ମୁମ୍ବାଇ: ଚୁଲବୁଲି ଅଭିନେତ୍ରୀ ତାପସୀ ପନ୍ନୁ ବର୍ତ୍ତମାନ ନିଜ ଆଗାମୀ ଫିଲ୍ମ ‘ଥାପଡ’କୁ ନେଇ ଚର୍ଚ୍ଚାରେ। ଫିଲ୍ମ ପ୍ରମୋଶନରେ ଏବେ ଖୁବ୍ ବ୍ୟସ୍ତ ସେ। ଏମାସ 28ରେ ରିଲିଜ ହେବାକୁ ଯାଉଛି ଏହି ଫିଲ୍ମ। ଅନୁଭବ ସିହ୍ନାଙ୍କ ନିର୍ଦ୍ଦେଶିତ ଏହି ଫିଲ୍ମ ଘରୋଇ ହିଂସା କାହାଣୀକୁ ନେଇ ଆଧାରିତ। ଏଯାବତ ଫିଲ୍ମର ଦୁଇଟି ଜବରଦସ୍ତ ଟ୍ରେଲର, କିଛି ଗୀତ ରିଲିଜ ହୋଇସାରିଛି। ଯାହାକୁ ଖୁବ୍ ପସନ୍ଦ କରିଛନ୍ତି ଦର୍ଶକ। ଇତିମଧ୍ୟ ତାପସୀଙ୍କ ଫ୍ୟାନ୍ସ ପାଇଁ ଖୁସି ଖବର ସାମ୍ନାକୁ ଆସିଛି। କାରଣ ତାଙ୍କ ହାତରେ ଲାଗିଛି ଆଉ ଏକ ଫିଲ୍ମ।
ଫିଲ୍ମର ଟାଇଟଲ ‘ଲୁପ ଲପେଟା’ ରଖାଯାଇଛି। ତାଙ୍କ ସହ ଏଥିରେ ନଜର ଆସିବେ ତାହିର ରାଜ ଭସୀନ। ଫିଲ୍ମଟି ଜର୍ମାନର କଲ୍ଟ କ୍ଲାସିକ କୁହାଯାଉଥିବା ବେଳେ ଫିଲ୍ମ ‘ରନ ଲୋଲା ରନ’ର ହିନ୍ଦୀ ସଂସ୍କରଣ। ଫିଲ୍ମଟି ଏକ ଥ୍ରିଲର କମେଡି ଉପରେ ଆଧାରିତ ହେବ। ଯାହାର ନିର୍ଦ୍ଦେଶନା ଦାୟିତ୍ବ ତୁଲାଇବେ ଆକାଶ ଭାଟ୍ଟିୟା।
ଖାଲି ଏତିକି ନୁହେଁ ଫିଲ୍ମର ରିଲିଜ ତାରିଖ ମଧ୍ୟ ସାମ୍ନାକୁ ଆସିଯାଇଛି। ଆସନ୍ତା ବର୍ଷ ଜାନୁଆରୀ 29ରେ ‘ଲୁପ ଲପେଟା’କୁ ରିଲିଜ କରିବାକୁ ଯୋଜନା କରିଛନ୍ତି ମେକର୍ସ। ଟ୍ବିଟରରେ ଏହାର ଘୋଷଣା କରିଛନ୍ତି ଫିଲ୍ମ କ୍ରିଟିକ ତରଣ ଆଦର୍ଶ।
ପ୍ରକାଶ ଥାଉକି ‘ଥାପଡ’ ବ୍ୟତୀତ ତାପସୀ ଫିଲ୍ମ ‘ହସୀନ ଦିଲରୁବା’ରେ ନଜର ଆସିବେ । ଏହା ଏକ ଥ୍ରିଲର ଡ୍ରାମା ଫିଲ୍ମ। ଏବର୍ଷ ସେପ୍ଟେମ୍ବର 18ରେ ରିଲିଜ ହେବ ଏହି ଫିଲ୍ମ। ଫିଲ୍ମରେ ତାପସୀଙ୍କ ସହ ରୋମାନ୍ସ କରୁଥିବାର ନଜର ଆସିବେ ‘ଛପାକ’ ଅଭିନେତା ବିକ୍ରାନ୍ତ ମେସୀ। ‘ହସୀନ ଦିଲରୁବା’ ପରେ ତାପସୀ ଭାରତୀୟ ମହିଳା କ୍ରିକେଟ ଟିମରେ କ୍ୟାପ୍ଟେନ ମିତାଲୀ ରାଜଙ୍କ ବାୟୋପିକ ସାବସ ମିଠୁ ନେଇ ପରଦାକୁ ଫେରିବେ।
