ମୁମ୍ବାଇ: ସୁପରଷ୍ଟାର ସଲମାନ ଖାନ ନିଜର ଆଗାମୀ ଫିଲ୍ମ ‘କଭି ଖୁସି କଭି ଗମ୍’କୁ ନେଇ ଦୀର୍ଘ ସମୟରୁ ଚର୍ଚ୍ଚାରେ । ଫିଲ୍ମରେ ତାଙ୍କ ସହ ପ୍ରଥମଥର ନଜର ଆସିବେ ସାଉଥର ଲୋକପ୍ରିୟ ଅଭିନେତ୍ରୀ ପୂଜା ହେଗଡେ । ଇତିମଧ୍ୟରେ ଫିଲ୍ମର ଟାଇଟେଲ ପରିବର୍ତ୍ତନ କରିଦେଇଛନ୍ତି ମେକର୍ସ । ‘କଭି ଖୁସି କଭି ଗମ୍’ ବଦଳାଇ ‘ଭାଇଜାନ’ ରଖାଯାଇଛି ।
ସେହିପରି ଫିଲ୍ମର ନିର୍ଦ୍ଦେଶନା ଦାୟିତ୍ବ ନିର୍ଦ୍ଦେଶକ ଫରହାଦ୍ ସାମଜି ତୁଲାଉଥିବା ବେଳେ ଆସନ୍ତା ବର୍ଷ ଦିୱାଲୀ ଅବସରରେ ଫିଲ୍ମ ରିଲିଜ କରିବାକୁ ଯୋଜନା କରିଛନ୍ତି ମେକର୍ସ ।
ରିପୋର୍ଟ ଅନୁଯାୟୀ ସଲମାନ ପ୍ଲାନିଂ କରୁଛନ୍ତି ଯେ ଫିଲ୍ମର ଫାଷ୍ଟଲୁକ ପୋଷ୍ଟ ଆସନ୍ତା ବକ୍ରି ଇଦ ତଥା ଜୁଲାଇ 21ରେ ଜାରି କରିବାକୁ । ପ୍ରକାଶ ଥାଉକି ଗତ ବର୍ଷରୁ ଏହି ଫିଲ୍ମର ସୁଟିଂକୁ ସ୍ଥଗିତ ରଖାଯାଇଛି । ଚଳିତ ବର୍ଷ ମଧ୍ୟ କୋରୋନା ଭୟ ପାଇଁ ସୁଟିଂରେ ବିଳମ୍ବ ହେଉଛି । ଖୁବଶୀଘ୍ର ଫିଲ୍ମର ସୁଟିଂ ଆରମ୍ଭ କରିବେ ମେକର୍ସ ବୋଲି ସୂଚନା ମିଳିଛି ।
