ମୁମ୍ବାଇ: ଦୀର୍ଘ ସମୟ ପର୍ଯ୍ୟନ୍ତ ବିଗ-ବି ଅମିତାଭ ବଚ୍ଚନଙ୍କ ସଚିବ ରହିଥିବା ପ୍ରଯୋଜକ ଶୀତଲ ଜୈନ ସବୁଦିନ ପାଇଁ ଚିରନିଦ୍ରାରେ ଶୋଇଯାଇଛନ୍ତି । ଶନିବାର ସକାଳେ ମୁମ୍ବାଇରେ ସେ ଶେଷ ନିଶ୍ବାସ ତ୍ୟାଗ କରିଛନ୍ତି । ସନ୍ଧ୍ୟାରେ ତାଙ୍କ ଅନ୍ତିମ ସଂସ୍କାର ୱିଲେ ପାର୍ଲେ ସ୍ଥିତ ପବନ ହଂସ ଶଶ୍ମାନ ଘାଟରେ କରାଯିବ । ଖବର ଅନୁଯାୟୀ ଶୀତଲ ପାକପାଖି 36 ବର୍ଷ ପର୍ଯ୍ୟନ୍ତ ଅମିତାଭଙ୍କ ସଚିବ ଭାବେ କାର୍ଯ୍ୟ କରିଥିଲେ ।
ସେ ଅମିତାଙ୍କ ସହ ପ୍ରଯୋଜକ ରୂପେ ମଧ୍ୟ କାମ କରିଥିଲେ । ସେ ବାସୁ ଭଗନାନୀଙ୍କ ସହ ମିଶି ଅମିତା ଓ ଗୋବିନ୍ଦାଙ୍କ ଲୋକପ୍ରିୟ ଫିଲ୍ମ 'ବଡ଼େ ମିଆଁ ଓ ଛୋଟେ ମିଆଁ' ତିଆରି କରିଥିଲେ । ଫିଲ୍ମ ନିର୍ମାତା ଡେଭିଡ ଧୱନଙ୍କ ନିର୍ଦ୍ଦେଶିତ ଏହି ଆକ୍ସନ ଡ୍ରାମା ଫିଲ୍ମ 1998ରେ ରିଲିଜ ହୋଇଥିଲା ।
ଶୀତଲଙ୍କ ମୃତ୍ୟୁରେ ଅନେକ ବଲିଉଡ କଳାକାର ସୋସିଆଲ ମିଡିଆରେ ଶୋକଭରା ଶ୍ରଦ୍ଧାଞ୍ଜଳୀ ଦେଇଛନ୍ତି । ଅନୁପମ ଖେର ଟ୍ବିଟ କରି ଲେଖିଛନ୍ତି, "ଶୀତଲ ଜୈନ, ଯାହାଙ୍କୁ ଆମେ ଦୀର୍ଘ ସମୟ ପର୍ଯ୍ୟନ୍ତ ଅମିତାଭଙ୍କ ସଚିବ ଭାବେ ଜାଣିଥିଲୁ । ସେ ସମ୍ମାନଜନକ ଏବଂ ବିନମ୍ର ବ୍ୟକ୍ତି ଥିଲେ । ଭଗବାନ ତାଙ୍କ ଶୋକସନ୍ତପ୍ତ ପରିବାରକୁ ଏହି କଠିନ ପରିସ୍ଥିତିର ସାମ୍ନା କରିବାକୁ ସାହସ ଦିଅନ୍ତୁ ।"
ଫିଲ୍ମ ଆନାଲିଷ୍ଟ ଅତୁଲ ମୋହନ ଲେଖିଛନ୍ତି, "ଦୀର୍ଘସମୟ ପର୍ଯ୍ୟନ୍ତ ଅମିତାଭଙ୍କ ବିଜନେସ ମ୍ୟାନେଜର ରିହିଥିବା ଶୀତଲ ଜୈନ କିଛି ଘଣ୍ଟା ପୂର୍ବରୁ ମୃତ୍ୟୁ ବରଣ କରିଛନ୍ତି । ଭଗବାନ ତାଙ୍କ ଆତ୍ମାକୁ ଶାନ୍ତି ପ୍ରଦାନ କରନ୍ତୁ ।"
ଅନ୍ୟପଟେ ଫିଲ୍ମ କ୍ରିଟିକ ଏବଂ ଟ୍ରେଡ ଆନାଲିଷ୍ଟ କୋମଲ ନାହଟା ଲେଖିଛନ୍ତି, "ଦୁଃଖଦ ଖବର । ଶୀତଲ ଜୈନ ଆଉ ନାହାଁନ୍ତି । ଶନିବାର ସକାଳେ ତାଙ୍କ ମୃତ୍ୟୁ ଘଟିଛି ।"
