚିତଙ୍କ ପାଇଁ ସଂରକ୍ଷିତ । ଏଠାକାର ମୁସଲିମ ସଂପ୍ରଦାୟ ଏବଂ ଗୁର୍ଜର ସମ୍ପ୍ରଦାୟ ଭୋଟ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରେ । ଏହା ବ୍ୟତୀତ ଜାଟ ଏବଂ ଶିଖ ଜନସଂଖ୍ୟା ମଧ୍ୟ ଏଠାରେ ଅଛନ୍ତି । ତେବେ ଏହା ହେଉଛି ସେହି ହସ୍ତିନାପୁର, ଯେଉଁଠାରେ ମହାଭାରତର ଇତିହାସ ଲେଖାଯାଇଛି । ଏଠାରେ ହିନ୍ଦୁ ଧର୍ମ ଏବଂ ଜୈନ ଧର୍ମର ମନ୍ଦିର ମଧ୍ୟ ଅଛି । ଏହା ଏକ ଐତିହାସିକ ସହର, ଯାହାକୁ ଜିତିବା ପାଇଁ ପ୍ରଚାର ସମୟରେ ସମସ୍ତ ଦଳ ଜୋର ଲଗାଇଥିଲେ ।
ଖବର ଲେଖାଯିବା ସୁଦ୍ଧା, ବିଜେପି ପ୍ରାର୍ଥୀ ଦୀନେଶ ଖଟିକ୍ 1831 ଭୋଟରେ ଆଗୁଆ ଅଛନ୍ତି । ଚାରି ରାଉଣ୍ଡ ଭୋଟ୍ ଗଣିବା ପରେ ତାଙ୍କୁ 8172 ଭୋଟ୍ ମିଳିଛି । ଅନ୍ୟପକ୍ଷରେ, ଦ୍ୱିତୀୟ ସ୍ଥାନରେ ଥିବା ସମାଜବାଦୀ ପାର୍ଟିର ଯୋଗେଶ ବର୍ମା 6341 ଭୋଟ ପାଇଛନ୍ତି। ତୃତୀୟ ସ୍ଥାନରେ ବିଏସପିର ସଞ୍ଜୀବ କୁମାର ଚାଲିଛନ୍ତି। ତାଙ୍କୁ 1150 ଭୋଟ୍ ମିଳିଛି । କଂଗ୍ରେସର ଅର୍ଚ୍ଚନା ଗୌତମଙ୍କ ବିଷୟରେ ଅନେକ ଆଲୋଚନା ହୋଇଥିଲା । ତାଙ୍କୁ ମାତ୍ର 101 ଭୋଟ ମିଳିଛି ।
ସକାଳ 8ଟା 30: ପୋଷ୍ଟଲ ବାଲୋଟ ଭୋଟ ଗଣନାରେ ବିଜେପିର ଦୀନେଶ ଖାଟିକ୍ ତାଙ୍କର ନିକଟତମ ପ୍ରତିଦ୍ୱନ୍ଦ୍ୱୀଙ୍କଠାରୁ ଆଗରେ ଚାଲିଛନ୍ତି।
କିଏ 'ବିକିନି ଗର୍ଲ' ଅର୍ଚ୍ଚନା ଗୌତମ ?
କଂଗ୍ରେସ ଏଥର ୟୁପି ନିର୍ବାଚନରେ 40 ପ୍ରତିଶତ ମହିଳା ପ୍ରାର୍ଥୀଙ୍କୁ ଟିକେଟ ଦେଇଛି । ଏହି ତାଲିକାରେ ଅଭିନେତ୍ରୀ ଅର୍ଚ୍ଚନା ଗୌତମଙ୍କ ନାମ ମଧ୍ୟ ଅନ୍ତର୍ଭୁକ୍ତ । ମିଟର ପ୍ରସିଦ୍ଧ ହାସ୍ତିନପୁର ବିଧାନସଭା ଆସନରୁ କଂଗ୍ରେସ ଅର୍ଚ୍ଚନାକୁ ଟିକେଟ ଦେଇଛି । ଖୁବ୍ କମ୍ ଲୋକ ଜାଣନ୍ତି ଯେ ମିରଟ (ୟୁପି)ରେ ରହୁଥିବା 26 ବର୍ଷୀୟ ଅର୍ଚ୍ଚନା ଗୌତମ 'ମିସ୍ ଉତ୍ତରପ୍ରଦେଶ' (2014) ହୋଇସାରିଛନ୍ତି । ଅର୍ଚ୍ଚନା ଜଣେ ଅଭିନେତ୍ରୀ, ମଡେଲ ଏବଂ ବ୍ୟୁଟି ପେଜେଣ୍ଟର ବିଜେତା। 'ମିସ୍ ଉତ୍ତରପ୍ରଦେଶ' ଟାଇଟଲ୍ ଜିତିବା ପରେ ଅର୍ଚ୍ଚନା 'ମିସ୍ ବିକିନି ଇଣ୍ଡିଆ', 'ମିସ୍ ବିକିନି ୟୁନିଭର୍ସ ଇଣ୍ଡିଆ' ଏବଂ 'ମିସ୍ ବିକିନି ୟୁନିଭର୍ସ' ପ୍ରତିଯୋଗିତାରେ ବାଜି ମାରିଥିଲେ ।
2018 ରେ 'Miss Cosmo World ପ୍ରତିଯୋଗିତା'ରେ ଅର୍ଚ୍ଚନା ମଧ୍ୟ ଭାରତର ପ୍ରତିନିଧିତ୍ୱ କରିଥିଲେ। ଅର୍ଚ୍ଚନା ଗୌତମଙ୍କୁ 2018 ରେ ଡ.ଏସ୍ ରାଧାକ୍ରିଷ୍ଣନ୍ ମେମୋରିଆଲ୍ ଆୱାର୍ଡ ମଧ୍ୟ ପ୍ରଦାନ କରାଯାଇଥିଲା । 2018ରେ ମନୋରଞ୍ଜନ ଦୁନିଆରେ ଯୋଗଦାନ ପାଇଁ ଜିଆରଟି ଦ୍ବାରା Women Achiever Award ପ୍ରଦାନ କରାଯାଇଥିଲା । ଅର୍ଚ୍ଚନା ଗୌତମ ମଧ୍ୟ ମୋଷ୍ଟ ଟ୍ୟାଲେଣ୍ଟ 2018 ର ଟାଇଟଲ ମଧ୍ୟ ନିଜ ନାଁରେ କରିଛନ୍ତି। 2018 ମସିହାରେ ଅର୍ଚ୍ଚନା ମାଲେସିଆରେ 'ମିସ୍ ଟ୍ୟାଲେଣ୍ଟ୍' ଟାଇଟଲ୍ ଜିତି ଦେଶର ନାମ ଆଲୋକିତ କରିଥିଲେ । ଅର୍ଚ୍ଚନା ଗୌତମଙ୍କ ଅଧ୍ୟୟନ ବିଷୟରେ କହିବାକୁ ଗଲେ ସେ ମେରଠର ଆଇଆଇଏମଟିରୁ ବିଜେଏମସି (BJMC) ଡିଗ୍ରୀ ହାସଲ କରିଛନ୍ତି।
2015 ରେ ଅର୍ଚ୍ଚନା ଗୌତମ ବଲିଉଡରେ ଡେବ୍ୟୁ କରିଥିଲେ । ସେ ସାଉଥ୍ ଫିଲ୍ମ ଇଣ୍ଡଷ୍ଟ୍ରିରେ 'ବିକିନି ଗର୍ଲ' ଭାବରେ ଜଣାଶୁଣା । କେବଳ ଏତିକି ନୁହେଁ ଅର୍ଚ୍ଚନା ଫିଲ୍ମ 'ଗ୍ରେଟ ଗ୍ରାଣ୍ଡ ମସ୍ତି'ରେ ବୋଲ୍ଡ ସିନ୍ ମଧ୍ୟ ଦେଇଥିଲେ ।
ଏହା ପରେ ଶ୍ରଦ୍ଧା କପୁରଙ୍କ ଫିଲ୍ମ 'ହସୀନା ପାର୍କର' ଏବଂ 'ବାରାତ କମ୍ପାନୀ'ରେ ଅର୍ଚ୍ଚନାଙ୍କୁ ମଧ୍ୟ ଦେଖିବାକୁ ମିଳିଥିଲା। ଅର୍ଚ୍ଚନା ବର୍ତ୍ତମାନ ସୁଦ୍ଧା ଅଭିନୟ ଜଗତ ସହିତ ଜଡିତ ଏବଂ ସେ ଅନେକ ବିଜ୍ଞାପନରେ ମଧ୍ୟ ନଜର ଆସିଛନ୍ତି । ଅର୍ଚ୍ଚନା ଗୌତମ ଚଳଚ୍ଚିତ୍ର 'ଜଙ୍କସନ ବାରାଣସୀ' (2019) ରେ ଏକ ଆଇଟମ୍ ନମ୍ବର କରିଥିଲେ । ଅର୍ଚ୍ଚନା ଟି-ସିରିଜର ଅନେକ ଗୀତରେ ମଧ୍ୟ କାମ କରିଛନ୍ତି । ଏହା ବ୍ୟତୀତ ଅର୍ଚ୍ଚନା ପଞ୍ଜାବୀ ଏବଂ ହରିୟାଣୀ ଗୀତରେ ମଧ୍ୟ ଅଭିନୟ କରିଛନ୍ତି। ବର୍ତ୍ତମାନ ଅର୍ଚ୍ଚନା ସାଉଥ୍ ସିନେମାରେ ସକ୍ରିୟ ଅଛନ୍ତି । ସେ ତେଲୁଗୁ ଚଳଚ୍ଚିତ୍ର IPL It's Pure Love ଏବଂ Gundas ଏବଂ 47A ନାମକ ତାମିଲ୍ ଚଳଚ୍ଚିତ୍ରରେ କାମ କରୁଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
